Anton Petrus/Moment via Getty Images
ZAGRUT RAVAT!
Beginuch Vixv Zhuz Zatolem Kai?—Hea Vixim Bible Kitem Sangta?
Gelʼlea 30 vorsamnim zaitea lokank distalem ki desam bhitor atam xanti asa mhunn. Punn halinch zalʼlea ghoddnneank lagon tanchem chintop chukichem aslem mhunn tankam kollon ailem.
“Lebanonachea border-a lagim Israel ani Hezbollah zomeachea lokam modem zhuz suru zalem. Tednam Gazachem zhuz bhonvtonnchea desamnim pasun suru zait mhunn lok bhiele.”—Reuters, Janer 6, 2024.
“Iranachea tabeant aslole zaite zome, veg-vegllea zageancher akromonn kortale. Itlench nhoi, tannim okosmat portun hotʼtearam korunk suru kelim, ani Russia ani China pasun Iranak tenko ditat. Tea pasot Iran ostomek aslolea desank ek dhoko zaun asa.”—The New York Times, Janer 7, 2024.
“Russia aizui Ukraine-ant aslolea soglea vattarancher akromonn korit asa.”—UN News, Janer 11, 2024.
“China-chi economy toxench soin vaddot asa ani Taiwan-acho gorv vaddot asa. Toxench, China ani Amerika modem boro sombond na dekhun kednam-i zhuz pettonk xokta.”—The Japan Times, Janer 9, 2024.
Sonvsarachi poristhiti okosmat bodolta tea vixim Bible-ant kitem tori sanglam kai? Hea udexim vixv zhuz suru zaunk xokta kai?
Aiz ghoddttat tea ghoddnneam vixim Bible-ant poilinch sanglolem
Aiz umkinch zhuzam zatolim mhunn Bible-ant sangonk naslem. Punn amchea disamnim sonvsarbhor zaitim zhuzam zatolim ani hea vorvim ‘prithumer xanti’ aschina mhunn sanglolem.—Prokasovnni 6:4.
Bible-ant Daniel pustokant bhasaunni kelʼli ki ‘xevottachea disamnim’ don bollixtt razvottkeo eka-meka voir odhikar melloun gheunk zhuztoleo. Oxem korunk tim apli vhoddli soin uzar kortolim ani “bhanddaram” mhunnche bhorpur poixe moddttolim.—Daniel 11:40, 42, 43.
Sogleant vhoddlem zhuz zaunchem asa
Sonvsarachi poristhiti bori zaunchea bodlek anik bigoddttoli mhunn sanglolem. “Sonvsarachea survatek thaun atam poriant ieunk na . . . toslem vhodd sonkoxtt ietolem” mhunn Jezun sanglolem. (Matev 24:21) Ani ‘vhodd sonkoxttacho’ xevott Armageddon mhunnttlolea zhuzant zatolo. Ani hea zhuzak, ‘Sorvxoktivont Devachea vhoddlea disachem zhuz’ oxem mhunnttlam.—Prokasovnni 16:14, 16.
Armageddon hea zhuza udexim Dev munxancho nas korcho na, punn tankam salvar kortolo. Hea zhuza vorvim Dev munxancheo razvottkeo kaddun uddoitolo, zankam lagon aiz itlim zhuzam zatat. Armageddon zhuza udexim sodanch urta tosli xanti koxi ietoli tem zannam zaunk he lekh vachat: