Survatechim Utram

Tumi zaitea oddchonneancho fuddo kortat astolim, toxench dusreank urba diunk sodhtat astolim vo Jehovak manvota tosle nirnnoi gheunk modot korunk sodhtat astolim. Oslea vellar tumkam faideak poddttolim toslim Bible-antlim versam ani Bible-antleo ghoddnneo sodhunk, Sodanchea Jivita Pasot Bible-antlean Modot hem pustok tumkam adar kortolem. Tor tumkam khoincho vixoi zai to sodhat ani tea vixoi-a khala tumkam thodde prosn, vo Bible-antlea ghoddnneam vixim thoddi mahiti mellttoli. (“Hem Prokaxon Koxem Uzar Korchem?” hem boks polloiat.) Oxem kelʼlean, tumkam Devachea Utrantlean bore solʼle, margdorxon ani bhuzvonn mellttoli. Toxench, dusreank modot korunk ani urba diunk tumkam Bible-antlean faideak poddttat toslim totvam mellttolim.

Hem Prokaxon Koxem Uzar Korchem?

Tumkam zai to vixoi sodhunk, tumi search boks uzar korunk zata vo to khoinchea bhagant asa tem pollounk zata. Hea pustokant sat bhag asat, te mhunnttlear: Famil, Gunn, Jehova Sangata Ixttagot, Oddchonneo, Sobha, Sodanchem Jivit, ani Vagnnuk. Tumkam zai to vixoi tumkam khoinchea-i eka bhagant mellttolo. Ek bhag vinchun kaddat ani tea bhaga khala khoinche-khoinche vixoi asat tem polloiat. Tumi sodhtat to vixoi, khoinchea bhaga khala ietolo tem tumkam khobor na zalear, Sogle Vixoi hacher klik kelear tumkam zai to vixoi tumi sodhunk zata. Dor eka vixoi-a khala tumkam zaiteo bold okxoramnim asloleo thoddeo volleo (lines) vo thodde prosn mellttole. Hachea khala bold kelʼlim asat tim Bible versam tea vollink vo tea prosnank koxim zuddlolim asat tacher niall korat. Thoddea zagear eka vixoi-ache don vo tachea poros chodd bhag kelʼle asat. Hea vorvim tumkam zai ti mahiti sodhunk tumkam sompem zatolem. Thoddea zagear, “pasun polloiat” mhunn versam dilʼlim asat jim teach vixoi-ak lagu zatat. Choddxea zageancher tumkam “Bible-antleo ghoddnneo” vo “Bible-antli ghoddnni” mellttoli. Tachea sokol mukhel mudʼdo somzaita tosleo volleo asat. Tim versam vachtat tednam tumchem chintop nittaier haddunk tumkam modot zatoli.

Eka vixoi-a sombondit soglim versam hea pustokant aschimnant. Punn tumkam khub faideak poddttat toslim versam sodhunk hem pustok ekdom borem asa. (Mho. 2:1-6) Kholaien sodh korunk, tumi New World Translation of the Holy Scriptures-ant marginal references, toxench study notes uzar korunk zatat. Versanchi somzonni mellonk ani tim jivitant koxim lagu korunk zatat tem zannam zaunk, Research Guide for Jehovah’s Witnesses vo Watch Tower Publications Index uzar korunk zata. Tumkam Bible versanchi halinchi somzonni zai zalear, tumi tantuntlea halinchea prokaxonamnim pollounk zata.

Hem pustok tumkam Devachea Utrachi zannvai, ginean ani somzonni mellonk modot kortolem mhunn ami anvddetat. Jitlim chodd tumi hem prokaxon uzar kortolim titlench, “Devachem utor jivem ani xoktivont asa” mhunn tumchi khatri vaddttoli.—Heb. 4:12.