Bible-a Thaun Tachea Boroupea Vixim Amkam Kitem Kolltta?

1. Bible-a pasot tumi kiteak upkari asat?

JEHOVAN amkam Bible dila mhunn ami tachim kitlim upkari asat nhoi! Bible-a udexim Jehova amkam bore solʼle dita, jea vorvim aiz amcher ietat tea trasancho fuddo korunk amkam modot zata. Toxench, Bible-a udexim Jehova amkam fuddara pasot ek boro bhorvonso pasun dita. Ani ekdom chodd mhotvachem mhunnttlear, Bible-a udexim Jehova amkam aplea zaitea gunnam vixim sangta. Tachea hea sobit gunnancher ami niall kortat tednam amchem kalliz bhoron ieta, ani tachea sangata ami ek lagxilʼli ixttagot zoddunk sodhtat.—St. 25:14, NW.

2. Jehovan khoinchea vattamnim munxank apli vollokh dilea?

² Munxank apli vollokh mellʼlloli Jehova Devak zai. Tea pasot, tannem adlea kallar thoddea munxank sopnam ani dorxonam dakhoilim, ani thoddeank aplo sondex diunk ainzank uzar kele. (Lok. 12:6; D.I. 10:3, 4) Punn hea vixim kainch boroun dovrunk naslem zalear, amkam hem soglem koxem kollttolem aslem? Ami hem soglem zannam zalolim Jehova Devak zai aslem dekhun tannem tem munxank “eka pustokar boroun dovor” mhunn sanglem. (Jer. 30:2) Ani Jehova “korta titleant-ui sopurnn ani nitt” dekhun tannem uzar kelʼli hi vatt sogleam-von bori ani amkam faideak poddtta tosli asa mhunn ami khatri dovrunk zata.—D.S. 32:4.

3. Aplem Utor samballun dovrunk Jehovan kitem kelem? (Izaias 40:8)

³ Izaias 40:8 vachat. Hozaramnim vorsam thaun, visvaxi dadlea ani bailank Devachea Utra thaun borem margdorxon mellʼllam. Punn Devachem Utor zaitea vorsam adim, piddʼddear zatat toslea vostuncher boroilʼlem. Ani te adle kovlle nas zaun gele. Tor aiz amkam tantuntlean faido zata mhunn ami koxem mhunnonk zata? Jehova Devan lokank aplea utracheo kopi boroun kaddunk lailʼleo. Ani tannim oxem kelem mhunn tannem khatri korun ghetli. Heo kopi boroun kaddpi opurnn asle tem khorem. Tori astana tannim khub dhean diun bariksannen hem kam kelem. Udharonnak, Hebrev Bhaxen Boroilʼlea Pustokam vixim ek zannar oxem sangta: “Ami khatren sangonk zata ki adlea kalla voilem khoinchench pustok itlem bariksannen ani chuk nastana borounk na.” Tor Bible xekddeamnim vorsam adim, piddʼddear zatat toslea vostuncher boroilʼlo, ani tacheo kopi boroun kaddpi opurnn asle zalear pasun, aiz ami amchea Bible-ant jem kitem vachtat, tem tacho Boroupi Jehovachem chintop asa mhunn ami khatri dovrunk zata.

4. Hea lekhant ami kitem xiktolim?

⁴ “Sogllem borem dennem ani soglem sompurnn dan” Jehova amkam dita. (Jak. 1:17, Povitr Pustok - Novo Korar) Ani Jehovan amkam dilʼlem sogleam-von moladik dennem mhunnttlear, tachem Utor Bible. Konnui amkam ek dennem dita tednam, to munis amchea ani amchea gorzam vixim kitle bore toren zannam tem amkam kollon ieta. Ani Jehova vixim hem kitlem khorem zaun asa! Bible-antlean ami Jehova vixim zaitem xikonk pavtat. To amche vixim ani amchea gorzam vixim ekdom bore bhaxen zannam mhunn amkam kollon ieta. Tor hea lekhant, ami Bible-antlean Jehovachea tin gunnam vixim xiktolim. Te mhunnttlear, tachi zannvai, neai ani mog. Tor poilim, Jehova ek zannvaiecho Dev mhunn Bible amkam koso puravo dita tem polloum-ia.

