Janer—Jivit ani Porgottnni Mittingechea Pustike Pasot Modot
JANER 1-7
DEVACHEA UTRANTLE THEVE | MATEV 1-3
“Sorginchem Raj Ieunchem Zalem”
(Matev 3:1, 2) “Tea disamnim Juanv Batist dixtti poddlo ani Judeiachea oronneant oso updes [“porgottnni,” NW] diunk laglo: 2 Jivit bodlat, kiteak Sorginchem Raj ieunchem zalem.”
nwtsty Mt. 3:1, 2 obheasachi ttipnni
porgottnni: Hacho Grek utracho orth “ek porgottnnar jahir zagear porgott korta.” Hem utor porgottnni korchi rit dakhoun dita: eka zomeak ektthaim korun sermanv divop nhoi, punn jahir zagear sogleank porgottop.
Raj: Hachem Grek utor ba·si·leiʹa, hem eka raiall sorkarak ani tea rajea khala aslolea lokank vo vattarak lagu zata. Grek bhaxen boroilʼlea Bible-antlea pustokant, hem utor 162 pavtt asa. Tantunt, 55 pavtt hem utor Matevachea pustokant melltta ani tem choddxe pavtt Devachea sorginchea Rajeak lagu zata. Matevan hem utor zaitea pavtt uzar kelʼlean hea pustokak Rajeachem xubhvortoman mhunnttlam.
Sorginchem Raj: Matevacheach xubh- vortomanant polloilem zalear, him utram sumar 30 pavtti mellttat. Hea utrank, Marku ani Lukas hanchea xubhvortomanant, Devachem Raj mhunnttlolem asa. Hem Devachem Raj sorginchem zalʼlean, tem sorgar thaun razvottki choloita.—Mt. 21:43; Mk. 1:15; Luk. 4:43; Dan. 2:44; 2Tim. 4:18.
ieunchem zalem: Hacho orth, sorginchea Rajeacho fuddaracho Raza beginuch ieuncho aslo.
(Matev 3:4) “Ho Juanv unttache lhonvechem angavlem nhestalo ani penkttak chamddeacho pottʼtto bandtalo ani toll ani ranvott mhonv khaun jietalo”
nwtsty media
Juanv Batist Koso Nhestalo ani Distalo
Juanv, unttachi lhonv uzar korun toiar kelʼlem angvostr nhestalo ani benddak ek chambddeacho pottʼtto bandtalo, zantunt lhan-lhan vostu ghalun dovrunk mellttaleo. Elija provadeachem-i nhesop oxench aslem. (2Raz. 1:8) Unttanchea lhonvechem angvostr khorkhorit aslem ani gorib lok tem nhestale. Punn, girest lokanche kopdde suddsuddit asle. (Mt. 11:7-9) Juanv zolma thaun Nazarit zalʼlean tache kens ghoddie kednanch katrunk na astole. Juanv sadem jivit jietalo hem tachea nhespa voilean ani to koso distalo tachea voilean rokddench kollttalem. Tannem aplem akʼkhem jivit Devachi khuxi korunk uzar kelem.
Toll
Bible-ant toll hem utor, dhaktteo mixeo aslolea zaitea torechea tollank uzar kelam. He toll, bhirem koxe eka zagea thaun dusrea zagear voitat. Jerusalemant kelʼlea eka sodha pormonnem, registanantlea tollant 75 tokʼke protein asa. Aiz lok, tanchi tokli, paim, paktte, ani pott kaddun, tacho urlolo bhag randun vo toxech khatat. He toll khatana sungttam vo kurle bhaxen lagtat ani protein-an bhorlole astat.
Ranvotti Mhov
Hanga chitrant dakhoilam, ranvotti mhonva-musan kelʼlem mhonvanchem malem (1) ani mhonvan bhorloli ek polli (2). Juanv khatalo tem mhonv ghoddie ranvott mhonva-musamnim kelʼlem mhov astolem. Hea musank, Apis mellifera syriaca mhunnttat, je tea ganvant astat. He mus fokot gorom ani sukhea zagear jietat, zoxem, Judachea oronnneant ani tankam posunk zainam. Punn nnovʼvea xekddea (K.X.A.) thaun Israelant ravtolea lokamnim, matechim berelam uzar korun mhonva-musank posunk suru kelem. Hem mhonv toiar korunk aiz ami Turkey mhun vollkhotat tea desantlean hea mhonva-musank haddttale astole. Oslea mhonva-musanche maleanche zaitea urlole kuddke Jordan Falkeant aslolea Tel Rehov nanvachea xarant mellʼlleat.
