Tumi Zannam Aslim?

Iadnik zonvaranchea rogtachem kitem kortale?

DOR vorsa, Jeruzalemantlea Devmondirantle iadnik vedicher hozaramnim zonvaranchim bolidanam bhettoitale. Poilea xekddeantlo Judev itihaskar Josephus-a pormonnem, Paskanchea porbekuch 2,50,000-am poros chodd menddranchim bolidanam bhettoitale ani zaitem rogot varoitale. (Lev. 1:10, 11; Lok. 28:16, 19) Tor hea rogtachem kitem kortale?

Sodh korpeamnim, Herodan bandlolea Devmondira bhonvtonnim khonnlem tednam ek vatt toiar kelʼli tankam mellʼlli. Ani 70 K.X.-ant Devmondiracho nas zaum poriant, rogot mondira thaun bhair vochonk hi vatt uzar zatali.

Vedi nitoll dovrunk kosli manddavoll asli?

• Vedichea kuxik zomnint burak asle: Vedi thaun rogot bhair vochonk ji vatt toiar kelʼli, tache vixim 200 hea vorsa uprant boroilʼlea Mishnah nanvachea pustokant mellʼllam. Hem pustok Judevanche kaide ani riti-rivazam vixim asa. Tea pustokant pasun, zomnintlean vochonk toiar kelʼle eke vatte vixim sanglam. Tea pustokant sanglam: “Vedichea eka konnxeak don burak asle. Hea donui burkantlean, zonvaranchem rogot toxench vedi nitoll korunk uzar kortale tem udok voitalem. Ani he burak zomnintlean Kidron falkeant pavtale.”

  Vedichea konnxeak aslolea “burkam” vixim Mishnah pustokant jem sanglam tem sarkem asa mhunn atanche sodh korpi sangtat. The Cambridge History of Judaism hea pustokant, Devmondirachea kuxik toiar kelʼli ek vatt mellʼllea mhunn sanglam. Tea pustokant oxem sanglam: “Devmondirantlean rogot ani udok bhair uddounk ghoddie hi vatt uzar kortale.”

• Zaitem udok haddunk manddavoll kelʼli: Vedi ani rogot vochpachi vatt nitoll dovrunk, iadnikank zaitem udok zai poddttalem. Hem udok xarantlean ietalem. Tem udok haddunk canal ani pul asle ani tem santtoun dovrunk ttankeo asleo. Tea vixim sodh korpi Joseph Patrich sangta: “Mondirant udok haddunk ani vedi nitoll dovrunk ji manddavoll asli, titli bori manddavoll tea kalla voilea anik khoincheach devmondirant nasli oxem dista.”