JIVITACHI KANNI
‘Jehova Zhuzacho Dhoni’
JANER 28, 2010-ant, hanv France-achea Strasbourg xarant aslom. Tem ek sobit xar ani thoim khub thonddai asli. Punn hanv thoim tour korunk ieunk naslom. Mhojea sangata anik thoddea bhavank Jehovachea Sakxeancho hokʼk rakhonk European Court of Human Rights (ECHR) hea korttant dhaddlole. Karonn France-achea sorkaran sanglolem ki Jehovachea Sakxeamnim tankam 6 korodd 40 lakh euro (sumar 581,80,64,000 rupia) tax farik korunk zai. Ani tannim jem maglam tem chukichem asa mhunn purave diunk ami thoim gelʼle. Punn fokot poixeank lagon ami ti kortt kes jikhonk sodhtale oxem nhoi. Karonn Jehovachea nanvak mhoima mellop, Jehovachea Sakxeanchem borem nanv samballop ani France desant Sakxeank Jehovachi bhokti korunk svotontrtai mellop, poixeam poros chodd mhotvachem aslem. Tea kortt kesint zo nirnnoi zalʼlo tantuntlean ‘Jehova Zhuzacho Dhoni’ mhunn amkam kollon ailem. (1 Sam. 17:47) Hem soglem koxem suru zalem tem hanv tumkam sangtam.
1999-ant France-achea sorkaran sanglem ki Jehovachea Sakxeanchea France-ant aslolea xakhek 1993 tem 1996 meren jim denngim mellʼlleant, tea pasot tax farik korunk zai. Punn sorkaran hem tax magop chukichem aslem dekhun, ami France-antlea veg-vegllea korttamnim gele. Punn amkam ies mellonk na. Tea pasot ami appeal kelem. Torui amkam neai mellonk na. Ani tea pasot France-achea sorkaran, xakhechea account-antlean, ponchechallis lakh euro poros chodd (sumar 40,88,29,500 rupia) poixe kaddun voile. Te poixe porot mellonk amkam ekuch vatt asli. Ti mhunnttlear, ECHR hea korttant vochop. Punn tea korttant kes vhorchea poilim tannim amkam sanglem ki amchea vokhilamnim ani sorkarachea vokhilamnim, ECHR-achea eka prothinidi sangata mellon tem suttavem korunk zata zalear pollounchem.
ECHR-ache prothinidi, ami sorkarak thodde poixe diun amchea modem suttavem korat mhunn sangtole, oxem amkam dislolem. Punn sorkarak ek poiso pasun divop hem Bible totvam add mhunn ami zannam asle. Karonn he poixe bhav-bhoinnamnim Rajeachea kamank tenko diunk dan kelʼle. Tor he poixe Jehovache asle, sorkarache nhoi! (Mt. 22:21) Tori astana, Korttachea kaideank man diunk lagon ami tankam mellonk toiar zale.
2010-ant ECHR-a mukhar amchi legal team
Ami Korttachea eka sobit conference rumant mellon aile. Ulovop suru kortana tea prothinidin mhunnttlem ki, Jehovachea Sakxeamnim sorkaran maglolea tax-ache thodde tori poixe farik korunk poddttole. Tednam okosmat Jehovache povitr xokten oxem vicharunk amkam fuddem kaddle, “Amchea bank account-antlean, sorkaran sodʼdheak ponchechallis lakh euro poros chodd kaddun vheleat mhunn tuka khobor asa?”
Hem aikon ti khub ojap zali. Sorkaran oxem kelʼlem mhunn sorkarache legal team-in tika sanglem tednam, ti khub bejar zali. Tinnem tankam tapoun mitting thoinch bond keli. Tor ami hi kes jikhonk Jehovan akʼkhi poristhiti koxi bodolʼli tem amkam pollounk mellʼllem. Hem ami kednanch chintunk naslem. Ami thoinchean bhair sorle tednam, ami khub khuxal asle ani jem ghoddlem tem sot manunk amkam khub kotthin zalem.
Jun 30, 2011-ant, ECHR-an amchea vatten nirnnoi ghetlo. Sorkaran Jehovachea Sakxeank jem tax farik korunk lailʼlem tem chukichem mhunn korttan sanglem, ani sorkaran vhelʼle poixe interest-a borabor porot diunk laile. Hea mhotvachea nirnnoi-ak lagon, aiz pasun France-ant khori bhokti korunk Jehovachea Sakxeank svotontrtai asa. Ami tea prothinidik to prosn vichartole mhunn ami chintunk pasun naslem. Punn to prosn Goliatak marlolea fatra sarko aslo. Karonn tea vorvim akʼkhi poristhiti bodolʼli. Tor ami ti kes kiteak jikhlim? Karonn Davidan Goliatak sanglolem toxem, ‘Jehova zhuzacho Dhoni’ zaun asa.—1 Sam. 17:45-47.
