Lokanchea Monant Itlo Dves Kiteak Asa?—⁠Hea Vixim Bible Kitem Sangta?

Hea disamnim amkam kosleo khobreo aikonk mellttat? Bhed-bhavak lagon lok zhogddim ani mara-mari kortat, ani dusrea zatichea lokam add zhuztat. Toxench, news-ant lok oslim bhaxonnam ditat jea udexim lok eka-mekacho dves korunk lagtat.

“Israel ani Gaza modem ji zhogddi cholta, ani zhuz ani dves korunk urba ditat, tea lokank lagon social media-nt oslim bhaxonnam aikonk mellttat jea vorvim lok dves korunk lagtat.”—The New York Times, 15 Novembr , 2023.
“Bhed-bhavak lagon okosmat 7 Otumbra thaun lok eka-mekacho dves kortat toslim bhaxonnam diunk lagle ani hinvsa vaddot asa.”—Dennis Francis, president of the United Nations General Assembly, 3 Novembr , 2023.

Dves, zhuzam, mara-mari hantunt kaim novem na. Hem poilim thaun cholot asa. Bible-ant pasun sanglam ki adlea kallar oslech lok asle je “bannam vori aplim vikall utram” soddttale. (Stotr 64:3; 120:7; 140:1) Punn amchea disamnim lok kiteak dves kortat tem amkam Bible-a thaun kollon ieta.

Dves—Nimannea disanchi khunna

Lok aiz eka-mekacho itlo dves kiteak kortat tachi don karonnam amkam Bible-antlean mellttat.

1. Khub temp poilim Bible-ant oslea eka kalla vixim sanglolem jednam “zaiteancho mog thondd zatolo.” (Matev 24:12) Toxench, lokam modem oslo sobhav vaddttolo jea vorvim tim eka-mekacho mog korchimnant, punn dves korunk lagtolim mhunn sanglolem.—2 Timotak 3:1-5.
2. Bible sangta, “akʼkho sonvsar noxtteachea tabeant asa.” Ho noxtto Soitan zaun asa ani tacheach probhavak lagon aiz lok eka-mekacho khub dves kortat.—1 Juanv 5:19; Prokasovnni 12:9, 12.

Punn Bible-ant hem pasun sanglam ki jea karonnank lagon lok eka-mekacho dves kortat tim soglim karonnam Dev purnn toren kaddun uddoitolo. Titlench nhoi, dvesak lagon je dukh-tras zaleat te pasun to kabar kortolo. Bible sangta:

Dev “tanchea dolleantlim soglim dukam pusun kaddttolo, hea fuddem moronn anik aschem na, dukh anik korchimnant vo roddnnem anik aschem na, ani koslech tras aschenant. Karonn adleo vostu nanch zaleo.”—Prokasovnni 21:4.