Sasnak Urta Toslem Raj

Eke ratik, Raza Nebukadnezar-ak ek vegllech torechem sopon poddlem. Tea sopna vixim chintun taka nhid pasun poddonasli. Tannem aplea jadu korpeank apoile ani tankam sanglem: ‘Mhojea sopnacho orth mhaka sangat.’ Tannim mhunnttlem: ‘Raza, tuka kitem sopon poddlem tem amkam sang.’ Punn Nebukadnezaran tankam sanglem: ‘Na, mhaka koslem sopon poddlem tem tuminch sangonk zai, na zalear, hanv tumkam jivexim martolom.’ Tannim taka porot sanglem: ‘Tum amkam tujem sopon sang, uprant ami tuka tacho orth sangtole.’ Tannem mhunnttlem: ‘Tumi sogle mhaka fosounk proitn kortat, mhaka kitem sopon poddlolem tem sangat?’ Tannim razak sanglem: ‘Tum sangta tem zaunkuch xokona. Sonvsarant konnuch munis tunvem kitem sopon polloilam tem sangonk xokona.’

Hem aikon Nebukadnezarak itlo rag ailo ki tannem aplea desantlea soglea zannarank ani jadu korpeank jivexim marpacho hukum dilo. Tea zannaram modem Daniel, Shadrak, Meshak ani Abednego pasun asle. Daniel sopnacho orth sangonk raza kodde thoddo vell magta. Uprant to ani tache tin ixtt Jehova lagim magnneant modot magtat. Jehova tanchea magnneak koso zobab dita?

Jehovan eka dorxonant Danielak Nebukadnezarachem sopon dakhoilem ani tacho orth kolloilo. Dusrea disa, Daniel razachea sevoka lagim vochon sangta: ‘Khoinchea-i vidvanacho jiv kaddum naka. Hanv razachea sopnacho orth sangonk xoktam.’ Tednam to sevok Danielak gheun Nebukadnezara lagim voita. Daniel razak sangta: ‘Fuddarak kitem ghoddttolem tem Devan tuka kolloilam. Tujem sopon oxem asa: Tunvem ek vhoddli murti polloilʼli. Tachi tokli bangrachi asli, tachem hoddʼddem ani bhuzam chandichem aslim, tachem pott ani pengott tambeachem aslem, tache paim dompram thaun lokhnnachem asle ani paim-ancho sokoilo bhag ordho lokhnnacho ani ordho matiecho aslo. Uprant, konnachoch hat lago nastana dongra voilo ek fator kosllon ieun tea murtechea paim-ancher poddtta. Tednam tea akʼkhe murtecho churo zata ani to churo varean uddon voita. Ani to fator ek vhoddlo dongor zata ani tannem akʼkhi prithum bhorta.’

Danielan razak mhunttlem: ‘Tujea sopnacho orth oso: Bhangarachi tokli mhunnche tujem raj, chandi mhunnche tujea uprant ieta tem raj. Tea uprant ieta tem raj tambea bhaxen astolem ani akʼkhea sonvsaracher raj choloitolem. Tachea uprant ieta tem raj lokhnna bhaxen ghott astolem. Xevottak ieta tem raj lokhnna bhaxen ordhem ghott astolem ani matie bhaxen ordhem oskot astolem. Tea pasot, tantunt ekvott aschona. Anik zo fator ek dongor zata to mhunnttlear, Devachem Raj. Tem raj soglea rajeancho churo kortolem ani sodankal urtolem.’

Tednam Nebukadnezaran zomnir sorpotton Danielak nomoskar kelo ani taka sanglem: ‘Tujea Devan hem sopon tuka kollit kelam, tachea sarko anik konnuch Dev na.’ Danielak jivexim marche bodlek, tannem taka soglea vidvanancho mukheli kelo ani Babilonachea eka prantacho odhikari mhunn nemlo. Tor, Danielachea magnneacho zobab Jehovan koso dilo tem tunvem polloilem?