Bible-ant Motiam Sodhum-ia
(Matev 1:3) “Judas Perezacho ani Zeracho bapui (tanchi avoi Tamar); Perez Ezronacho bapui; Ezron Ramacho.”
nwtsty obheasachi ttipnni Mt. 1:3
Tamar: Matevan boroilolea Mesiasachea vonxavollint aslolea panch bailanchea nanvam modem, hem poilea bailechem nanv. Urloleo char bailo, Rahab, Ruth (vs. 5); “Uriasachi potin” Bathsheba (vs. 6); ani Marie (vs. 16). Rahab ani Ruth Israelitkar nasleo. Eke vegllech ritin teo bailo Jezucheo purvoz zaunk pavleo mhunn tanchim nanvam vonxavollint dileant.
(Matev 3:11) “Hanv jivit bodlopa khatir tumkam udkan snan ditam [“bautizm ditam,” NW] khorem, punn mhoje pattlean ieta To mhoje-von bollvont, ani Tacheo vhanno hatant dhorunk mhaka favo na. To zalear Povitr Atmean ani ujean tumkam snan ditolo.”
nwtsty obheasachi ttipnni Mt. 3:11
bautizm ditam: vo “buddoita.” Ba·ptiʹzo hea Grek utracho orth “buddovop.” Bible-antlim her versam vachtana bautizm mhunnche akʼkho buddovop mhunn kollon ieta. Zoxem, ek pavtt Juanvan Salim ganvant Jordan Falkea lagim aslolea eka zagear ‘udok chodd aslem dekhun’ lokank bautizm dilo. (Ju. 3:23) Filipan Ethiopiechea hizddeak bautizm ditana te dogui “udkant denvle.” (D.I. 8:38) 2Raz. 5:14 dakhoita, Naaman “sat pavtti Jordan nodint buddun bhair sorlo.” Hea vixim Septuagint-ant, (Hebrev bhaxen boroilʼlea pustokanchem poilem grek bhaxantor) Ba·ptiʹzo hench grek utor uzar kelam.
JANER 8-14
DEVACHEA UTRANTLE THEVE | MATEV 4-5
“Jezun Dongrar Dilolea Updesantlim Lisanvam”
(Matev 5:3) “Khuxemonan gorib tim subhagi: Sorginchem Raj tanchem.”
nwtsty obheasachi ttipnni Mt. 5:3
subhagi: Hea utrak Grek bhaxen jem utor uzar kelam tacho orth fokot sontosachea vellaruch khuxal asop nhoi. Punn, Deva thaun besanvam zhoddun tachea sangata boro sombond aslolean, sodanch melltta tem dhadosponn. Hench Grek utor, Devache ani Jezuche sorginche mhoime vixim somzaunk uzar kelam.—1Tim. 1:11; 6:15.
Khuxemonan gorib tim: Hea utrank Grek bhaxen jim utram uzar keleant tacho orth “gorib lok (gorjevont; adar naslolim, bhikari).” Hea versant tem utor, oslea munxam vixim sangta jim apli goroz zannant. Hench utor, Luk. 16:20, 22-ant Lazar ‘bhikarea’ vixim sangonk uzar kelam. Thoddea bhaxantorant hea Grek vollik ‘otmik ritin gorib’ mhunn bhaxantor kelam. Hacho orth, oslim munxam, jim apleak Devachi vollokh zai ani tachem margdorxon zai mhunn bore bhaxen zannant.
(Matev 5:7) “Doiall tim subhagi: Dev tanchi doia kortolo.”
nwtsty obheasachi ttipnni Mt. 5:7
Doiall: Bible-ant uzar kelʼlea ‘doiall’ ani ‘doiallai’ hea utrancho orth, fokot nit kortana doia dakhovop ani bhogsonnem divop nhoi. Punn, choddxe pavtt hea utrant, eka gorjevontak polloun, kakut ani churchurem dista toslim bhavnam mellon astat. Jim tea gorjevontak adar diunk eka munxak fuddem kaddttat.
(Matev 5:9) “Xanti kortat tim subhagi: Dev tankam Aplim bhurgim mhonnttolo.”
nwtsty obheasachi ttipnni Mt. 5:9
Xanti kortat tim: Oslim munxam fokot xanti samballttat toslim nhoi punn xanti na thoim pasun xanti kortat.
w07 12/1 17
Tumchea Bhurgeank Xanti Kortat Toslim Zaunk Xikoiat
Kristi avoi-bapui aplea bhurgeank “xanti sodun tichea pavlamnim” koxem cholchem tem xikounk khub vavurtat. (1 Pedru 3:11) Dubhav, niraxiponn ani rag pois korun, xanti korunk khub vavurchem poddtta, punn, oxem kelolean khuxalkai melltta.
