Dev Amkam Boro Fuddar Ditolo Mhunn Ami Kiteak Khatri Dovrunk Zata?

Dev Vaitt Lokancho Nas Kortolo

“Tonna vori noxtte monis matlear matum, papi soglle rosroslear rosrosum! Sasnnak tanchem ghorttann zatolench.”​—STOTR 92:7.

Nimannea disamnim lok vaitt kamam kortole mhunn Povitr Pustokant poilinch boroilolem. (2 Timotak 3:1-5) Ani aiz oxench ghoddtta mhunn ami fattlea lekhant polloilʼlem. Punn beginuch Dev soglea vaitt lokank kabar kortolo. Tea uprant, fokot bore lok mhunnche Devachi adnea mantat tosle lok hea prithumer urtole. Povitr Pustokant boroilam, “Des zatolo borea monxanchem daiz: thoim tim tthikann kortolim sasnnachea sasnnak!”​—Stotr 37:29.

Dev Soitanacho Nas Kortolo

“Xanti dita to Dev Soitanak veginch . . . mostitolo.”​—ROMKARANK 16:20.

Beginuch Dev Soitanak, noxttea dutank, ani vaitt lokank kaddun uddoitolo. Ani tea uprant, hea prithumer xanti astoli. “Konn konnak tras diuncho na” ani koslich bhirant aschina mhunn Dev amkam khatri dita.​—Mika 4:4.

Dev Duens ani Moronn Kaddun Uddoitolo

“Tanchea dolleantlim sogllim dukam [Dev] pusun kaddtolo; moronn anink aschem na, dukh anink korchim nant, rudon somptolem, koxtt-ui anink asche nant.”​—PROKASOVNNI 21:4.

Aiz ami Soitanak lagon, Adanv ani Evek lagon, ani amchea chukink lagon dukh-tras sostat. Punn Dev beginuch he dukh-tras sasnak kaddun uddoitolo. Tednam “moronn anink aschem na” ani konnuch duent poddcho na. Je lok Devachi adnea pallttat ani tachi bhokti kortat te sasnak jietole. Punn te khoim jietole?

Dev Hi Prithum Sobit Bag Kortolo

“Oronnem ani suki-korddi zomin khuxal zaum, padd zomin sontosum ani sallkamnim fulon ieum.”​—IZAIAS 35:1.

Devan vaitt lokancho nas kelea uprant, hi prithum nitoll ani eka sobit bage sarki zatoli. Thoim bhorpur jevonn-khann astolem. (Stotr 72:16) Doria, nodi, ani tollim ekdom nitoll astolim ani tantuntlim nustim produxonnak lagon morchim nant. Prithumer eka tempar produxonn aslem mhunn konnak ugddas pasun ieuncho na! Toxench, lok ap-aplim ghoram bandtolo ani tantunt ravtolo. Tea bhair, konnuch upaxi vo gorib ascho na.​—Izaias 65:21, 22.

Dev Meleant Tankam Jivont Kortolo

“Punorjivontponn astolem.”​—ITIHAS 24:15.

Amchim mogachim moron geleant tim amkam porot kednam-i mellttolim kai? Hem aikon tumi ojap zatolim. Dev beginuch hi prithum sobit bag korta tednam melʼleank porot jivont kortolo. Tednam tumi tankam vollkhotolim ani tim-ui tumkam vollkhotolim. Chitat, to vell kitlo khuxalkaiecho astolo! Dev oxem kortolo mhunn ami purnn khatri dovrunk zata karonn Devan adim thoddea munxank punorjivont kelʼlim. Tantunt thoddim bhurgim pasun aslim. Devachea podven Jezun pasun thoddeank punorjivont kelim ani tem-ui lokanchea hujir. Porot jivont zalʼlea hea munxank mellon tanchim ghorchim khub khuxal zalim.​—Lukas 8:49-56; Juanv 11:11-14, 38-44.