Punn hache bhair ami anikui zaiteo kesi jikhleat. Zaite bollixtt sorkar ani dhormik fuddari amchea add aile. Tori astana, 70 veg-vegllea desantlea sogleam-von unchlea korttamnim ani ontoraxttria korttamnim aiz meren sogleo mellon ami 1,225 kesi jikhleat. Heo kesi jikhlolean, Jehovachea Sakxeanche mullave hokʼk rakhonk amkam modot zalea. Zoxem, Jehovachim Sakxi ek dhorm mhunn sorkar vollkhotat, porgottnni korunk amkam svotontrtai asa, ani des-bhoktechea kariavollimnim bhag ghenastana ravonk, toxench rogot ghenastana ravonk amkam hokʼk asa.
Hanv tor New York, U.S.A.-nt aslolea Jehovachea Sakxeanchea Mukhel Ofisant seva kortalom. Tor hanv Europe-ant asloli kortt kes polloun gheunk koso pavlom?
MHAKA MIXINORI MHUNN SEVA KORCHE URBEN VADDOILʼLO
Mhozo daddy George ani mummy Lucille, Gilead-achea 12-vea Korsak graduate zalim. Ani 1956-ant tim Ethiopia-nt seva kortalim tednam, hanv thoim zolmolom. Tannim mhaka poilea xekddeantlo porgottnnar, Filipachem nanv dilem. (D.I. 21:8) Eka vorsa uprant, sorkaran amchea kamacher bondi ghatli. Tea vellar hanv khub lhan aslom. Torui, amchi famil konnak kollonastana Jehovachi bhokti kortali tem mhaka bore bhaxen ugddas asa. Hanv lhan aslom mhunnttoch oxe toren Jehovachi bhokti korunk mhaka khub moja ietali. Punn dukhachem mhunnttlear, 1960-ant sorkaran amkam des soddun vochonk sanglem.
1959-ant, amchi famil Ethiopia-chea, Addis Ababa xarant astana, Nathan H. Knorr-an (sarko dave vatten) amkam bhett dilʼli
Ami U.S.A.-ntlea Kansas-ant aslolea Wichita xarant ailim. Hea vellar pasun mummy-daddy-chi mixinori mhunn seva korchi urba unni zaunk na mhunn dison ietalem. Tim visvaxiponnan Jehovachi seva kortalim ani tannim mhakach nhoi, punn mhoji vhoddli bhoinn Judy, ani mhozo dhaktto bhav Leslie-k pasun Jehovacho mog korunk ani kallzantlean tachi seva korunk xikoilem. Tim pasun Ethiopia-nt zolmolʼlim. Hanvem 13 vorsanche piraier bautizm ghetlo. Ani tin vorsam uprant, ami Peru-nt aslolea Arequipa xarant gelim, zoim porgottnnaranchi chodd goroz asli.
1974-ant, hanv fokot 18 vorsancho aslom tednam, Peru xakhen mhaka ani char bhavank khas pioneer mhunn nemle. Ami Central Andes Dongramnim porgottnni korchi asli. Thoim Quechua ani Aymara bhas uloupi lok pasun asle. Hea vattaramnim poilim kednanch porgottnni zaunk nasli. Thoim provas korunk ami ji gaddi uzar kortale ti eka boksa bhaxen distali dekhun ami tika Arkpett mhunnttale. Ami tea gaddientuch ravtale. Hanv Bible uzar korun thoinchea lokank sangtalom ki Jehova beginuch goribi, duensam ani moronn kaddttolo. (Prok. 21:3, 4) Ani thoim zaitea zannamnim sot apnnailem. Tea vellacho hanv ugddas kortam tednam mhaka khub borem dista.
1974-ant “Arkpett”
HANV MUKHEL OFISANT SEVA KORUNK LAGLOM
1977-ant, Sonchalon Monddollacho bhav Albert Schroeder, Peru xakhek bhett diunk ailo. Tannem mhaka mukhel ofisant Bethel seva korunk fom bhorunk sanglem. Hanvem toxench kelem. Uprant Jun 17, 1977-ant, hanv Brooklyn Bethel-ant seva korunk laglom. Ani char vorsam hanvem Cleaning ani Maintenance khateamnim kam kelem.
