Tumkam Devachem Raj Zai Mhunn Atanch Dakhoun Diat!
Chintat tumi ravtat tea vattarant ek bhirankull vadoll ieunchem asa. Ani TV news-acher sorkari odhikareamnim oxem sanglam: “BEGINCHEA BEGIN BHAIR SORAT! ANI SUROKXIT ZAGEAR VOCHON ASRO GHEIAT!” Tea vellar kitem kelear sarkem zatolem? Khorench, surokxit zagear asro ghetlear tumcho jiv salvar zatolo.
Teach bhaxen ek “vhodd sonkoxtt” ieuncho asa mhunn Jezun sanglam, jem eka bhirankull vadolla bhaxen zaun asa. (Matev 24:21) Ami dusrea zagear gelear hea sonkoxttam thaun amchi rakhonn zatoli oxem nhoi. Punn ami amchi rakhonn korunk kitem korunk zai?
Dongrar dilʼlea xikounnen Jezu Kristan hi adnea dilʼli: “Tumi tachem Raj ani tachem nitivontponn sodanch poilea zagear dovrat.” (Matev 6:33) Hem ami koxem korunk zata?
Devachem Raj poilea zagear dovrat. Hacho orth, ami khoinchea-i vostum poros Devachea Rajeak poilo zago diunk zai. (Matev 6:25, 32, 33) Oxem ami kiteak korunk zai? Karonn amcheo oddchonneo suttaveo korunk khoincheach munxam lagim zaunchem na. Punn fokot Devachea Rajeant amcheo sogleo oddchonneo suttaveo zatoleo.
Tachem nitivontponn poilea zagear dovrat. Devachea kaideam pormonnem ani taka manvota tea pormonnem jieunk ami zata titlo proitn korunk zai. Karonn kitem borem ani kitem vaitt tem amich tharailem zalear tacho porinnam vaitt zatolo. (Mhonnʼnneo 16:25) Tachea bodlek, Devak manvota tea pormonnem jielear ami taka khuxal kortolim ani amkam-i faido zatolo.—Izaias 48:17, 18.
Sodanch Devachem Raj ani tachem nitivontponn poilea zagear dovrat. Thoddim, zata title poixe ektthaim kelear tanchi rakhonn zatoli mhunn chintun Devachea Rajeacher dhean diunchimnant mhunn Jezun sanglolem. Toxench, thoddim zannam aplea uskeamnim itlim buddon astat, ki tankam Devachem Raj sodhunk anik velluch mellona.—Matev 6:19-21, 25-32.
Punn jim konn Devachem Raj zai mhunn dakhoitat tankam atam goroz tem soglem ani fuddarak mezunk zainant titlim besanvam mellttolim mhunn Jezun bhas dilʼli.—Matev 6:33.
Poilea xekddeant Jezuchea xisamnim Devachem Raj ani tachem nitivontponn sodanch poilea zagear dovorlem. Punn tim jivim aslim tednam dukh-tras kabar zaunk nasle. Tori astana tanchi rakhonn zali. Ti koxi?
Tim Devak manvota tea pormonnem jielim dekhun tanchi rakhonn zali. Jea lokamnim Devan sanglolem tem nakarlem tancher oddchonneo aileo punn heo oddchonneo Jezuchea xisancher ieunk nant. Devachem Raj ietolem mhunn tancho bhavarth ghott aslo dekhun zaitea trasancho fuddo korunk tankam modot zali. Ani oxem korunk Devan tankam “munxachea xokte poros khub vorti” xokti dili.—2 Korintkarank 4:7-9.
TUMI DEVACHEM RAJ POILEA ZAGEAR DOVORTOLIM?
Devachem Raj poilea zagear dovrunk Jezun ji adnea dilʼli ti poilea xekddeantlea Kristanvamnim pallʼlli. Ani tannim Devachea Rajeache bore khobre vixim sonvsarbhor porgott kelem. (Koloskarank 1:23) Aizui oxem konn tori kortat kai?
Hoi! Devachem Raj beginuch hea noxttea sonvsaracho nas kortolem mhunn Jehovachim Sakxi zannant. Tea pasot Jezun dilʼli adnea pallunk tim apleachean zata tem soglem kortat. Ti adnea mhunnttlear: “Soglea raxttrank govai mellche khatir Rajeachi bori khobor akʼkhea sonvsarant porgott zatoli, ani tea uprant xevott ietolo.”—Matev 24:14.
Devachea Rajeachi bori khobor aikon atam tumi kitem kortolim? Ami tumkam poilea xekddeantlea Bereiantlea lokanchi dekh gheunk urba ditat. Apostl Paulu koddlean tannim Devachea Rajea vixim bori khobor aikoli tednam, tannim ti khub urben manun ghetli. Tea uprant tannim aikolam tem khorem asa kai na tem pollounk tim Devachem Utor bariksannen topastalim ani jem tim xiklim tem tannim aplea jivitant apnnailem.—Itihas 17:11, 12.
Tumi pasun toxench korunk zata. Devachem Raj ani tachem nitivontponn tumi poilea zagear dovorlear, tumchi atam rakhonn zatoli ani fuddarak tumkam sasnak urta tosli xanti ani surokxa mellttoli.