Char Cheddeamnim Jehovachi Adnea Pallʼlli

Nebukadnezar Judantlea odhikareank Babilonant vhorta ani tanchi dekhrekh korunk Ashpenaz nanvachea eka odhikareak nemta. Nebukadnezar Ashpenazak tanchea modlea ekdom huxar ani bholaiken ghott asat tea cheddeank vinchunk sangta. Tea cheddeank tin vorsam meren to khas torechem proxikxonn diunk sodhta. Tem proxikxonn tankam Babilonant mhotvacheo zobabdareo samballunk modot korunk xoktalem. Tor tea cheddeamnim Babilonantli Akkadian bhas vachunk, borounk ani ulounk xikonk zai aslem. Toxench, tea cheddeamnim raza ani tachea raj-mahalantle podvi aslole lok jevtat tem jevonn jevunk zai aslem. Tanchea modlea char cheddeanchim nanvam aslim Daniel, Hanania, Mishael ani Azaria. Punn Ashpenaz-an tankam Babilonkaranchim nanvam dilim. Tim mhunnttlear, Belteshazar, Shadrak, Meshak ani Abednego. Tor Babilonkaranchea xikxonnak lagon tea cheddeamnim Jehovachi seva korop soddun dili kai?

Na, tea char cheddeamnim sodanch Jehovachi adnea pallttole mhunn ghott nichov kelʼlo. Razachem jevonn apnnem khaunk zaina mhunn tankam khobor asli. Karonn Jehovachea Kaidea pormonnem tantuntlem thoddem jevonn oxudʼdh aslem. Tor, tannim Ashpenazak sanglem: ‘Please amkam razachem jevonn jevunk dium naka.’ Ashpenaz-an tankam sanglem: ‘Tumi zor tem jevonn jevnant ani tumi razak oskot disle zalear, to mhaka jivexim martolo!’

Danielan hea vixim chintlem ani uprant tannem rakhonnddarak sanglem: ‘Please, dha dis porian amkam fokot torkari vo baji ani udokuch di. Ani uprant razachem jevonn jevtat tea cheddeam modem ani amchea modem ontor polloi.’ Danielan sanglolea pormonnem rakhonnddaran manun ghetlem.

Dha disam uprant, her cheddeam poros Daniel ani tache tin ixtt bholaiken chodd bore distale. Tannim apli adnea pallʼlli mhunn Jehova khuxal aslo. Ani tea pasot tannem Danielak dorxonam ani sopnancho orth somzonk zannvai pasun dili.

Proxikxonn somplea uprant, Ashpenaz-an, tea char cheddeank Nebukadnezara-xim haddle. Raza tanchea lagim uloilo ani tannem polloilem ki Daniel, Hanania, Mishael ani Azaria dusrea soglea cheddeam poros chodd zannvaieche ani huxar asat. Dekhun tannem tea char zannank aplea raj-mahalant vhodd podvi dili. Raza mhotvache nirnnoi ghetalo tednam chodd korun to tanchea koddlean solʼle ghetalo. Razachea soglea huxar munxam ani jadukaram poros Jehovan tankam chodd zannvai dili.

Daniel, Hanania, Mishael ani Azaria eka porkea desant asle, punn torui apunn Jehovache sevok mhunn te visronk nant. Tor, tumchim avoi-bapui tumchea sangata nant tednam pasun tumi sodanch Jehovacho ugddas kortolim kai?