Soddvonnechea Manddavollik Lagon Munis Porot Jivont Zaunk Xokta

Soddvonnechea manddavollik lagon amkam fuddarak mellchim asat tea besanvancher, zoxem, porot jivontponnacher niall korunk, Jezucho Ugddas Dis, amkam ek bori sondhi dita. Jehovan munxank moronk rochunk naslim. Taka lagon, amcho mogacho konnui morta tednam amkam sogleant chodd dukh zata. (1Kor. 15:26) Lazar melo tednam aple xis roddttat tem polloun Jezuk khub dukh zalem. (Ju. 11:33-35) Jezu aplea Bapa sarkoch aslo, ani tea pasot, amcho konnui morta tednam amchem dukh polloun, Jehovakui khub dukh zata mhunn amkam kollon ieta. (Ju. 14:7) Jehova to vell axeun ravta jedna To aplea sevokank, mornnantlea nhidentlean uttoitolo. Ami-i toxinch tankam porot pollounk axetat.—Job 14:14, 15.

Jehova Dev soglem kam manddavollin korta. Melolea lokankui, to manddavollin jivont kortolo mhunn ami visvas dovrunk zata. (1Kor. 14:33, 40) Tea vellar, mornnak voichea bodlek ami, porot jivont zaleant tankam ieukar ditolim. Amcho mogacho mela mhunn amkam dukh bhogta tednam, ami porot jivontponnachea bhorvonxacher niall kortat kai? (2Kor. 4:17, 18) Jehovan amkam, Jezu udexim soddvonn dili ani Bible-ant melolim jivont zatolim mhunn bhorvonso dilo dekhun, ami tache upkar manunk zai nhoi?—Kol. 3:15.

• Moron gelolea khoinchea ixttank ani soireank tumi porot pollounk axetat?

• Bible-ant dakhoilolea khoinchea munxak tumi mellon, tanchea lagim ulounk axetat?