Vachpeam Thaun Prosn
Jehova beginuch raxttranchea monant koslem ‘chintop’ ghaltolo?
Vhodd sonkoxtt koxem suru zatolem tea vixim Prokasovnni 17:16, 17 oxem sangta: “Tunvem polloileant tim dha xingam ani ranvotti zonvar, tea xindoll bailecho dves kortolim, nas kortolim ani tika vinglli kortolim. Tim tichem mas khatolim ani tika purnn toren ujean zolloun uddoitolim. Karonn apnnem chintlam tem purnn korunk Devan tanchea kallzant ghatlam. Hoi, . . . tannim aplem raj ranvotti zonvarak diun, tanchem jem ekach torechem chintop asa, tem purnn korunk tannem oxem kelem.” Tor Jehova raxttranchea monant, khotto dhorm nas korpachem ‘chintop’ ghaltolo mhunn amchea prokaxonamnim adim sanglolem.
Punn amche somzonnent bodol korchi goroz asa. Karonn raxttramnim ‘aplem raj ranvotti zonvarak diunchem’ hem ‘chintop’ Jehova tanchea monant ghaltolo. Tor hem koxem purnn zatolem tem somzonk sokol dilʼlea prosnancher dhean dium-ia.
Hea bhasaunnent konn-konn asat? Tantunt ‘xindoll bail’ asa, jika “Bollixtt Babilon” pasun mhunnttlam. Ti sonvsarantlea soglea khottea dhormank suchit korta. Toxench, tantunt ‘tambddea rongachem ranvotti zonvar’ pasun asa, jem United Nations-ak suchit korta. Sonvsarbhor xanti samballunk hem songotton poilim 1919-ant suru zalʼlem, ani taka poilim League of Nations mhunnttale. (Prok. 17:3-5) Tea bhair, “dha xingam” soglea sorkarank suchit kortat, je tea ranvotti zonvarak tenko ditat.
Tea xindoll baile modem ani tambddea rongachea ranvotti zonvara modem koslo sombond asa? Ti xindoll bail tea ranvotti zonvaracher “bosloli” asa. Hacho orth, ti tea ranvotti zonvarak tenko dita ani tacher tabo cholounk proitn korta.
Tea xindoll bailechem kitem zatolem? Ranvotti zonvar ani dha xingam ‘ticho itlo dves kortolim’ ki tim tichi sogli girestkai kaddun uddoitolim ani ti kitli noxtti asa tem sogleank dakhoun ditolim. Uprant Jehovan sanglam tea bhaxen, tim ticho purnn toren nas kortolim. (Prok. 17:1; 18:8) Tor khotte dhorm anik aschenant. Punn hem ghoddchea poilim, Jehova raxttrank oxem kitem korunk sangtolo, jem hachea poilim kednanch zaunk na.
Jehova raxttranchea monant kitem ghaltolo? Jehova ‘aplem chintop,’ tem mhunnttlear raxttramnim ‘tanchi xokti ani odhikar tea [tambddea rongachea] ranvotti zonvarak,’ mhunnche United Nations-ak diunk tanchea monant ghaltolo. (Prok. 17:13) Punn chintat, munxanche sorkar apunnuch zaun apli xokti ani odhikar tea ranvotti zonvarak ditole kai? Na! Oxem korunk Dev tanchea monant ghaltolo mhunn hi bhasaunni dakhoun dita. (Mho. 21:1; Izaias 44:28 sor korat.) Ani ho bodlav sovkas-sovkas korun nhoi, punn okosmat zatolo. Tea uprant, ranvotti zonvar soglea khottea dhormancho purnn toren nas kortolem.
Beginuch kitem ghoddchem asa mhunn ami vatt pollounk zata? Sorkar sovkas-sovkas korun United Nations-ak tenko ditat oxem news-ant ietolem mhunn ami ravchi goroz na. Karonn soglea sorkaramnim tanchi xokti tea ranvotti zonvarak diunk Jehova okosmat tanchea monant ghaltolo. Ani oxem zata tednam, vhodd sonkoxtt suru zaunchench asa mhunn amkam kollon ietolem. Punn tea mhunnosor, ami “zagrut ravom-ia ani amchi chintpachi tank samballum-ia.” Karonn beginuch ani okosmat vhoddle bodlav zaunche asat!—1 Tes. 5:6.