Jehova Sangata Tumi Tumchi Ixttagot Porot Koxi Ghott Korunk Zata?

DOR vorsak, zaitim zannam porot Jehovachim Sakxim zaun sobheche bhag zatat. Hea toren, dor eklo porot ieta tednam “sorgar kedo vhoddlo sontos” zata tea vixim chintat! (Lukas 15:7, 10) Tumi porot Jehovachim Sakxim zaleant zalear Jehova, Jezu, ani ainz tumchea hea nirnnoiak lagon khub khuxal asat mhunn tumi khatri dovrunk zata. Punn Jehova sangata tumchi ixttagot porot ghott kortana tumkam thoddeo oddchonneo ieunk puro. Teo khoincheo ani tumi tancho fuddo koso korunk xoktat tem polloum-ia.

KOSLEO ODDCHONNEO IEUNK XOKTAT?

Porot Jehovachim Sakxim zalea uprant pasun zaitea bhav-bhoinnank khub temp poriant niraxiponn bhogonk xokta. Oxench Raza Davidak ghoddlem. Taka bhogsonnem mellʼllea uprantui tannem oxem mhunnttlem: “Mhojea guneanvamnim mhaka dhorla.” (St. 40:12; 65:3) Tor tumkam pasun oslim guneanvkari vo lojechim bhavnam, zaitim vorsam poriant uronk xoktat. Udharonnak, 20 vorsam poros chodd vorsam poriant sobhentlean bhair kaddloli bhoinn Isabellea mhunntta, “Jehovan mhaka bhogxilam mhunn manun gheunk mhaka khub kotthin zalem.” Tor ugddas dovrat ki tumi oxe toren niraxi zalim zalear Jehova sangata tumchi ixttagot ghott urchi na. (Mho. 24:10) Tor oxem zaunk dium nakat.

Anik ek oddchonn mhunnttlear, Jehova sangata tumchi ixttagot porot ghott korunk khub vavr mellon asa mhunn tumi uskeunk puro. Ani oxem korunk tumchean zaunchem na mhunn tumkam disonk puro. Oxench bhav Antoine-ak dislem. To porot Jehovacho Sakxi zalea uprant tannem oxem mhunnttlem: “Hanv poilim Jehovacho Sakxi aslo tednam hanv jem kitem xiklolom ani kortalom tem soglem hanv atam visorlom.” Tor oslea bhavnank lagon, thoddim zannam Jehova pasot apleachean zata tem soglem korunk fattim soronk puro.

Hem somzonk ami ek udharonn polloum-ia. Vadoll ieun eka munxachem ghor moddon voita tednam tem porot bandunk kitlo vell ani vavr lagtolo hem chintun to uskeunk xokta. Teach bhaxen, tumi patok adartat tednam Jehova sangata asloli tumchi ixttagot piddʼddear zata. Ani ti porot ghoddun haddunk kitlo vavr mellon asa hem chintun tumkam ghoddie khub usko zaunk puro. Punn Jehova tumkam modot kortolo mhunn ugddas dovrat.

Jehova tumkam oso ieukar dita: ‘Ieiat, ulon polleum-ia vo suttavem korum-ia.’ (Iz. 1:18) Tor tumi Jehova sangata piddʼddear zaloli tumchi ixttagot ghott korunk vo suttavi korunk vavr kortat taka lagon Jehova tumcho khub mog korta. Tor hea vixim chintat: Tumi Jehova lagim porot aileant dekhun Soitanachea khottea aropank zobab diunk tumi Jehova Devak ek sondhi dilea!—Mho. 27:11.

Tumi Jehova lagim porot ieunk pavl ghetlam, tor to-ui tumchea lagim sortolo mhunn tannem utor dilam. (Jak. 4:8) Ani atam tumi portun sobheche bhag zaun asat. Punn itlench kelear puro kai? Na! Tumcho Bapui ani Ixtt zaun aslolea, Jehova pasot tumcho mog ghott korit ravonk tumi vavr korunk zai. Hem tumi koxem korunk zata?

