Jeruzalemacho Nas Zata

Judache lok porot-porot Jehovak soddun khottea devanchi bhokti kortale. Zaitim vorsam Jehovan tankam modot korunk proitn kelʼlo. Tannem provadeank dhaddun tankam xittkailim. Punn torui tannim aikonk na. Tachea bodlek, tannim provadeanchim fokannam kelim. Tor tim kortalim ti murti puza Jehovan koxi bond keli?

Babilonacho raza, Nebukadnezar eka-fattlean-ek raxttr jikhot voitalo. Jednam tannem poile pavtt Jeruzalem jikhlem, tannem Raza Jehoiakin-ak, raj-kunvrank, zhuzareank, kola aslolea munxank ani loharank bondi korun sogleank Babilonak vhele. Itlench nhoi, tannem Jehovachea mondirant aslole sogle theve pasun vhele. Tea uprant, tannem Zedekia-k Judacho raza mhunn nemlo.

Survatek, Zedekia Nebukadnezarachem aikotalo. Punn uprant bhonvtonnechea desamnim ani khottea provadeamnim taka Babilonachea add vochonk sanglem. Tednam Jeremiasan Zedekiak xittkaun sanglem: ‘Zor tum Babilonachea add gelear, Judant khun zatole, bhuk poddttoli, ani duensam posortolim.’

Atth vorsam raz kelea uprant, Zedekian Babilonkaram add vochonk tharaile. Ani oxem korunk tannem Ejipttachea soinikanchi modot ghetlim. Tednam Nebukadnezaran apli soin Jeruzalemacher holʼlo korunk dhaddli. Ani tea soinikamnim Jeruzalem xarak veddo ghatlo. Tednam Jeremiasan Zedekiak sanglem: ‘Jehova mhunntta ki tunvem Babilonkarank svotak adhin kelo zalear tum ani hem xar vanchtolem. Punn tum toxem korina zalear, Babilonkar Jeruzalem xar lasun uddoitole ani tuka koidi korun vhortole.’ Tednam Zedekian sanglem: ‘Hanv svotak tanchea adhin korchona!’

Dedd vorsa uprant, Babilonache soinik Jeruzalemacheo vonntteo moddun bhitor sorle ani xarak uzo lailo. Toxench, tannim mondir lasun uddoile, zaitea lokank jivexim marle ani hozaramnim lokank koidi korun vhele.

Zedekia Jeruzalema thaun pollon ghelo. Punn Babilonkar tache fattik lagle. Tannim taka Jeriko xara lagim dhorlo ani Babilonacho raza, Nebukadnezara lagim haddlo. Nebukadnezaran, Zedekiachea mukhar tachea putank marun uddoile. Uprant tannem Zedekiak kuddʼddo kelo ani bondkhonnint uddoilo, zoim to magir melo. Punn Jehovan Judachea lokank oxi promise kele: ‘70 vorsam uprant, hanv tumkam porot Jeruzalemant haddttolom.’

Tea tornnatteanchem kitem zalem, zankam Babilonkaramnim koidi korun vhelʼle? Te Jehovak visvaxi ravtole kai?