Bible-ant Motiam Sodhum-ia
(Matev 4:9) “Tannem mhollem: ‘Sorpottun tum mhaka nomoskar korxi zalear, hanv hem sogllem tuka ditolom.’”
nwtsty obheasachi ttipnni Mt. 4:9
nomoskar korxi zalear: ‘Nomoskar kor’ hea utrank Grek bhaxen uzar kelʼlea utracho orth, sodanch nomoskar korop oxem nhoi punn thoddeach vellak lagon. Tor, apleak ‘nomoskar kor’ mhunn Soitanan Jezuk sanglem tednam, to taka apli bhokti sodanch korunk sango naslo, punn ekuch pavtt korunk sangtalo.
(Matev 4:23) “Jezu akʼkhea Galileiant bhonvun-firun tanchea devsthanamnim xikovnn ditalo, Rajeachem Xubhvortoman porgottʼtalo, ani loka modem sogllea jinsacho pidda-rog boro kortalo.”
nwtsty obheasachi ttipnni Mt. 4:23
xikovnn ditalo . . . porgottʼtalo: Xikounn divop, porgottnnechea kamam thaun vegllem asam. Ek xikovpi fokot porgott kori na; to xikoita, somzaita, manun gheunk karonnam dita ani purave dita.
JANER 15-21
DEVACHEA UTRANTLE THEVE | MATEV 6-7
“Devachem Raz Poilea Zagear Dovrat”
(Matev 6:10) “Tujem Raj [amkam] ieum, Tuji khuxi sorgar zata toxi, sonvsarant zaum.”
Magnnem Korop Ek Sueog
12 Amchea magnneant ami kitem magop chodd gorjechem? Amchea magnneant ami Devachea nanva vixim, tachea razvottke vixim ani tache khuxe vixim magonk zai. Jehova Devan amchea pasot kelʼlea soglea kamank lagon ami taka vakhannun, tache upkar attounk zai. (1 Itihas 29:10-13) Jezun amkam magnnem korunk xikoitana, Devachem nanv povitr zaum, tachem raj amkam ieum ani tachi khuxi sorgar zata toxi sonvsarant zaum mhunn poilem magonk xikoilem. (Matev 6:9-13 vachat.) Heo vostu maglea uprantuch, Jezun amkam amchea gorzam vixim magonk xikoilem. Jehova Devak, amchea magnneant poilo zago diun ami fokot amcheach vixim chintinant punn tachea-i vixim chintat mhunn dakhoun ditat.
(Matev 6:24) “Konnacheanuch borabor dogam dhoniancho gulam zaum nozo; kiteak to ekleak zolltolo ani dusreacho mog kortolo, vo ekleak chikttun ravtolo ani dusreachi beporva kortolo. Tumchean Devachim ani borabor Girestkaiechim gulamam zaum nozo.”
nwtsty obheasachi ttipnni Mt. 6:24
gulam: Gulam hea Grek utracho orth, ek chakor zaun, taka vikto ghetla tea ekach dhonia pasot kam korop. Jezu hanga, eka Kristanvan fokot Devachich bhokti korunk zata mhunn sangtalo. Teach borabor tachean girestkaiechea fattlean dhanvonk zaina.
(Matev 6:33) “Devachea Rajeachea nemam pormannem jieunk ani Takach manta tem korunk zaum-di tumcho vhoddantlo vhodd husko, [“Tachem Raj poilea zagear dovrat ani tachi nit sodit ravat,” NW] ani heo soglleo vostu To tumkam ditolo.”
nwtsty obheasachi ttipnni Mt. 6:33
sodit ravat: Hacho Grek utracho orth ek pavtt nhoi punn sodanch sodit ravchem. Jezuche khore patlavdar, Devachem Raj thoddo temp sodhun magir her vostu fattlean vocho nant. Te sodanch Devachem Raj aplea jivitant poilem dovortat.
nit: Jim konn Devachi nit sodhtat, tim Devak manta tem kortat ani borea ani vaittache tache dorje pallttat. Hem xikop Farizevanchea xikovpa poros vegllem aslem, karonn te aplech nitiche dorje toiar kortale.—Mt. 5:20.
w16.07 12 ¶18
Devachem Raj Sodhat, Her Vostu Nhoi
18 Matev 6:33 vachat. Kristachea xisamnim, aplea jivitant Devachea Rajeak poilo zago diunk zai. Toxem kelear, “heo soglleo vostu To tumkam ditolo” mhunn Jezu sangta. Hem koxem zait? Poilinchea versant to oso sangta: “Tumkam hea sogllea vostunchi vo jivitant goroz asat tea vostunchi goroz mhunn tumcho sorgincho Bap tor zannoch.” Jehova amcheo zonn ekleacheo gorzo vollkhon gheta. Amkam jevnnachi, nhespachi ani asreachi goroz poddttoli mhunn kollchea poilinch, Jehova tem boro zannam. (Filp. 4:19) Amchem nhesop kednam zhoron voitolem tem to zannam. Amchea kuttumba pormonnem amkam kitlea jevnnachi goroz asa, ani ravonk kitli suvat zai tem to zannam. Amkam khoreanich kitem goroz asa tem Jehova ditolo.
Bible-ant Motiam Sodhum-ia
(Matev 7:12) “Mhonnttoch, dusreamnim tumche thai korchem mhonn tumkam zai, toxench tumi-i dusream thai korat: Somurt ani Provadi xikoitat tem hench.”
w14 5/15 14-15 ¶14-16
Dongrar Dilʼlo Updes Sevent Uzar Korat
14 Chintat, tumkam ek dis konnacho fon ieta punn tea munxacho avaz tumi vollkhonant. To tumkam jevunk kitem borem lagta tea vixim prosn vicharta. Tednam, ‘to konn kai ani taka amchea thaun kitem zai’ mhunn ami chintunk lagtat. Taka resped diunk, ami ghoddie thoddo vell tachea lagim uloitolim. Punn, apunn konn tem sangon, tannem amkam boreak poddtta toslea jevnnam-khannam vixim mahiti diunk fon kelʼlo mhunn sanglolem zalear, ami chodd vell uloita aslim ani to kitem sangta tem umedin aikota aslim. Dusrim amchea lagim uloitana, tim konn ani tim sangta tem spoxtt ritin sanglear amkam borem dista nhoi? Tor, sevent dusream lagim uloitana ami heach ritin koxem vagonk zata?
15 Zaitea zagear porgottnni kortana, lokank ami kiteak bhett ditat tem spoxtt ritin survatekuch sanglear boreak poddtta. Ami sangonk aileant ti mhotvachi khobor aiknnaro noko hem khorem. Punn amchi vollokh sangonastana ami survatekuch, ‘Tujea lagim ghoddttalem zalear tum sonvsarantle khoinche tras vo dukh poilim kaddttolo aslo?’ mhunn prosn vicharlear kitem zatolem? Ho prosn ami, aiknnaro kitem chintʼta tem zannam zaunk, ani uprant Bible-antlea eka mudʼdeacher ulounk sompem zaunk, vichartat astolim. Punn, aiknnaro ghoddie chintunk poddttolo: ‘Ho konn, ani mhojea lagim ho prosn kiteak vicharta?’ Tor, aiknnareak aikonk sompem zatat tea toren ami ulounk zai. (Filp. 2:3, 4) Hem ami koxem korunk zata?
16 Sorkittachi dekh-rekh korpi bhav ek bori rit apnnaita. Survatek, aiknnareak zap kelea uprant to tanchea hatant Sot Zannam Zaunk Tuka Khuxi Asa? hem ttrektt diun tankam oxem mhunntta: “Ami hem ttrektt tuka diunk aileant. Lokanchea monant ietat toslea sov prosnanche zobab hantunt dilole asat. Hem tuka.” Ami kiteak aileant tem zannam zalea uprant aiktolo uskea mekllo zata, ani taka fuddem ulounk sompem zata mhunn to bhav sangta. Sorkittchi dekh-rekh korpi bhav tankam fuddem oxem vicharta: ‘Hantuntlea khoinchea prosnancho zobab tum zannam zaunk sodhta?’ Aiknnarean apleak zai to prosn dakhoilea uprant, Bible tacho kitem zobab dita tem bhav tea ttrekttachea adaran dakhoita. Aiknnaro apleak zai to prosn vinchun kaddina zalear bhav tacher dobhav ghalinastana, apunnuch ek prosn vinchun, tea vixim ulounk lagta. Ulounk survat korunk zaiteo riti asat. Thoddea zageamnim, ami kiteak aileant tem sangchea poilim aiknnareank amchem nanv, ganv ani kuttumba vixim sangchem poddtta. Tor, amchea vattarant survatekuch ami koxem uloilear lokank borem distolem tem zannam zaun ulovop gorjechem.
(Matev 7:28, 29) “Jezun Aplem ulovop sompoilem ani Tachi xikovnn aikun lok zobor ojap zatalo, 29 kiteak tanchea xastriam bhaxen nhoi, punn odhikaran To tankam xikovnn ditalo.”
nwtsty obheasachi ttipnni Mt. 7:28, 29
ojap zatalo: Hanga uzar kelʼlea Grek utracho orth, lok thottokle, vo itle ojap zale ki tanchim tonddam ugddich urlea sarkem zalem. Grek bhaxen uzar kelʼlem hem utor, Jezuchi utram tanchea kallzak laglim ani tancher zalʼlo porinnam zaito temp porian urlo mhunn dakhoita.
