Jezu Zaitim Vizmitam Korta

Jezu Devachea Rajeachi bori khobor porgottunk hea prithumer ailolo. Jezu Raza zalea uprant kitem kortolo tem dakhoun diunk, Jehovan taka vizmitam korunk xokti diloli. Dekhun to koslem-i duens borem korunk xoktalo. To voita title-i kodden duent lok tachea koddem modot magonk ietale ani to tankam sogleank bore kortalo. Tannem kuddʼddeank polloum-xem kelem, bhereank aikom-xem kelem ani ar zalʼleank cholom-xem kelem. Ani tannem lokancher aslole noxtte dut pasun kaddle. Jezuchea kopddeache degek pasun hat lailear lok boro zatalo. To voita title-i kodden lok tachea fattlean voitalo. To thoklolo astana pasun lok tachea koddem ietale tednam to tankam modot kortalo.

Ek pavtt, Jezu aslo tea ghorant lok eka ar zalʼlea munxak haddunk sodhtat. Punn tea ghorant gordi khub asloli ani tankam bhitor ieunk mellonaslem, dekhun tannim tea ghoracho mallo foddun ugoddlo ani tantuntlean tea munxak Jezu fuddem denvoilo. Tednam Jezu tea munxak mhunntta: ‘Utth ani chol.’ To munis utthon cholonk lagta tem polloun lok ojap zatat.

Anik eka vellar, Jezu eka ganvant bhitor sortalo. Tednam thoim pois kodd zalʼle dha munis ube asle. Te mottʼttean ulo martat: ‘Jezu amkam modot kor!’ Tea disamnim, koddkarank dusrea lokam modem vochonk dinasle. Jezu tankam Devmondirant vochonk laita. Karonn Jehovachea Kaideant boroilʼlem ki ek koddkar boro zalea uprant, tannem Devmondirant vochonk zai. Te Devmondirant vochpachea vatter astanach te bore zatat. Apunn boro zala mhunn tanchea modlea eka koddkarak kollon ieta tednam, to porot Jezu lagim ieta. To Jezuk thank you mhunntta ani Devachi vakhannʼnni korta. Tea dha koddkaram modem fokot ekleanuch Jezuk thank you mhunnttlem.

Ek bail 12 vorsam thaun khub duent asli ani koxe-i bhaxen bori zaunk sodhtali. Jezu vixim tinnem aikolem tednam ti lokanche gordentlean tachea fattlean veta ani tachea kopddeache degek hat laita. Teach vellar ti bori zata. Tednam Jezu vicharta: “Mhaka konnem hat lailo?” Ti bail khub bhieta, tori astana tachea fuddem ieun ti sot uloita. Tednam Jezu mogan tika mhunntta: ‘Bhienaka dhuve, xantin voch.’

Jairus nanvacho ek odhikari, Jezu lagim ieun sangta: ‘Mhoji dhuv duent asa. Please mhoje ghora ieo.’ Punn Jezu tachea ghora pavchea poilinch tachi dhuv morta. Jezu thoim pavlo tednam tannem pollʼlloilem ki thoim zaito lok Jairusachea famili sangata dukh kortat. Tednam to tankam sangta: ‘Roddonakat, bhurgem fokot nhidlam.’ Uprant Jezu tea cheddvacho hat dhorun mhunntta: “Baie, utth!” tednam tem cheddum rokddench utthon bosta ani taka kitem-i khaunk di mhunn Jezu tachea avoi-bapaik sangta. Apli dhuv jivi zalea tem polloun, tachim avoi-bapui kitlim khuxal zalim astolim nhoi!