8
Israel Porza Kanaan Desant Bhitor Sorta
Kanaan des tabeant gheunk Joshua fuddakar gheta. Aplea lokak Zulumantlean soddovunk Jehovah fuddareank boll dita
ISRAEL lok Kanaan desant bhitor sorchea zaitea xekddeam adim, Jehovahn ho des Abrahamachea sonsotik diunk bhasailʼlo. Atam Joshuachea mukhel ponna khala Israel lok bhasailʼlo des tabeant gheunk toear asle.
Kanaan ganvchea lokak nisonttonn favo mhonn Devan monxubi keli. Ekdom mhellea pozddea kamanim ani kakuti vinnem rogot varovun tannim ganv bhorlolo. Tea pasot Israel lokanim jikonn ghetlelim Kanaan xaram sarkim nas korunk zai aslim.
Tea desant bhitor sorchea adim, Joshuan dog zann bhedi dhaddle, te Jeriko xarant Rahab nanvanchea eke ostoreger ravle. Te Israeli mhunn zanna zavunui tinnem tankam aplea ghorant ghetle ani tanchi rakhon keli. Israelachea Devacher Rahabak bhavart aslo kiteak tinnem Jehovahn aplea lokak vanchounk kelʼlim kortubam aikolʼlim. Jeriko xarachea nisonttonna vellar, tika ani tichea ghoraneak samball kortele mhonn tinnem tea bheddeam lagim soput ghetlo.
Uprant jedna Israel lok Kanaan desant bhitor sorle ani Jerikechea add aile, tedna Jehovan ochorianim Jerikechim kottam kosllun udoilim. Joshuachi fouz nettan bhitor geli ani xarachem nisontton kelem, punn tannim Rahab ani tichem kuttumb rakhlem. Uprant fuddlea sov vorsant Joshuan foujecho upeog korun bhasailʼlea desache motte zage tabeant ghetle. Uprant to des Israelachea kullienk vanttun dilo.
Aplea lamb Dev sevechea xevottak Joshua sogllea lokak ektthaim apoita. Ani Jehovah tanchea purvonzam lagim koso vaglo to tacho ugddas korun tankam Jehovahchi seva korunk urbha dita. Joshua ani tache lagimche sangati melea uprant, Israel lok Jehovhk soddun khottea devank bhozunk lagle. Sumar 300 vorsam, hea raxttran Jehovahcheo adnia thirponnan samballunk na. Tea kallar Jehovahn tanchea dusmanank zoxe Filistin, Israel lokancher zulum korunk soddun dile. Punn jedna Israel porjen adar magonk ulo kelo tedna tankam salvar korunk 12 fuddari tannem nemle.
Fuddariancho kall, Fuddari pustokant dilʼlo asa, survatecho fuddari Othniel ani nimanno Samson zo ek sonvsaracher jielʼlea soglleam poros bollixtt monis zavun aslolo. Bibleantlem Fuddari pustok ek thorthoraita toslo itihas ani ek buniadi sot portun portun amkam dakoita ki Jehovahchi adnia pallʼlear besavam melltat ani pallʼll naslear koxtt ietat.
—Joshua; Fuddari; Levi-Xastr 18:24, 25 hacher adarlelem asa.