Vonttir Boroilolim Utram

Thoddea tempa uprant, Belshazar Babilonacho raza zata. Eke ratik, to ek jevonn dovorta ani tea jevnnak aplea rajeantlea khas munxank apoita. Hozaramnim odhikari jevnnak ietat. Tea vellar, to aplea chakrank bhangarachim kopam haddunk laita, jim Nebukadnezaran Jehovachea mondirantlean haddlolim. Belshazar ani jevnnak ailole lok hea kopamnim soro pietat ani aplea devachi vakhannʼnni kortat. Tednam okosmat tim jevtalim tea holachea vontticher ek munxacho hat tankam dixtti poddtta. To hat konnank somzona toslim utram boroita.

Hem polloun Belshazar khub bhieta. To aplea jadu korpeank apoita ani tankam oxi promise korta: ‘Hea utrancho orth konnem-i sanglo zalear, hanv taka Babilonacho tisro mhotvacho odhikari kortolom.’ Hem aikon te tea utrancho orth sangpacho proitn kortat, punn konnacheanuch to sangonk zaina. Tea vellar, ranni bhitor ieun sangta: ‘Daniel nanvacho ek munis asa, zo Nebukadnezarak tachea sopnacho orth sangtalo. To tuka hea utrancho orth sangonk xokta.’

Daniel Belshazar raza lagim ieta. Raza taka mhunntta: ‘Tum mhaka him utram vachun tancho orth somzaita zalear, hanv tuka bhangarachi sorpolli ditolom ani Babilonacho tisro mhotvacho odhikari kortolom.’ Tednam Daniel mhunntta: ‘Mhaka tujim dennim nakat, punn hanv tea utrancho orth tuka sangtolo. Tuzo bapui, Nebukadnezar khub gorvixtt aslo, punn Jehovan taka khalto kelo. Hem soglem tum zannam astana pasun, tunvem Jehovacho opman kela. Tunvem tachea mondirantlim bhangarachim kopam haddlim ani tanunt soro pielo. Dekhun Devan him utram boroileant: Mene, Mene, Tekel, ani Parsin. Hea utrancho orth oso ki tum atam raza urchona, punn tuji razvottki Medes ani Persiechea lokanchea hatant voitoli.’

Babilonachea xara bhonvtonnim, vhoddleo-vhoddleo vonntteo asleo ani toxench ek khol nodi vanvtali. Taka lagon, konnuch tanchea xaracher zoit vhoronk xokchona mhunn Babilonantlea lokank distalem. Punn tech ratik, Medes ani Persieche soinik tea xaracher holʼlo kortat. Persiecho Raza Sirus, nodichem udok dusre vatten soddtta. Oxe toren, nodintlem udok unnem zata ani soinik tantuntlean cholon xarachea darvonttea lagim pavtat. Ani polloit zalear, darvontto uktoch asta! Tednam soinik nettan bhitor sortat, ani Babilonachea razak jivexim marun xaracher zoit vhortat. Hea toren, Sirus Babilonacho raza zata.

Hea ghoddnne uprant, eka vorsa bhitor Sirus oxi kollounni korta: ‘Jehovan mhaka Jeruzalemantlem mondir porot bandunk sanglam. Tachea lokam modlo konnuch thoim vochon adar korunk sodhta zalear, tannem vochonk zata.’ Tor, Jehovan promise kelʼlea pormonnem Jeruzalemacho nas zaun 70 vorsam uprant, Judev lok porot aplea desant voitat. Nebukadnezaran Jehovachea mondirantlean haddlolim bhangarachim ani chandichim kopam ani her aidonam, Sirus porot Jeruzalemant dhaddun dita. Tor, Jehova Sirusak uzar korun aplea lokank koso modot korta tem tunvem polloilem?