Tachi xikovnn: Hem Jezuchi xikovpachi rit, tannem uzar kelʼleo vatto, ani tachi xikvonn dakhoita, zantunt, dongrar dilolea updesantleo sogleo suchounneo mellon asat.
xastriam bhaxen nhoi: Jezuchea tempar xastri lok, vhodd-vhodd dhorm gurunchim utram uzar korun lokank xikoitale. Punn, Jezun lokank xikounk tanchim utram uzar korunk na. To Devacho prothinidi koso, Devachem Utor uzar korun lokank odhikaran xikoitalo.—Ju. 7:16.
JANER 22-28
DEVACHEA UTRANTLE THEVE | MATEV 8-9
“Jezun Lokancho Mog Kelo”
(Matev 8:1-3) “Dongra velo denvlea uprant, lokacheo urponji Tache pattlean geleo. 2 Ovchituch eka koddkaran lagim sorun Taka nomoskar kelo, ani mhollem: ‘Saiba, Tuka zai zalear, Tujean mhaka nitoll korunk zata.’ 3 Jezun Aplo hat vistarun taka lailo ani mhollem: ‘Hoi, Mhaka zai: nitoll za.’ Ani teach vellar to koddantlo nitoll zalo.”
nwtsty obheasachi ttipnni Mt. 8:3
hat . . . lailo: Moizesachea somurti pormonnem koddkaramnim apli pidda her lokank lagchi nhoi mhunn, tanchea thaun pois ravonk zai aslem. (Lev. 13:45, 46; Lok. 5:1-4) Punn dhormik fuddariamnim tea kaideam bhair, aple anik kaide ghatlole. Zoxem, her lokamnim eka koddkara thaun 4 hat pois mhunnche, 1 meter, 80 centi meter (6 ft) pois ravonk zai aslem. Ani varem marta tea disamnim, 100 hat pois mhunnche, 45 meter (150 ft) pois ravonk zai aslem. Oslea kaideank lagon, lok koddkarank doia dakhoi nasle. Judevanchea pustokamnim, don dhorm gurunchi toknnai kelʼli asa. Eklo koddkaram thaun liptalo ani dusro tankam dhanvddaunk fator martalo. Punn, Jezu tea koddkarak koxem bhogta tem somzolo, ani taka tachem itlem churchurem dislem ki tannem taka hat lavun boro kelo. Judev lok oxem korchech nasle. Jezu tea koddkarak hat lainastana pasun boro korunk xoktalo, tori astana, tannem taka hat lavun boro kelo.—Mt. 8:5-12.
Mhaka zai: Koddkaran Jezu lagim vinoti keli tednam, Jezun taka fokot, ‘hanv tuka boro kortam’ mhunn sangonk na. Punn “mhaka zai” him utram dakhoun ditat ki tea koddkarak boro korunk Jezuk kallzam thaun itsa asli. Tannem taka, fokot ti apli ek zobabdari mhunn boro korunk na.
(Matev 9:9-13) “Ani thoicho cholot vetana Jezun manddvir boslolea, Matev nanvachea, eka monxak dekhlo, ani taka mhollem: ‘Mhoje pattlean ie.’ Ani to utthun Tache pattlean gelo. 10 To ghorant jevnnak boslolo astana, sobar donddvosuldar ani vaitt chaliche monis aile ani Jezuchea ani Tachea xisanchea sangata jevnnak bosle. 11 Hem polleun Farizevamnim Tachea xisank mhollem: ‘Donddvosuldaram ani vaittoveam sangatim tumcho Guru jevnnak bosta tem kitem?’ 12 Hem aikun Jezun zobab dilo: ‘Borim asat tankam nhoi, punn vaittakarank ki voizachi goroz. 13 Vochat ani hea utrancho orth konn to xikat: “Iodn naka Mhaka, doia zai.” Khorench sangtam, tumi promannik mhonn dhortat tankam nhoi, punn patki mhonn lekhtat tankam apounk Hanv ailam.’”
nwtsty obheasachi ttipnni Mt. 9:10
jevnnak boslo: Eka munxa sangata jevnnak bosta tednam, tachi tea munxa sangata ek laginchi ixttagot asa mhunn kollon ietalem. Taka lagon, Jezuchea disamnim Judev lok, Judev nhoi tea lokam sangata boson kednanch jev nasle.
donddvosuldar: Zaite Judev lok, Romi odhikariam pasot lokam thaun dondd ektthaim kortale. Oslea donddvosuldarancho, her Judev lok dves kortale. Karonn lok dves kortale tea Romi sorkara pasot he donddvosuldar kam kortale ani lokam thaun tharailam tachea poros chodd dondd ghetale. Her Judev lok, donddvosuldarank itle pois kortale, ki tankam patki ani pozddeam borabor lekhtale.—Mt. 11:19; 21:32.