1979-ant amchea kazara disa
Jun 1978-ant, Louisiana-chea, New Orleans xarant aslolea ontoraxttria odhivexonak hanv Elizabeth Avallone-ak mellʼllom. Mhojea mummy-daddy bhaxen, tachim-i mummy-daddy visvaxiponnan Jehovachi seva kortalim ani taka sotant vaddoilʼlem. Hanv Elizabeth-ak mellʼllom tednam, niemit pioneer seva korun taka char vorsam zalʼlim ani tem aplem akʼkhem jivit purnn vellachi seva korunk sodhtalem. Ami eka-mekachi bori vollokh korun ghetli ani ami mogan poddlim. Otumbr 20, 1979-ant ami kazar zalim ani sangata Bethel seva korunk laglim.
Sogleam-von poilim ami Brooklyn Spanish sobhent seva korunk laglim. Thoinchim bhav-bhoinnam khub mogall aslim. Tea uprant, ami anik tin sobhamnim seva keli. Ani tea bhav-bhoinnamnim amkam Bethel seva korit ravonk urba dili. Amchim avoi-bapui zannttim zalim ani tankam amchea modotichi goroz asli tednam, tea bhav-bhoinnamnim toxench amchea familin amkam tenko dilo dekhun, ami tanche khub upkari asat.
1986-ant, Brooklyn Spanish sobhentlim, Bethel-ant seva korpi bhav-bhoinnam
KAIDEA SOMBONDIT KHATEANT MHOJI SEVA
Ojapachem mhunnttlear, Janer 1982-ant mhaka Bethel-ant Kaidea Sombondit Khateant seva korunk nemlo. Tin vorsam uprant, kaidea sombondit xikop gheunk ani vokhilachem license mellonk mhaka university-chem xikop korunk sanglem. Thoim xiktana mhaka kollon ailem ki Jehovachea Sakxeank kortt kesimnim zoit mellʼllolem dekhun, Amerikentlea ani her desantlea lokank thoddeo vostu korunk svotontrtai mellʼlloli. Ani university-nt ami tea mhotvachea kesim vixim bariksannen xiktalim.
1986-ant, 30 vorsanche piraier mhaka Kaidea Sombondit Khateacho dekhrekh korpi mhunn nemlo. Hanv tornatto asonui bhavamnim mhojer visvas dovrun mhaka hi zobabdari dili mhunn hanv khub khuxal aslom. Punn hanvem anikui zaitem xikchem aslem, ani hi zobabdari samballunk sompem aschem na mhunn hanv zannam aslo dekhun, mhaka bhirant pasun distali.
1988-ant hanv vokhil zalom. Punn mhaka hem xikop mellʼllolean Jehova sangata mhoji ixttagot kitli oskot zalʼli ti mhaka khobor pasun asonk na. Karonn eka munxak chodd xikop asta tednam, tem xikop dusreank mellonk na dekhun apunn tanchea poros vorto oxem taka disonk xokta. Tea vellar Elizabeth-an mhaka modot keli. Kaidea Sombondit xikop korchea poilim Jehova sangata mhoji ixttagot asli toxi ti porot ghott korunk tannem mhaka modot keli. Oxem korunk vell laglo tem khorem. Punn sovkas-sovkas korun hanv Jehovak anik lagim soronk pavlom. Hanv mhojea onnbhovantlean sangonk xoktam ki ek khas torechem xikop asop chodd mhotvachem nhoi. Punn Jehova sangata amchi ixttagot ghott asop, toxench tachea pasot ani tachea lokam pasot kallzant thaun mog asop hem chodd mhotvachem asa.
PORGOTTCHO HOKʼK RAKHTANA ANI KAIDEA PORMONNEM MANIOTAI GHETANA
Vokhil zalea uprant, hanv Bethel-ant Kaidea Sombondit khateak tenko ditalom ani korttant vochon porgottnni korunk amcho hokʼk rakhonk modot kortalom. Hem kam mhaka khub avoddttalem, punn tem kotthin pasun aslem. Karonn songottnnent rokddech bodlav zait ravtale. Udharonnak, 1991-achea survate thaun, songottnnen prokaxonam pasot poixe gheunchi ji manddavoll asli ti bond korchi mhunn sanglem. Ani oxem korunk tannim Kaidea Sombondit Khateachi modot ghetli. Tea uprant ami prokaxonam funkott ditalim. Ho bodlav kelʼlean Bethel-ant ani porgottnnent amchem kam sompem zalem. Ani haka lagon aiz meren amkam gorje bhair tax farik korunk poddona. Punn hea bodlavak lagon songottnne lagim title poixe aschenant, zaka lagon chodd prokaxonam mellchimnant ani zaitea lokank sot xikonk mellchem na oxem thoddeank distalem. Punn khorem mhunnttlear, 1990 thaun Jehovachea Sakxeancho ankddo don pavtti poros chodd vaddlo. Ani aiz pasun soglea lokank Bible adarit prokaxonam funkott mellttat. Tor fokot Jehovachea adarak lagon ani to visvaxi chakra udexim dita tea nirdexonak lagon, songottnnen kelʼlea vhodd-vhodd bodlavank ies mellʼllam tem hanv svota pollounk xoklam.—Sutt. 15:2; Mt. 24:45.
