Sogllea Dhormanchem Kitem Zatolem?

1. Soglle dhorm sarke asat kai?

Sogllea dhormanim khaltea monache lok asat. Dev toslea lokank polloita ani tanchi kallji gheta, hi amkam ek bori khobor nhoi! Punn dhormanchea nanvan zaiteo vaitt vostu ghoddtat tem polloun amkam khont bhogta. (2 Korintkarank 4:3, 4; 11:13-15) Atonkvadh, zhuzam, zatim-katim modem kestanvam ani lhan bhurgeam lagim pozodponn korop, oslea vostumni-i khotte dhorm mellon asat mhunn khobram-potram dakhoitat. Devacher bhavart dovortat toslea khaltea monachea lokank hea karonnank lagun kitli khont bhogta nhoi!​—Matev 24:3-5, 11, 12 vachat.

Khoro dhorm Devak mhoima dita, punn dusre vatten, khotte dhorm Devak manvona tem kortat. Khotte dhormancheo xinkounneo Bible-a pormonnem nant, zoxem Deva vixim ani melʼleam vixim fottkiri xinkounn. Punn Aplea vixim sot, lokanim vollkhun ghetlolem Jehovak zai.​—Ezekiel 18:4; 1 Timotak 2:3-5 vachat.

2. Sogllea dhormanchem kitem zatolem?

Devacho mog kortat mhunn sangtat punn khoreaninch soitanachea sonvsarachea mogan asat, te dhorm Devak fottounk xokonant mhunn amkam khuxi bhogta. (Jakob 4:4) Devachem Utor sogllea khottea dhormank ‘Vorixtt Babilon’ mhunntta. Noechea bhuddte uprant, Babilon mhunnttolea eka adlea xarant khottea dhormanchi survat zalʼli. Munxakullak fosoun, khotteo chali-riti pallunk laitat toslea dhormancho, Dev veginnuch nas kortolo.​—Prokasovnni 17:1, 2, 5, 16, 17; 18:8 vachat.

Akʼkhea sonvsaracher, khottea dhormanim ximpddon asat tea khaltea monachea lokank, Dev visrunk nam. To toslea lokank sot xinkoun, khottea dhormantlim bhair sorunk adar dita.​—Mika 4:2, 5 vachat.

3. Khaltea monachea lokanim kitem korunk zai?

Zo lok sot xinkun borem korunk sodta, toslea lokanchi Jehova kallji gheta. Khotto dhorm soddun diunk to tanche lagim vinoti korta. Devacho mog kortat te lok ap-khuxen aplem patki jivit soddun, Taka manvota te porim jieunk fuddem sortat.​—Prokasovnni 18:4 vachat.

Poilea xekddeant, khaltea monachea lokanim, jedna Jezuchea pattlavdaram koddlean Bible-achi xinkounn aikoli, tannim ti khuxen manun ghetli. Jivitak udhex ani bhorvonso dita tosli novi ani khuxalkaiechi vatt, te Jehova thaun xinkle. Bible-achi xinkounn apnnaun ani Jehovak aplea jivitant poilem sthan diun, tannim amkam ek bori dekh dovorlea.​—1 Tesalonikekarank 1:8, 9; 2:13 vachat.

Khotto dhorm soddun ietat tea lokank, Jehova aplea ghorabeant bhokti kortoleam sangata mellon ieunk ieukar dita. Jehovachea apounneak tumi kan di-it zalear, tumkam tache ixtt zaunk mellttolem, tachea novea ani mogan bhorlolea ghorabeache tumi bhagidar zatole, ani sasnachem jivit tumkam mellttolem.​—Marku 10:29, 30; 2 Korintkarank 6:17, 18 vachat.

4. Sogllea desantlea lokank Dev koxe porim khuxalkai haddtolo?

Khottea dhormancho nas zatolo, hi ek bori khobor zaun asa. Sonvsaracher jietolea lokank khottea dhormanchea zuluma thaun suttka mellttoli. Hea fuddem, khotto dhorm munxank kednanch fosouncho nam, nhoi mhunn futti-i ghalcho nam. Tedna jietole soglle lok ekvottan ekleach khorea Devachi bhokti kortole.​—Prokasovnni 18:20, 21; 21:3, 4 vachat.