DUKH-TRASAN BHORLOLEA SONVSARANT

2 | Poixe Chintun Uzar Korat

HEM KITEAK MHOTVACHEM?

Zaitea lokank aplea dor disacheo gorzo purnn korunk vavr korcho poddtta. Ani sonvsarantli poristhiti vait zait voita dekhun hem anikui kotthin zaunk xokta. Kiteak?

Mhargai vaddtta, zoxem jevnnam-khannacheo vostu mharog zatat ani ghorachem bhaddem vaddtta.
Kam mellona, vo unnea pagaran kam korchem poddtta.
Buddtti vo bhuimkampak lagon ghoram moddttat, kam-dhondo bond poddtta ani taka lagon goribi vaddtta.

Ami Kitem Ugddas Dovrunk Zai?

Tumi poixe sarke toren vapurle ani chintun khorch kelo zalear, kotthin vellar tumi unnea poixeamnim pasun tumchem ghor cholounk xoktolim.
Poixe asat zalear apunn kitem-i korunk xokta oxem chintchem nhoi. Aiz tumchea lagim poixe ani girestkai asa zalear faleam-i ti tumchea lagim astoli, oxem na.
Poixe aslear soglench viktem gheunk zaina, zoxem khuxalkai ani familicho mog.

Ami Atam Kitem Korunk Zata?

Bible mhunntta: “Amchea lagim khaunk ani nhesonk asa zalear, ami tantuntuch dhadoxi ravom-ia.”—1 Timotak 6:8.

Dhadoxi ravop mhunnttlear, amchea lagim asat tea vostumnim khuxal ravchem, ani anik chodd zai mhunn axa korchi nhoi. Amchea lagim unne poixe astat tednam oxem korop chodd gorjechem.

Xendri polloun paim soddche. Tumi oxem korinant zalear tumchea lagim asa tachea poros chodd tumi khorch kortolim ani tumcheo tras anikui vaddttole.

FUDDO KOSO KORCHO? Thodde Solʼle

Trasanchea vellar, poixe chintun uzar korunk him panvlam gheiat

KHORCH UNNO KORAT

Khorch Unno Korat

Tumkam khorench goroz asa tednanch, fon, kopdde, vo dusreo vostu vikteo gheiat. Khoinchi-i vhoddli vost, zoxi gaddi vikti gheunchea poilim, tachi tumkam khorench goroz asa kai na tem chintat. Bhaji vikti gheunchea bodlek, tumchea ghorach bhaji rovunk zata zalear polloiat.
Khoinchi-i vost vikti gheunchea poilim, tumi svotakuch vicharat: ‘Hea vostuchi mhaka khorench goroz asa kai? Hi vost vikti gheunk mhojea lagim poixe asat kai?’
Sorkar vo dusre khoinche-i songotton koslea-i torechi modot dita zalear ti gheunk fattim soronakat.

Jaden mhunntta: “Ami amcho khorch koso unno korunk zata, hea vixim amchea familintlim soglim mellon uloilim. Ami monoronjona pasot ani bhonvpak je poixe moddttalim te unne kele. Toxench, mharog asloleo khauncheo vostu gheupacheo unneo keleo.”

BUDGET KORAT

Budget Korat

Bible mhunntta: “Mhenot gheun vavr korpiacheo ievzonno soglleo follabhorit; uttavollaien vavurtoleacho sogllo vavr nirfoll.” (Mhonnʼnneo 21:5) Tumi budget kelear, zhoddttat tachea poros chodd khorch korina zaunk tumi dhean diunk pavtolim. Budget korunk:

Poilim, tumi eka mhoineak kitlem zhoddttat tem boroiat.
Uprant, jevnnacho, laittichea bilacho, ani bhaddem farik korunk kitlo khorch ieta tem boroiat. Toxench, dusre khorch pasun boroiat.
Tea uprant, tumi zhoddttat tantuntlean tumcho khorch bhagta kai na tem polloiat. Na zalear, jeo vostu titleo gorjecheo nant teo vikteo ghevop unneo korat vo bond korat.

Carlos mhunntta: “Dor mhoineak ami kitle zhoddle ani kitle moddle tem hanv ani mhoji bail boroun dovortat. Ani gorjechea vellar moddunk ami thodde poixe samballun dovortat. Toxench, fuddarak koslo-i vhoddlo khorch korunk poddttolo mhunn kolltta tednam ami thodde-thodde poixe ektthaim korun dovortat. Hea toren, uprant amkam chodd usko zaina.”

RINN GHENAKAT ANI POIXE SAMBALLAT

Rinn Ghenakat Ani Poixe Samballat

Tumi tumchem rinn koxem farik kortolim tea vixim chintat. Zata zalear, rinn ghenakat. Tumkam kitem-i viktem gheunk zai zalear, poilinch thodde-thodde poixe ektthaim korat.
Dor mhoineak, thodde poixe samballun dovorpacho proitn korat. Oxem kelʼlean, fuddem korunk poddttolea vhoddlea khorchak lagon, vo okosmat kosli-i goroz poddli zalear tumchea lagim char poixe astole.

VAVR KORAT ANI TUMCHI SIRVIS SAMBALLAT

Bible mhunntta: “Mottea koxttanchea vaurak sodanch faido zata.”—Mhonnʼnneo 14:23.

Vavr Korat, Tumchi Sirvis Samballat

Tumchea kamam vixim borem chintat. Tumkam avoddtta toslem kam na zalear pasun tumi kortat tea kama udexim tumchea jevnna-khannacho khorch bhagta mhunn ugddas dovrat.
Vavr korpi ani patieupa sarkim munxam zauncho proitn korat. Oxem kelʼlean, tumchem kam voichem na vo tumchem kam gelear pasun tumkam dusrem kam mellonk sompem zatolem .

Dmitriy mhunntta: “Mhaka jem kam melltta tem hanv kortam, tem mhojem avddichem asum vo nasum. Tantunt mhaka unno pagar mellʼllear pasun hanv tem kam kortam. Hanv tem khub mhenotin ani promannikponnan kortam. Dusream pasot hanv hem kam kortam zalear pasun tem svota pasot kortam, oxem hanv chintʼtam.”

Tumi kam sodhtat zalear . . .

Svota panvl gheiat. Veg-vegllea company-n kamak lagon advertisement ghalunk na zalear pasun, tumi tankam call korunk zata. Tumi kam sodhtat mhunn tumchea ghorcheank ani ixttank pasun sangonk zata.
Koslem-i kam korunk toiar ravat, karonn avoddtta tosli sirvis mellonk kotthin asa.