TUMI MELLOUN GHEUNK ZATAT TOSLE DHEI DOVRAT

Jehova Dev ani tannem bhasailolea Sobit Bage vixim tumkam ghoddie ugddas asa astolo. Punn tumi sodanch porgottnni korit ravchi, mittingek hajir zaunchi, ani bhav-bhoinnam sangata vell sarchi goroz asa. Oxem korunk, tumi melloun gheunk xoktat tosle thodde dhei dovrunk zatat. Te dhei khoinche te atam ami polloum-ia.

Jehova lagim porot-porot magnnem korat. Hea vixim Andrej nanvacho bhav oxem mhunntta: “Hanvem jem kitem kelʼlem taka lagon mhaka loz distali ani mhojem ontoskornn mhaka khatalem. Punn dor ek pavtti magnnem kelea uprant tim bhavnam pois zatalim ani mhaka monachi xanti mellttali.” Oslim bhavnam tumkam asat zalear magnnem korunk tumkam kotthin zaunk xokta hem Jehova Dev bore bhaxen zannam mhunn ugddas dovrat. (Rom. 8:26) Tor tachea sangata tumchi ixttagot ghott korunk “thambonastana magnnem korat.” (Rom. 12:12) Punn kitem magchem tem tumkam kollona zalear Stotram 51 ani 65-ant poschatap kelolea Raza Davidachim utram tumkam modot korunk xoktat.

Chukonastana Bible-acho obheas korat. Oxem kelolean tumcho bhavarth ghott zatolo ani Jehova pasot tumcho mog vaddttolo. (St. 19:7-11) Hea vixim, Filipe sangta: “Hanv Bible vachop ani Bible-acho obheas korop chukoitalo dekhun hanv Jehova thaun pois gelo ani hanvem taka dukhoilo. Tor oxem porot zaina zaunk atam hanv chukoinastana svotacho obheas kortam.” Tumi pasun Filipe-a sarkem korunk zata. Punn tumchea svotachea obheasant kitea vixim obheas korop tem tumkam kollona zalear sotant ghott aslolea eka ixttachi tumi modot gheunk zata.

Sobhentlea bhav-bhoinnam sangata tumchi ixttagot porot ghott korunk vavrat. Tumi kelʼlea chukink lagon sobhentlim bhav-bhoinnam tumcher azun ragar asat oxem ghoddie tumkam disonk xokta. Oxench bhoinn Larissak dislem. Ti mhunntta: “Khub temp porian mhaka loz bhogtali ani hanvem mhojea bhav-bhoinnank dukhoileant oxem mhaka distalem.” Tumkam-i oxem dista zalear sobhentle vhoddil ani her bhav-bhoinnam Jehova sangata tumchi ixttagot ghott korunk tumkam modot korunk sodhtat mhunn ugddas dovrat. (“Vhoddilamnim Kitem Korunk Zata?” hem boks polloiat) Karonn tumi porot aileant mhunn tim khub khuxal asat ani tumi-i khuxal aslolim tankam zai.—Mho. 17:17.

Tor tumi tumchea sobhentlea bhav-bhoinnam sangata tumchi ixttagot koxi ghott korunk xoktat? Chukonastana tanchea sangata mittingek hajir zaiat ani porgottnnent bhag gheiat. Oxem kelolean kitem faido zatolo tea vixim Felix sangta: “Hanv sobhent porot kednam ietolom mhunn bhav-bhoinnam mhoji vatt polloitalim. Tor tim khorench mhozo mog kortalim. Hanv atam porot sobhecho bhag zaun asa, Jehovan mhaka bhogxila ani tachi seva hanv korit ravonk xokta hem zannam zaunk tannim mhaka modot keli.”—“Tumi Kitem Korunk Zata?” hem boks polloiat.

SODDUN DIUM NAKAT!

Tumi porot Jehova thaun pois gelolim Soitanak zai. Tea pasot, to tumchea jivitant trasanche anikui zaite “vadoll” haddit ravtolo. (Lukas 4:13) Punn tacho fuddo korunk Jehova sangata tumchi ixttagot ghott korit ravat.

Aplea thaun pois gelolea zaitea zannank Jehovan porot aplea sangata ghott ixttagot korunk modot kelea. Tor tumkam-i to oxench korunk modot kortolo mhunn khatri dovrat. Karonn aplea xelliam vixim tannem oxem bhasailam: “Sandd-loleak Hanv sodunk vetolom, vatt chukloleak Hanv portun haddunk vetolom, dukhovloleache ghai bandto-lom, ani osokt zaleant tankam ghott kortolom.”—Ez. 34:16.

