Eka Vhoddlea Zhadda Sarkem Ek Raj

Eke rati, Nebukadnezarak ek bhirankull sopon poddtta. Tachea sopnacho orth kitem tem to aplea vidvanank vicharta. Punn tanchea modlo konnui taka tem sangonk xokona. Xevottak, raza tem sopon Danielak sangta.

To mhunntta: ‘Mhojea sopnant hanvem ek vhoddlem zhadd polloilem. Tem zhadd itlem lamb aslem ki tem mollbak tenktalem. Ani sonvsarant khoinsorui ravon tem dixtti poddttalem. Taka sobit panam ani zaitim follam aslim. Zonvaram tachea savllek asro gheunk ietalim ani suknnim tachea khandeancher aple gontter kortalim. Uprant mollba thaun ek devdut denvon ailo. Tannem vhoddlean mhunnttlem: “Zhadd ani tache khande katrun uddoiat. Punn tachem mund, mulla soit zomniruch asum di. Ani taka lokhnnachea ani tambeachea pottʼtteamnim bandat. Tea zhaddachem mon bodoltolem ani tem munxa sarkem urchem na, punn zonvara sarkem zatolem ani tacher sat kall sortole. Tednam sogleank kollon ietolem ki Devuch Raza ani apleak zai tankam to razvottki dita.”’

Jehova Danielak sopnacho orth kolloita. Ani jednam Daniel sopnacho orth somzota, to samkoch bhieta. To mhunntta: ‘Raza, hem sopon tujea dusmana vixim asonk zai aslem. Punn hem tujea vixim asa. Katrun uddoilʼlem vhoddlem zhadd tum zaun asa. Tum tuji razvottki hogddaitolo ani ranvotti zonvaram bhaxen xetant tonn khatolo. Punn tea devdutan, tea zhaddachem mund, mulla soit zomnir dovor mhunn sanglem dekhun tum porot raza zatolo.’

Eka vorsa uprant, Nebukadnezar aplea raj-mahalachea terrace-ir bhonvtalo tednam Babilon xarak polloun to oxi boddai marta: ‘Polloiat, hanvem kitlem vhodd ani sobit xar bandlam. Polloiat, mhaka kitli podvi asa!’ To oxem mhunntta tednanch, taka sorgar thaun ek avaz aikonk ieta: ‘Nebukadnezar! Tujea hatantli razvottki atam kaddun ghetole.’

Teach vellar, Nebukadnezar piso zata ani ranvotti zonvaram bhaxen vagonk lagta. Taka lagon, raj-mahalantlean taka bhair ghaltat ani to ranvotti zonvaram sangata ranant ravonk lagta. Nebukadnezarache kens ghonnichea pakham sarke lamb zatat ani tachim nakttam-i vaddon suknneachea nakttam bhaxen zatat.

Sat vorsam uprant, Nebukadnezar boro zata. Ani Jehova taka Babilonacher porot raza korta. Tednam Nebukadnezar oxem mhunntta: ‘Hanv sorgar aslolea Raza, Jehovak vakhannttam. To khorench ek vorto Raza mhunn atam hanv zannam zalom. To gorvixttank khalto korta ani apleak zai taka razvottki diunk xokta.’