(Matev 9:35-38) “Sogllea nogram- ganvamnim bhonvun, Jezu tanchea devsthanamnim xikovnn ditalo, Rajeachem Xubhvortoman porgottʼtalo, ani sorv jinsancho pidda-rog boro kortalo. 36 Ani lokacheo urponji polleun tanche vixim To churchurtalo kiteak gonvlli naslolea menddram bhaxen teo dogdovtaleo ani niradari zalʼleo asleo. 37 Tednam xisank Tannem mhollem: ‘Pik khorench khub, punn vavraddi thodde; 38 dekhun pikachea Dhonia lagim lunvnne-mollnnek vavraddi dhadd mhonn magat.’”
nwtsty obheasachi ttipnni Mt. 9:36
churchurtalo: Hea utrak uzar kelʼlem Grek utor splag·khniʹzo·mai, “antkoddiank” (splagʹkhna) lagu zata. Hem utor, kuddichea khollaie thaun vo kallza bhitorlim bhavnam dakhoun dita. Doiallai vixim sangonk uzar kelʼlem hem Grek utor sogleam poros chodd bhavnam dakhoita toslem utor.
Bible-ant Motiam Sodhum-ia
(Matev 8:8-10) “Portipallun xotpotin mhollem: ‘Saiba, tunvem mhojea ghora ieunk mhaka favona; ek utor mat uloi ani mhozo chakor boro zatolo. 9 Tor hanv-ui dusreachea hata khal asam ani mhoje-i khal xipai asat; ani tantlea ekleak hanv sangtam: “Voch!”, ani to veta; dusreak: “Ie!”, ani to ieta; mhojea chakrak: “Omkem kor!”, ani to korta.’ 10 Hem aikun Jezu ekdom ojap zalo ani Apnna pattlean ietoleank Tannem mhollem: ‘Hanv tumkam khorench sangtam, iedo vhoddlo bhavarth mhaka Israelant mellunkuch na.’”
w02 8/15 13 ¶16
“Hanvem Tumkam Dekh Dilea”
16 Aplea chakrak boro kor mhunn sangonk ek xotpoti Jezu sorxim ailo. To ghoddie ek videxi vo ek Romi munis aslo astolo. Tannem jivitant zaiteo chuki keleat mhunn Jezuk khobor asli. Juzechea disamnim ek xotpotichem jivit zulum, khun, ani khotti bhokti, oslea vaitt kamamnim bhorlolem aslem. Tori punn, Jezun tachea boreponnacher ani taka aslolea ghott bhavarthacher dhean dilem. (Matev 8:5-13) Uprant, khambear umkallailʼlo astana, Jezu aplea kuxik umkallailʼlea guneanvkarea kodden uloilo. Tannem kelʼlea opradam pasot, Jezu taka vaitt ulounk na, punn tannem taka eka borea fuddaracho bhorvonso dilo. (Lukas 23:43) Ami dusreancheo chuki kaddleo zalear ami tankam niraxi korunk xoktat mhunn Jezu zannam aslo. Tor tannem lokanchea boreponnacher dhean dilem. Oxem kelʼlean, zaiteank borem korunk urba mellʼlli.
(Matev 9:16, 17) “Pornnea vostrak konnuch anvllonk naslolea novea lugttacho kopo marina, kiteak to vostra thaun oddon bhair sorta ani fallo odik vhoddlo zata. 17 Nhoi mhonn novo soro pornnea dabeamnim bhorinant; bhorlo zalear, dabe futttat, soro vhanvun veta ani dabeancho-i ibadd zata. Na, novo soro novea dabeamnim bhortat ani don-ui bore urtat.”
jy 70 ¶6
Jezuche Xis Upas Kiteak Korinant?
Jezuchea xisank Judevancheo pornneo riti-rivazo, zoxem upas, pallchi goroz nasli mhunn Jezu Juanv Batistachea xisank somzoita. Judev lok pornnea riti pormonnem bhokti kortale tem sarkem korunk Jezu ieunk naslo, karonn ti bhokti korpachi rit bond zaunchi asli. Jezun jea ritin bhokti korunk sanglolem tantunt munxancheo riti-rivazo nasleo. Ti Judevanchea bhokte poros veglli asli. Jezu pornnea vostracher ek novo lugttacho kuddko lavun ximvonk sodhinaslo vo pornnea dabeant novo soro bhorunk sodhinaslo.
