Rahab Bhediank Lipoita

Izraelitkaranche don bhedi Jeriko xarant vochon Rahab mhunnttlolea bailechea ghorant ravtat. Jednam Jeriko-chea razak hi khobor kolltta, to aplea soinikank Rahaba lagim dhaddtta. Rahab tea don bhediank aplea ghorachea teresar lipoita ani soinikank dusrea vatten dhaddtta. Ti tea bhediank sangta: ‘Hanv tumkam modot kortolem, karonn hanv zannam ki Jehova tumchea vatten asa dekhun tumi ho des jikhon ghetole. Please mhaka promise korat ki tumi mhojea familik salvar kortole.’

Bhediamnim Rahabak sanglem: ‘Tujea ghorantlea konnakuch kainch zaunchem na mhunn ami promise kortat.’ Ani tannim mhunnttlem: ‘Tujea zonela bhair ek tambddi dori band ani tuje familik kainch zaunchem na.’

Rahab aplea zonelak dori bandun, tea bhediank thoinchean pollon vochonk modot korta. Te tin dis porian dongrar lipon ravtat ani tea uprant vochon Joshuak mellttat. Magir Izraelitkaramnim Jordan nodi par keli ani tim Kanan desacher zoit vhoronk toiari korunk laglim. Sogleam-von poilim tannim Jeriko xar jikhon ghetlem. Koxem tem tum zannam? Sov dis porian tea akʼkhea xara bhonvtonnim, dor-disak ek round marat mhunn Jehovan tankam sanglem! Satvea disak, te xara bhonvtonnim sat round martat. Tea uprant, iadnikamnim apli turturi vazoili ani soinikamnim zata titlea vhoddlean bob marli. Tednam xaracheo vontteo kosllon sokol poddonk lagleo. Punn Rahab-achem ghor, jem tea xarachea vontticher aslem taka kainch zaunk na. Rahaban Jehovacher visvas dovorlo dekhun, ticho ani tichea familicho jiv salvar zalo.