BIBLE-ANTLEAN AMKAM JEHOVACHI ZANNVAI DISON IETA

5. Bible-ant amkam khoinche eke vatten Devachi zannvai dison ieta?

⁵ Amkam tachea zannvaiechea solʼleanchi goroz asa mhunn Jehova zannam. Ani tannem amkam dilʼlem dennem Bible, tache zannvaien bhorlolem asa. Bible-antlea solʼleank lagon zaiteanchea jivitacher boro probhav poddla. Karonn Bible lokanchem jivit bodolta. Moizesan survatechim pustokam boroilim tednam tannem Devachea lokank oxem sanglem: “Hi xikounn bexttim utram nhoi; tim tumchem khud jivit.” (D.S. 32:47) Devachem Utor pallttat tankam ek khuxalkaiechem jivit mellonk xoktalem. (St. 1:2, 3) Devachem Utor zaitea vorsam adim boroilʼlem khorem. Tori astana, aiz pasun lokanchem jivit sudharunk taka xokti asa. Udharonnak, jw.org-cher, “Bible Jivit Bodolta” hantunt, aplea jivitant sudharnni keli ani vhodd bodlav kele toslea munxanchim udharonnam amkam mellttat.—1 Tes. 2:13.

6. Bible-a sarkem sonvsarant anik khoinchench pustok na, oxem ami kiteak mhunnonk zata?

⁶ Bible-a sarkem sonvsarant anik khoinchench pustok na. Oxem ami kiteak mhunnonk zata? Sonvsarant aslolea her pustokanche boroupi ek-na-ek dis mortat. Ani tannim dilʼlo solʼlo uprant faideak poddona. Punn Bible-acho Boroupi Jehova Dev sasnak urta, to Sorvpodvedar zaun asa, ani taka sogleam poros chodd zannvai asa. Toxench, to dita te zannvaieche solʼle khoinchea-i kallar jietolea munxank sodanch faideak poddtta. Tor ami Bible vachtat ani tantunt kitem boroilam tacher niall kortat tednam Jehova Dev apli bollixtt povitr xokti uzar korun, tantunt dilʼle solʼle ami amchea jivitant koxe lagu korunk zatat tem zannam zaunk amkam modot korta. (St. 119:27; Mal. 3:16; Heb. 4:12) Bible-acho Boroupi amkam svota zaun modot korunk toiar asa. Tor chukonastana Bible vachunk amkam borem karonn asa nhoi!

7. Bible-ak lagon adlea kallar Devache lok ekvottan tachi bhokti koxe korunk pavle?

⁷ Bible-ant Devachi zannvai asa mhunn amkam anik koxem kolltta? Bible Devachea lokank ekvottan tachi bhokti korunk modot korta. Israelitkaram Bhasailʼlea Desant bhitor sorlim tednam tim veg-vegllea vattaramnim ravonk laglim ani veg-vegllim kamam korunk laglim. Zoxem, thoddim nustem dhorunk laglim, thoddim gorvam, menddram ani bokddeo posunk laglim, ani her zannam xetkam korunk laglim. Tor eka vattarant ravpi Israelitkar, dusrea vattarant ravpi Israelitkarak sompeponnim visronk xoktalo. Hea pasot, Jehovan tankam zaite pavtti sangata mellon ieunk sanglem, zoim Devachem Utor tankam aikonk mellttalem ani tankam tachi somzonni mellttali. (D.S. 31:10-13; Neh. 8:2, 8, 18) Tor ek visvaxi Israelitkar Jeruzalemant ietalo ani veg-vegllea vattarantlea aplea lakʼkhamnim bhav-bhoinnank polloitalo tednam to kitlo khuxal zatalo tea vixim chintat. Hea toren Jehovan aplea lokank ekvottan ravonk modot keli. Uprant Kristi sobha ghoddoun haddli tednam tantunt veg-veglleo bhaso uloupi bhav-bhoinnam aslim. Thoddim famad aslim ani thoddo chalto lok aslo, thoddim girest aslim ani thoddim gorib aslim. Punn tim Devachea Utracho mog kortalim dekhun tim ekvottan khorea Devachi bhokti korunk pavlim. Tim sangata mellon ietalim dekhun ani tanchea bhav-bhoinnanchea modotik lagon, tim Devachem Utor somzonk pavlim.—D.I. 2:42; 8:30, 31.