Vhoddilamnim Kitem Korunk Zata?

Porot Jehovache Sakxi zatat tannim Jehova sangata apli ixttagot ghott korunk zai. Oxem korunk, vhoddil tankam zaitea toren modot korunk xoktat. Tem koxem tem polloum-ia.

Tankam khatri diat. Ek poschatap kelʼlo munis aple “vhodd khontint buddon” vochonk xokta mhunn apostl Paulu zannam aslo. (2 Kor. 2:7) Karonn tannem kitem kelʼlem tea vixim loz bhogun to niraxi zaunk puro. Hea pasot, apostl Paulun Korintantle sobhek oxem sanglem: “Tumi taka bhogsuncho ani taka dhir diuncho.” Tor vhoddilamnim, Jehova ani bhav-bhoinnam tancho mog kortat mhunn tankam khatri diunk zai, ani tankam sodanch modot ani xabaski di-it ravonk zai. Oxem kelolean tim niraxi zaunk pavchim nant.

Tanchea sangata magnnem korat. “Devak manovlolea monxachea khotkhotit magnneak khub boll asa.” (Jak. 5:16) Hea vixim Larissa sangta: “Hanvem vhoddilank mhoje uske ani bhirante vixim sanglem tednam tannim mhojea pasot magnnem kelem. Ani tednam te mhojer ragar nant, punn Jehova sangata mhoji ixttagot porot ghott korunk tem mhaka modot korunk sodhtat mhunn mhaka kollon ailem.” Toxench, Theo sangta: “Vhoddilanchea magnneantlean Jehova mhojea bhitor fokot vaittuch nhoi punn borem asa tem pasun polloita ani to mhozo khub mog korta mhunn mhaka khatri mellʼlli.”

Tanchea sangata ixttagot korat. Porot Jehovache Sakxi zalʼleam sangata bhav-bhoinnamnim ixttagot korop khub gorjechem. Hea vixim, Justin nanvacho vhoddil oxem sangta: “Hea bhav-bhoinnam sangata ixttagot korop khub mhotvachem. Oxem korunk, zata titlea pavtti tanchea sangata sevent vochat ani tanchea ghora bhett diat!” Henry nanvacho vhoddil oxem sangta, “Vhoddil tanchea sangata ixttagot kortat tem polloun her bhav-bhoinnam pasun tanchea sangata ixttagot korunk fuddem sortolim.”

Tankam Bible obheas korunk modot korat. Hem korunk vhoddilamnim tankam modot korunk zata. Zoxem, Darko nanvacho ek vhoddil sangta: “Mhojea svotachea obheasant xikla tim Bible-antlim motiam tankam sangonk ani Bible obheas korunk mhaka kitli khuxalkai melltta tea vixim tankam sangonk mhaka borem dista. Ani tankam urba dita toslo ek lekh tanchea sangata obheas korunk mhaka avoddtta.” Toxench, Clayton nanvacho ek vhoddil mhunntta: “Hanv tankam Bible-antlean, tanchea sarkich poristhiti aslolim udharonnam sodhun, tanchea thaun xikonk urba ditam.”

Ek boro gonvlli zaiat. Porot Jehovache Sakxi zaleant tannim vhoddilank neai korpi mhunn polleleat. Punn atam vhoddilamnim tankam te bore gonvlli mhunn zannam zaunk modot korunk zai. (Jer. 23:4) Oxem korunk tannim sodanch tanchem aikonk toiar asonk zai, tankam xabaski diunk zai, ani tankam porot-porot bhett korunk zai. Marcus nanvacho vhoddil gonvlli bhett kortana to kitem korta tea vixim sangta: “Ami tanchea sangata ek vers vachtat, tankam xabaski ditat, ani tim Jehova sangata porot apli ixttagot ghott korunk khub proitn kortat tem polloun ami, toxench Jehova, khub khuxal asa mhunn ami tankam sangtat. Ani dor eke bhettechea xevottak ami porot tankam kednam mellttole to dis tharaitat.”

a Hea lekhant aslolim nanvam bodolʼleant.