JANER 29–FEBRER 4
DEVACHEA UTRANTLE THEVE | MATEV 10-11
“Jezu Somadhan Korta”
(Matev 10:29, 30) “Eka assarionak don xerkam viktat nhoi? Toripunn tantlem ek-ui tumchea Bapachea hukuma viret bhuim poddona. 30 Tumche tokleche kens porian soglle mezlole asat.”
nwtsty obheasachi ttipnni Mt. 10:29, 30
xerkam: Hea utrak chaltea bhaxen uzar kelʼlem Grek utor strou·thiʹon, zacho orth, khoinchem-i lhan sukhnnem. Punn choddxe pavtt tem xerkank uzar kortale. Xerk hem sukhnnem jevnnak uzar kortat tea sukhnnea modem sogleam poros unnea molachem aslem.
eka assarionak: Eka munxan 45 minttam kam kelem zalear taka mozuri mhunn ek assarion mellttalo. (App. B14 NW polloiat.) Hea ghoddier, Jezu Galileiant tisrea pavtt porgott korunk ailʼlo tednam, don xerkanchem moll ek assarion aslem mhunn tannem sanglem. Eka vorsa uprant, Jezu Judea-nt porgottʼttalo tednam, don assarionak panch xerkam mellttalim mhunn tannem sanglem. (Luk. 12:6) Heo donui ghoddnneo polloileo zalear, veaparachea dhondeant xerk samkench unnea molachem sukhnnem aslem mhunn kollon ieta. Tem itlea unnea molachem aslem ki panchvem xerk te funkott ditale.
tokleche kens porian soglle mezlole asat: Munxachea tokler, chodd korun ek-lakha voir kens astat mhunn sangtat. Jehovak munxam vixim itlea bariksannechi khobor asa zalear to Kristachea dor eka pattlavdarachi kitli kallji gheta tem kollon ieta.
nwtsty media
Xerk
Jevnnak uzar kortat tea sukhnnea modem xerk sogleam poros unnea molachem sukhnnem aslem. Eka munxan 45 minttam kam kelear, taka mellttale tea mozuren tachean don xerkam viktim gheunk zatalim. Hea utrak uzar kelʼlem Grek utor zaitea bhaxechea lhan sukhnneank uzar kortale, zoxem ghoramnim astat tim xerkam (Passer domesticus biblicus) ani Spanish xerkam (Passer hispaniolensis), jim Israelant azunui borpur asat.
(Matev 11:28) “Sogllim tumi koxtt kortat ani ojeachea bhara khal asat tim, Mhoje-xim ieiat ani Hanv tumkam somadhan kortolom.”
nwtsty obheasachi ttipnni Mt. 11:28
bhara khal: Jezu ieukar ditalo te lok jivitachea uskean ani kamanchea bhara khal asle. Moizesache somurti sangata, munxancheo zaiteo riti-rivazo tankam pallunk poddttaleo. Taka lagon, Jehovachi bhokti korop tankam ek vhojem koxem lagtalem. (Mt. 23:4) Satvea disa tannim visov gheuncho aslo punn to-ui dis tankam ek bhar koso lagtalo.—Sutt. 23:12; Mk. 2:23-28; Luk. 6:1-11.
Hanv tumkam somadhan kortolom: “Somadhan” hea Grek utracho orth visov ghevop (Mt. 26:45; Mk. 6:31) ani toxench kam korun thoklea uprant porot ghottai mellounk gheta to suseg (2Kor. 7:13; Fil. 7). Hea versachea voir-sokol vachit zalear kollta ki Jezuchem “zum” ubarop mhunnttlear (Mt. 11:29) seva ani kam korop, visov ghevop nhoi. Hanv tumkam somadhan kortolo mhunn Jezu sangta tednam, hacho Grek utrancho orth, to thokloleank somadhan korta ani ghottai dita. Oxem kelʼlean tim, lhov ani sompem aslolem Jezuchem zum ubarunk toiar zatat.
(Matev 11:29, 30) “Mhojem zum tumcher gheiat ani Mhoje lagim xikat, kiteak Hanv dulob ani lhanvik kallzacho, ani tumchea jivak somadhan melltolem; 30 tor Mhojem zum gheunk sompem, ani vahunk hollu Mhojem ojem.”
nwtsty obheasachi ttipnni Mt. 11:29
Mhojem zum tumcher gheiat: Jezun hanga, “zum” hem utor odhikarak ani margdorxonak khalteponn dakhounk uzar korta. Tachea monant ghoddie, don zonvarancher ghaltat tem zum aslem astolem. Zor Jezu apleacher Devan ghatlolea zum-a vixim uloitalo zalear, Jezu aplea sangata aplea xisankui tea zum-a khala ieunk apoun, tem ubarunk tankam modot kortolo mhunn sangtolo zait. Toxem aslem zalear, him utram oxim mhunnonk zata: “Mhojea sangata mhojea zum-a khala ieiat.” Punn Jezu hanga apunn dusreancher ghalta tea zum-a vixim uloitalo zalear, tacho orth, eklean Kristacho xis zaun, tachea odhikarak ani margdorxonak khalti ravonk zai.