Amchea songottnnent bore vokhil asat dekhunuch amkam korttant zoit melltta oxem nhoi. Punn neai korpi ani sorkari odhikari Jehovachea Sakxeanchi bori vagnnuk polloitat dekhun amkam zoit melltta. Hachem ek udharonn, amkam 1998-ant Cuba-nt zalʼlea khas odhivexonamnim pollounk mellʼllem. Tea odhivexonamnim, Sonchalon Monddollache tin vangddi ani tancheo bailo hajir zalʼleo. Tim sorkari odhikaream sangata doiallaien ani respedan uloilim. Tanchi hi vagnnuk polloun ami rajkaronnant bhag ghenant mhunn sorkari odhikareank vhodd puravo mellʼllo. Tor tancher zo probhav poddlo to tanchea sangata ami mellttale tea kaidea sombondit mittinge poros chodd aslo.
Punn amkam neai mellonaslo tednam, ‘bori khobor porgottcho hokʼk rakhonk ani kaidea pormonnem maniotai melloun gheunk’ amkam korttant vochonk poddttalem. (Filp. 1:7) Udharonnak, zaitim vorsam poriant Europe-achea ani South Korea-chea odhikareamnim, Sakxi aslolea bhavank military seva nakarcho hokʼk diunk na. Ani hea karonnak lagon Europe-ant sumar 18,000 bhavank, ani South Korea-nt 19,000-am poros chodd bhavank bondkhonnint ghatle.
Punn 2011-chea Julay 7 tarker, ECHR-an Bayatyan v. Armenia hea kesint amchea vatten nirnnoi ghetlo. Tednam thaun akʼkhea Europe-ant konnui aple patiennik lagon military-nt bhorti zaunk nakarta zalear, to lokam pasot seva korunk xokta. Ani Jun 28, 2018-nt, South Korean Constitutional Korttan osloch nirnnoi ghetlo. Tor amcho dor ek tornatto bhav Jehovak visvaxi ravlo dekhun amkam hem zoit mellʼllem.
Jehovachi bhokti korcho ani porgottnni korcho amcho hokʼk rakhonk, mukhel ofisant toxench sonvsarbhorchea xakhamnim aslolem kaidea sombondit khatem khub vavr korta. Sorkar amchea bhav-bhoinnancho virodh korta tednam, tankam modot korunk amkam khub borem dista. Ami korttant kes jikhom vo na, punn tea vorvim razpalank, razank ani lokank govai melltta. (Mt. 10:18) Kesichea vellar uloitana ani ami boroun dilʼlea dokumentamnim ami jim versam uzar kortat, tim neai korpeank, sorkari odhikareank, media-k ani lokank aikonk ani vachunk mellttat. Hea vorvim Jehovachim Sakxi konn ani tanchi patienni Bible-achea adarit asa mhunn khaltea kallzachea lokank kollon ieta. Ani oxem korun thoddim zannam sotant pasun aileant.
THANK YOU, JEHOVA!
Fattlea 40 vorsamnim mhaka sonvsarbhor veg-vegllea xakhamnim Kaidea Sombondit kamam korunk sueog mellʼllo. Tea vellar, hanv zaitea unchlea korttamnim gelom ani vhodd podvi aslolea zaitea odhikareank mellʼllom. Mukhel ofisant ani sonvsarbhor aslolea xakhamnim, Kaidea Sombondit Khateant kam korpi bhav-bhoinnancho hanv khub mog kortam ani tim jem kortat tacho khub valor kortam. Jehovan mhaka zaitim besanvam dileant ani hanv khoreaninch khub khuxal asam!
Fattlea 45 vorsam thaun Elizabeth-an visvaxiponnan ani mogan mhaka tenko dila. Tannem borea toxench kotthin vellar oxem kelam. Ani hea pasot hanv tacho khub valor kortam. Karonn taka ek oslem duens asa, zaka lagon tachi takot unni zait voita.
Ami hem svota onnbhovlam ki amkam aslolea khoinchea-i tankek lagon amkam boll vo zoit mellona. Davidan sanglem toxem, “Sorvespor Aple porjechem boll” zaun asa. (St. 28:8) Khorench, ‘Jehova Zhuzacho Dhoni.’