8. Bible-ak lagon aiz Jehovache lok ekvottan tachi bhokti koxi korunk pavtat?

⁸ Aiz pasun amcho zannvaiecho Dev Jehova, amkam Bible-a udexim xikoita ani ekvottan ravonk modot korta. Ami Jehova vixim zannam zaunk zai tim soglim sotam Bible-ant asat. Tea pasot, ami Devachem Utor aikonk, somzonk ani tea vixim ulounk, chukonastana mittingemnim, zomatimnim ani odhivexonamnim sangata mellon ietat. Tor ‘ekchitan tachi bhokti’ korunk amkam modot korunk lagon Jehova uzar korta tem sogleam-von mhotvachem sadhon mhunnttlear, tachem Utor Bible.—Zef. 3:9.

9. Jehovan Bible-ant boroilam tem konnank somzo sarkem boroilam? (Lukas 10:21)

⁹ Bible-antlean Jehovachi zannvai dison ieta tacho anik ek puravo mhunnttlear, Jehova Devan Bible-ant zaiteo vostu oxe toren boroileat ki teo fokot khaltea kallzachea munxankuch somzotat. (Lukas 10:21 vachat.) Sonvsarbhor aslolo lok Bible vachta. Ani “her khoinchea-i pustoka poros chodd lok Bible vachta, ani tim tem bariksannen vachtat” mhunn ek zannar sangta. Punn fokot khaltea kallzachea munxankuch tachi khori somzonni melltta, ani tantunt sanglam tem tim apnnaitat.—2 Kor. 3:15, 16.

10. Bible-antlean amkam Jehovachi zannvai anik koxi dison ieta?

¹⁰ Bible-antlean amkam Jehovachi zannvai dison ieta ti anik ek vatt khoinchi? Jehova aplem Utor aplea lokank fokot ek zomo zaunuch nhoi, punn amkam dor ekleak xikounk ani bhuzvonn diunk uzar korta. Ami Jehovachem Utor vachtat tednam taka amchi dor ekleachi kitli kallji asa tem amkam dison ieta. (Iz. 30:21) Udharonnak, ek kotthin poristhiticho fuddo kortana amkam Bible-antlem ek vers mellot jem vachlea uprant tem amcheach pasot boroilʼlem mhunn amkam disonk xokta. Oxem tumkam ghoddlam kai? Hoi, Bible-ant boroilam tem lakʼkhamnim lokank faideak poddtta. Tor amchea svotachea gorzank atam faideak poddtta toslich mahiti tantunt koxi asonk xokta? Hachem fokot ekuch karonn asa. Tem mhunnttlear, Bible-acho Boroupi, Jehovak sogleam poros chodd zannvai asa.—2 Tim. 3:16, 17.

