ODHEAI 10
Devak Manvota Tosli Bhokti Tumchean Koxi Vollkhum Ieta?
1. Ekuch khoro dhorm asa kai?
“Fottkirea provadiam vixim chotraien ravat.”—MATEV 7:15.
Jezun aplea pattlavdarank fokot ek khoro dhorm xinkoilo. To dhorm amkam sasnachea jivitak pavoita tosli ek vatt zaun asa. Jezun mhunnttlem: “Bhov thoddeank” ti vatt melltta. (Matev 7:14) Bible-antlea sota pormonnem asa, tich bhokti Dev manun gheta. Khori bhokti kortat tancho bhavart ek dekhun tim sogllim ekvottan jietat.—Juanv 4:23, 24; 14:6; Efezkarank 4:4, 5 vachat.
Soglea Torechi Bhokti Dev manun Gheta Kai? ho viddeo polloiat
2. Jezun aplea pattlavdarank kitem xiddkaunni dili?
“Apunn Devak vollkhotat mhunn sangtat, punn aplea kortubamnim taka vollkhonant mhunn dakhoitat.”—TITAK 1:16.
Aplea pattlavdaram modem thodde khotte munis uprasun, khotti xinkoun xinkoitole mhunn Jezun xiddkailʼlem. Bhailean te khore bhokt koxe distat. Te apunn Jezucho pattlav kortat mhunn sangtat. Punn khoreaninch te tacho pattlav korinant mhunn tumkam kollttolem. Koxem? Fokot khori bhokti kortat tanche sovem, bore gunn ani boro sobhav disun ieta.—Matev 7:13-23 vachat.
3. Khori bhokti kortoleank tumi koxim vollkhotolim?
Khori bhokti kortoleank vollkhun gheunk, panch nixanneo ami polloum-ia:
Khori bhokti kortat te, Bible, Devachem Utor mhunn manun ghetat. Bible-achea nem-kaideam pormonnem jieunk te vavurtat. Dekhun munxanchi xinkounn xinkoitat tea dhorma thaun, khoro dhorm vegllo asa. (Matev 15:7-9) Khori bhokti kortat te, herank xinkoitat tech xinkounne pormonnem apunn-ui jietat. —Juanv 17:17; 2 Timotak 3:16, 17 vachat.
Devachem nanv, Jehova mhunn te man ditat. Jezun Devachem nanv lokank kolloun, tea nanvak man dilo. Devachi vollokh gheunk tannem lokank adar dilo, ani Devachem nanv povitr zaunk magat mhunn tankam xinkoilim. (Matev 6:9) Tumi ravtat thoim, khoincho dhorm Devachem nanv kolloita?—Itihas 2:21, Stotram 148:5 vachat.
Devachem Raj te porgottʼttat. Aplea Rajeachi bori khobor porgottunk Devan, Jezuk hea sonvsarant dhaddlo. Fokot Devachem Raj munxakulla-vele soglle koxtt kaddun uddoitolem. Apunn moro porian tea Rajeachi khobor Jezu sangot ravlo. (Lukas 4:43; 8:1; 23:42, 43) Aple xis tea Rajea vixim porgottʼttole mhunn Jezun sanglolem. Devachea Rajea vixim ulounk tuje lagim konnui ailo zalear, to khoinchea dhormancho astolo?—Matev 24:14 vachat.
Hea khottea sonvsarant te bhag ghenant. Rajkoronnant vo somajik kestanvamnim te vantto ghenant, tache velean tumi tankam vollkhunk zata. (Juanv 17:16; 18:36) Tea bhair, sonvsarantlim vaitt kortubam ani sovoim-io te apnnainant.—Jakob 4:4 vachat.
Te eka-mekacho khoro mog kortat. Sogllea raxttranchea ani zatinchea lokank man diunk zai mhunn te Devachea Utrantlean xinktat. Zaite pavtt khottea dhormancho lok raxttranchea zhuzant vantto ghetat, punn khori bhokti kortat te, kosle-i zhuzant bhag gheunk nakartat. (Mika 4:1-3) Punn tache bodlek, te aplo vell, poixe ani her vostum vorvim herank urbha ani adar diunk vavurtat.—Juanv 13:34, 35; 1 Juanv 4:20 vachat.
4. Khoro dhorm tumkam vollkhunk melltta kai?
Khoincho dhorm Devachea Utra pormonnem xinkounn dita, Devachea nanvak man dita, ani fokot Devachem Raj munxakullache soglle koxtt suttave kortolem mhunn porgottʼtta? Khoinchea zomeacho lok mog dakhoitat ani zhuzam thaun pois ravtat? Tumkam kitem dista?—1 Juanv 3:10-12 vachat.