Amcher Dukh-tras ani Moronn Kiteak Ieta?

Sonvsarantlea Poilea Dadleak ani Bailek Lagon

“Eka monxa udexim patok hea sonvsarant bhitor sorlem ani patka udexim moronn; ani oxem sogllea monxank moronn pavlem.”​—ROMKARANK 5:12.

Devan Adanv ani Evek mhunnche poilo dadlo ani bailek rochlim tednam tankam poripurnn rochlolim. Hacho orth, tankam bori bolaiki asli. Tim kednanch duent poddchim naslim. Tankam ravonk Devan Eden nanvachi ek bag toiar kelʼli ani tea bagentlea soglea zhaddanchim follam tim khaunk xoktalim. Fokot ekach zhaddachem foll khainakat mhunn tankam sanglolem. Punn tannim Devachi hi adnea moddli ani tea zhaddachem foll khalem. Oxem korop patok aslem. (Utpoti 2:15-17; 3:1-19) Taka lagon, Devan tankam tea bagentlim bhair ghatlim. Uprant tankam zaitea trasancho fuddo korcho poddlo. Fuddem tanchea bhurgeankui dukh-tras sosche poddle. Tim-ui zannttim zalim ani moron gelim. (Utpoti 3:23; 5:5) Ami soglim Adanv ani Evechim bhurgim zalʼlean, ami-i duent poddttat, zannttim zatat ani mortat.

Noxttea Dutank Lagon

“Akʼkho sonvsar Noxtteachea tabeant asa.”​—1 JUANV 5:19.

Hozaramnim vorsam poilim ek Devdut vo ainz Devachea add gelo. Ani oxem kelʼlean to Devacho dusman zaunk pavlo. Hea noxttea dutak, Soitan mhunnttla. (Juanv 8:44; Prokasovnni 12:9) Tea uprant, anik thoddea dutamnim Soitanak sangat dilo ani te Devachea add gele. Ani aiz he noxtte dut zaitea lokank vaitt kamam korunk uksaitat. (Stotr 106:35-38; 1 Timotak 4:1) Soitan ani noxtte dut lokank zaite tras ditat ani lok dukh-tras sostat tem polloun te khuxal zatat.

Amchea Chukinchea Nirnnoi-ak Lagon

“Ami vomptanv tench ami lunvtoleanv.”​—GALASIEKARANK 6:7.

Adanv ani Evechea patkak lagon ani toxench ho sonvsar Soitanachea tabeant asa dekhun, amcher aiz veg-veglle tras ietat. Punn amcher ailʼlea thoddea trasank lagon ami svota zobabdar asat. Tem koxem? Thoddea pavtti ami vaitt kamam kortat vo chukicho nirnnoi ghetat. Ani uprant amkam tacho porinnam bhogcho poddtta. Udharonnak, ek munis mhenotin ani promannikponnan kam korta ani aplea familicho bore toren samball korta zalear, tachi famil khuxal astoli. Punn to zugar kelltta, bebdikai korta ani allxi asa zalear tachi famil rinnant poddttoli ani tache dukh-tras vaddttole. Tor, ami amchea Rochnnar Devachem margdorxon apnnaitat zalear tacho porinnam boro zatolo, ani amkam “vhodd xanti” mellttoli.—Stotr 119:165.

Ami “Nimannea Disamnim” Jietat Taka Lagon

“Nimannea disamnim . . .  Monxam zatolim aplem dhean-mon apnnancheruch dovortat toslim, girestkaieche axechim, . . . avoibapaichem aikonant toslim, . . . kamchari, nixttur, sogllea boreponnacher virudh.”​—2 TIMOTAK 3:1-5.

Nimannea disamnim lokancho sobhav koso astolo, hem Povitr Pustokant poilench sanglolem. Toxench, zhuzam zatolim, jevnna-khannachem unnemponn astolem, vhoddle-vhoddle bhuikamp zatole, ani duensam pasun posortolim mhunn sanglolem. Aiz oxench ghoddtta mhunn ami polloitat. (Matev 24:3, 7, 8; Lukas 21:10, 11) Taka lagon, zaitea lokank dukh-tras sosche poddleat ani zaiteaancho jiv pasun gela.