JEHOVA EK NEAI KORPI DEV MHUNN BIBLE-ANTLEAN KOLLON IETA

11. Bible jea toren boroila tantuntlean Jehova bhedbhav korina mhunn amkam koxem kolltta?

¹¹ Jehovak aslolo anik ek khas gunn mhunnttlear, to ek neai korpi Dev. (D.S. 32:4) Ek neai korpi munis, chodd korun bhedbhav korina. Ani Jehova kednanch bhedbhav korina. (D.I. 10:34, 35; Rom. 2:11) Ani hem amkam, Bible borounk jeo bhaso uzar keleo, tantuntlean kollon ieta. Bible-antlea poilea 39 pustokantlim choddxim pustokam, Hebrev bhaxent boroilʼlim. Karonn tea kallar jietolea Devachea lokank hi bhas sompeponnim somzotali. Punn poilea xekddea meren, choddso lok Grik bhas uloitalo. Tea pasot Bible-antlim urlolim 27 pustokam tea bhaxent boroilʼlim. Punn aplem Utor fokot ekuch bhaxent boroilʼlem asonk zai oxem Jehovan sangonk na. Ani aiz hea sonvsaracher aslolo sumar attxim korodd lok zaiteo bhaso uloitat. Tor itlo lok Jehova vixim koso xikonk pavtolo aslo?

12. Hea xevottachea kallar, Daniel 12:4-ant dilʼli bhasaunni purnn zata ti ek vatt khoinchi?

¹² Provadi Daniela udexim, xevottachea kallar “khorem ginean khub vaddttolem” ani zaitea lokank tachi somzonni mellttoli mhunn Jehovan bhas dilʼli. (Daniel 12:4, NW vachat.b) Aiz zaitea lokank Bible-achi somzonni mellonk modot zalea ti ek vatt mhunnttlear, Bible ani Bible-acher adarit prokaxonam bhaxantor keleant, chhapleant ani zaitea lokank vanttleant. Bible soglea pustokam poros chodd bhasamnim bhaxantor kela, ani soglea desantlea lokam lagim asa. Veapar-dhondo korpi, Bible-acheo bhaxantor kelʼleo chhaploleo kopi, thodde pavtti khub mharog viktat. Punn atam meren Jehovachea lokamnim, Bible-acho akʼkho vo thoddo bhag 240-am poros chodd bhasamnim bhaxantor kela, ani lokank to funkott mellonk xokta. Hea karonnak lagon, xevott ieunchea poilim soglea raxttrachea lokank, “Rajeachi bori khobor” xikonk melltta. (Mt. 24:14) Jehova ek neai korpi Dev zalolean, to zata titlea lokank, Bible vachun aplea vixim zannam zaunk ek sondhi diunk sodhta. Karonn to amcho sogleancho khub mog korta.

JEHOVA AMCHO MOG KORTA MHUNN BIBLE-ANTLEAN KOLLON IETA

13. Bible-antlean amkam Jehovacho mog dison ieta mhunn ami kiteak mhunnonk zata? (Juanv 21:25)

¹³ Bible-acho Boroupi, Jehova Devacho sogleam-von vorto gunn mog zaun asa mhunn amkam Bible-antlean kollon ieta. (1 Ju. 4:8) Koxem? Jehova Devan Bible-ant kitem boroun dovorlam ani dovrunk na, tea vixim chintat. Amkam goroz na ti sogli mahiti Bible-ant boroun, Jehovan amcher bhar ghalunk na. Punn to amcho mog korta dekhun aplea sangata ek ixttagot zoddunk, atam ek khuxal jivit jieunk, ani fuddarak sasnachem jivit melloun gheunk amkam goroz asa titlich mahiti Jehova Devan Bible-ant boroun dovorlea.—Juanv 21:25 vachat.

14. Jehova amcho mog korta mhunn Bible-antlean amkam anik koxem kollon ieta?

¹⁴ Toxench, Bible jea ritin boroila tantuntlean pasun Jehova amcho mog korta ani amkam manan lekhta mhunn dison ieta. Udharonnak, amchea jivitant amkam fuddo korunk poddtta tea dor eke poristhitint ami kitem korunk xoktat vo xokonant, tea vixim Jehovan Bible-ant amkam kaideanchem ek lamb list diunk na. Tachea bodlek, adlea kalla voilea munxanchea jivitant ghoddloleo ghoddnneo, umed haddttat tosleo bhasaunneo, ani faideak poddttat tosle solʼle Jehovan Bible-ant boroun dovorleat, jea vorvim bore nirnnoi gheunk amkam modot zata. Hea toren, Jehovacho mog korunk ani kallzantlean tacheo adnea pallunk Bible amkam fuddem kaddtta.

15. (a) Jehovak amchi kallji asa mhunn Bible-antlean koxem kolltta? (b) Chitrant aslolem lhan cheddum, tornnatto bhav, ani zanntti bhoinn Bible-antlea khoinchea udharonnancher niall kortat? (Ut. 39:1, 10-12; 2 Raz. 5:1-3; Luk. 2:25-38)

¹⁵ Tea bhair Bible-antlean, Jehovak amchi khub kallji asa mhunn kollon ieta. Oxem ami kiteak mhunnonk zata? Karonn munxanchim bhavnam ukteponnim dakhoun ditat tosleo zaiteo ghoddnneo amkam Bible-ant vachunk mellttat. Ami hea munxanchim bhavnam somzonk xoktat. Karonn tim-ui ‘amchech bhaxen munxam aslim vo tankam amcheach sarkim bhavnam aslim.’ (Jak. 5:17) Ani sogleam-von mhotvachem mhunnttlear, Jehova amchea oslea munxam sangata koso vaglo tem ami polloitat tednam, “Sorvespor konnvallo ani maiemogacho,” mhunn amkam spoxtt toren dison ieta.—Jak. 5:11.

16. Chukeo keleo tea munxam sangata Jehova koso vaglo tem ami vachtat tednam Jehova vixim ami kitem xiktat? (Izaias 55:7)

¹⁶ Jehova amcho mog korta mhunn Bible-antlean amkam anik eke vatten kollon ieta. Tem mhunnttlear, ami chuki kortat tednam Jehova amkam kednanch sanddchona mhunn amkam khatri melltta. Udharonnak, Israelitkaramnim porot-porot Jehovachea add patok kelem. Punn tannim khorench poschatap kelo tednam Jehovan tankam bhogxilim. (Izaias 55:7 vachat.) Toxench, poilea xekddeantlea Kristanvamnim pasun Jehova tancho mog korta mhunn vollkhon ghetlem. Udharonnak, eka munxan gombhir patok adarlem ani to patki jivit jietalo. Punn uprant tannem poschatap kelo tednam, Devachea preronnan apostl Paulun tea munxak ‘bhogsunk ani dhir diunk’ bhav-bhoinnank urba dili. (2 Kor. 2:6, 7; 1 Kor. 5:1-5) Tor aplea sevokamnim chukeo keleo tednam Jehovan tankam pois korunk nant, punn mogan tankam modot keli, xist dili, ani porot aplim ixttam zaunk ieukar dilo. Hem kitlem borem zaun asa nhoi! Aiz pasun khorench poschatap kortat tanchea sangata Jehova oxech toren vagtolo mhunn to bhas dita.—Jak. 4:8-10.

DEVACHEM “BOREM DENNEM” BIBLE-ACHO VALOR KORAT

17. Bible ek ekdom borem dennem mhunn ami kiteak mhunnonk zata?

¹⁷ Bible Jehovan amkam dilʼlem ek ekdom borem dennem zaun asa. Oxem ami kiteak mhunnonk zata? Ami atam meren xiklim toxem, Bible-a thaun amkam Jehovachi zannvai, neai ani mog dison ieta. Toxench, ami Jehovachi vollokh gheun tachim ixttam zalʼlim taka zai mhunn amkam Bible-a thaun khatri melltta.

18. Jehovan dilʼlem “borem dennem” Bible-a pasot ami amchem upkariponn koxem vaddounk zata?

¹⁸ Devachem Utor ek “borem dennem” mhunn ami sodanch ugddas dovrunk sodhtat. (Jak. 1:17) Tor Bible-a pasot amchem upkariponn vaddoit ravum-ia. Oxem korunk, ami tem vachunk zata ani tacher niall korunk zata. Oxem kelear, tacho vhodd Boroupi amchea vavracher besanv ghaltolo ani amkam ‘Devachi zannvai mellttoli’ mhunn ami khatri dovrunk zata.—Mho. 2:5.