Bible-ant Motiam Sodhum-ia
(Matev 11:2, 3) “Tednam, Kristachea kornnianchi khobor bondkhonnint aikun, Juanvan Tache kodde oxem vicharunk aplea xisank dhaddle: 3 ‘Ieuncho asa to tunch to, vo ami dusrea konnachi vatt polleunchi?’”
jy 96 ¶2-3
Juanv Jezu Koddlean Aikonk Sodhta
Juanvan ho prosn kiteak vicharlo zait? Juanv ek Dev-bhoktecho munis aslo. Jezuk don vorsam poilim bautizm ditana, Devachi xokti tacher dhenvta ti tannem polloili ani Jezu aplo put mhunn sangtana Devacho tallo tannem aikolʼlo. Tor, Juanvacho bhavarth unno zala mhunn chintunk amkam karonnuch na. Toxem zalʼlem zalear, Jezu hea vellar Juanvam vixim borem ulouncho naslo. Punn Juanvak Jezu vixim dubhav naslo zalear tannem ho prosn kiteak vicharlo?
Jezuch Mesias mhunn Juanv tacheach kodden vicharun, khatri korunk sodhtalo zait. Jezucho zobab aikon, Juanvak bondkonnit ghottai mellttoli asli. Tachea hea prosnak anik ek karonn asonk xokta. Devan obhixikt kelʼlo Jezu, raza ani soddvonnddar zauncho asa mhunn sangta tea Bible-antlea bhakitam vixim Juanv zannam aslo. Punn Jezuchea bautizma uprant Juanv zaite mhoine bondkhonnint urlo. Taka lagon, Mesiasa vixim sanglolim soglim bhakitam Jezuch purnn kortolo kai vo tachea uprant anik konn ieunk asa mhunn to vichartalo.
(Matev 11:16-19) “Hi atanchi pinddka konnak mhonn Hanvem sor korchi? Moidanar bosun ravlolea bhurgeanchea khella-pongddam sarki ti. Ap-aplea pongddachea vangddeank tim oxim ulo kortat: 17 ‘Ami tumkam nachpachim songitam vennuncher vazoilim, punn tumi nachle nant; ami tumkam vilapachim gitam gailim, punn tumi roddlim nant.’ 18 Tor Juanv jevonn toxem pivonn chakinastana ailo, ani lok mhonntta: ‘Tacher devchar bosla.’ 19 Monxacho Put khaun-pieun ailo, ani lok mhonntta: ‘Ho asa pottio ani bebdo, donddvosuldarancho ani patkiancho ixtt.’ Tori Devache zannvaiechim kamam tika sakxi ditat.”
jy 98 ¶1-2
Aikona Te Pinddkechem Kotta
Juanv Batistak Jezu khub manan lekhtalo punn lok taka koxe lekhtale? Jezu mhunntta, “atanchi pinddka . . . Moidanar bosun ravlolea bhurgeanchea khella-pongddam sarki ti. Ap-aplea pongddachea vangddeank tim oxim ulo kortat: ‘Ami tumkam nachpachim songitam vennuncher vazoilim, punn tumi nachle nant; ami tumkam vilapachim gitam gailim, punn tumi roddlim nant.’”—Matev 11:16, 17.
Jezuchea utrancho orth kitem? Tea vixim to fuddem somzoita: “Juanv jevonn toxem pivonn chakinastana ailo, ani lok mhonntta: ‘Tacher devchar bosla.’ Monxacho Put khaun-pieun ailo, ani lok mhonntta: ‘Ho asa pottio ani bebdo, donddvosuldarancho ani patkiancho ixtt.’” (Matev 11:18, 19) Juanv, Nazarit zalolean ek sadem jivit jietalo. To soro pasun pie naslo. Tori astana lok tacher devchar bosla mhunnttale. (Lokgonnti 6:2, 3; Lukas 1:15) Punn, Jezu Juanva bhaxen jieunk na. To her lokam bhaxenuch jielo, jevlo ani pielo. To hisba bhair kednanch vochonk na. Tori astana, lok taka pottio ani bebdo mhunnttale. Hachea voilean to dakhoun dita ki lokank kednanch dhadoxi korunk zaunchem na.