Jehova Jeremias-ak Porgottunk Dhaddtta

Judachea lokank aplo sondex porgottunk, Jehovan Jeremiasak provadi mhunn vinchun kaddlo. Lok ji vaitt kamam kortale tim bond korunk tankam xittkai mhunn Jehovan Jeremiasak sanglem. Punn Jeremiasan mhunnttlem: ‘Jehova hanv tor azunui lhan bhurgo asam. Lokam lagim koxem ulounchem tem mhaka kollona.’ Jehovan taka sanglem: ‘Bhienaka. Hanv tuka modot kortolom. Kitem ulounchem tem hanv tuka sangtolom.’

Jehovan Jeremiasak lokanchea vhoddilank ektthaim korun tanchea mukhar matiechem ek jar foddun oxem mhunnonk lailem: ‘Jeruzalemacho osoch nas zatolo.’ Jeremiasan toxem kelem tednam, tea vhoddilank khub rag ieta ani thoim aslolo Paxur nanvacho ek iadnik Jeremiasak marta. Uprant, to tache hat-paim lakddachea follea bhitor ghaulun dovorta. Tea pasot, Jeremias rat-bhor halonk xokona. Dusrea sokallim Paxur taka soddtta. Tednam Jeremias mhunntta: ‘Mhojean anik zaunchem na. Hanv porgottnni bond kortolom.’ Punn tannem toxem khorench kelem kai? Na. Jednam Jeremiasan hea vixim anik bariksannen chintlem, to mhunntta: ‘Jehovacho sondex mhojea bhitor uzo koso pettla. Hanv porgottunk bond korchona.’ Tor, Jeremias lokank xittkait ravlo.

Zaitea vorsam uprant, Judant ek novo raza raz korunk lagta. Iadnik ani khottea provadeank, Jeremiasacho sondex matui avoddna. Te odhikareank sangtat: ‘Ho munis moronk favo.’ Tednam Jeremias sangta: ‘Tumi zor mhaka jivexim martat zalear, tumi eka niropradi munxacho jiv kaddttat. Hanv mhojim nhoi, punn Jehovachim utram sangtam.’ Hem aikon odhikareamnim mhunnttlem: ‘Hea munxak jivexim marunk favo nhoi.’

Jeremias Devacho sondex porgottit ravta tem polloun odhikari ekdom ragar zatat. Te Jeremiasak jivexim mar mhunn razak sangtat. Tednam razan Jeremiasak tanchea adhin kelo ani tachea sovem zai toxem korat mhunn tankam sanglem. Tednam te Jeremias morcho mhunnon taka chiklachea eka khol baint uddoitat. Jeremias tea chiklant buddonk lagta. Atam tachem kitem zatolem?

Tednam Ebed-melek nanvacho, razacho ek odhikari razak sangta: ‘Odhikareamnim Jeremiasak baint uddoila! To thoinch urlo zalear to mortolo.’ Raza Ebed-melek-ak sangta ki tannem tachea borabor 30 munxank gheun voichem ani Jeremiasak tea baintlo bhair kaddcho. Ami Jeremiasa bhaxen kotthin aslear pasun Devacho sondex porgottit ravonk zai nhoi?