Oddchonneo Koxeo Suttaveo Korcheo

Tum ani tuzo sangati kazari jivitachi survat kortat tednam zaiteo oddchonneo ietoleo. Tumchem chintop, bhavnam ani kam korpachi rit veglli asa dekhun oddchonneo ieunk xoktat. Thodde pavtt, kuttumba bhair thaun pasun oddchonneo ieunk puro vo okosmat tumi chintunk na tem ghoddonk xokta.

Oddchonneam vixim ulounk kotthin zata hem khorem, punn ami teo suttaveo korunk zai mhunn Bible amkam sangta. (Matev 5:23, 24) Bible-antlim totvam lagu kelʼlean teo oddchonneo suttaveo korunk tumkam modot zatoli.

1 TUMCHEA ODDCHONNEAM VIXIM ULOIAT

BIBLE KITEM SANGTA: “Dor eke vostuk ek vell” asa. (Upodexok 3:1, 7) Ulounk pasun ek vell asa. Tor, tumchea oddchonne vixim ulounk vell kaddat. Eka vixoi-acher tumkam koxem bhogta ani tea vixim tumi kitem chintʼtat tem tumchea sangateak kolloiat. Tumchea sangatea lagim sodam “sot tench uloiat.” (Efezkarank 4:25) Tumchea bhavnancher tabo dovrunk kotthin zata tednam pasun zhogddim korinakat. Xant ravon zobab ditat tednam zhogddem vaddonk pavona.—Mhonnʼnneo 15:4; 26:20.

Ek vixoi-acher tumchem chintop vegllem asa zalear pasun movall utramnim zap diat ani tumchea kazari sangateak sodanch mog ani resped dakhoiat. (Koloskarank 4:6) Zata titlea begin oddchonneo suttaveo korunk vavrat. Eka-meka lagim uloinastana ravom nakat.—Efezkarank 4:26.

TUMI KITEM KORUNK ZATA:

• Oddchonneam vixim ulounk ek vell tharaiat

• Tuzo kazari sangati uloita tednam modench uloinaka. Tuka ulounk sondhi mellttoli

2 AIKAT ANI SOMZON GHEIAT

BIBLE KITEM SANGTA: “Moipasan ekamekachi opurbai korun dakhoiat; apnnam poros chodd dusreank man diat.” (Romkarank 12:10) Tumi eka-mekachem koxem aikotat tem khub mhotvachem. Tumchea kazari sangateachem chintop somzonk proitn korat. Bible sangta, tanchem “sukh-dukh tumchem korat . . . ani khaltea kallzachim zaiat.” (1 Pedru 3:8; Jakob 1:19) Tuzo ghov vo bail uloitana aikolʼlea bhaxen korinaka, punn dhean diun aik. Ghoddtta zalear, tujem kam bond korun tujea sangateak purnn dhean di vo uprant ulounk zata zalear taka vichar. Tumcho sangati tumcho dusman nhoi punn ek ixtt mhunn chintat. Tednam tumi “sompeponnim ragar” zaunchimnant.—Upodexok 7:9.

TUMI KITEM KORUNK ZATA:

• Tumcho kazari sangati sangta tem tumkam avoddna zalear pasun uktea monan tachem aikat

• Fokot utrancher dhean dium nakat, punn tacho hav-bhav polloiat. Toxench, to vo tem kitem sangonk sodhta tem somzonk proitn korat

3 TUMI THARAILAM TEA PORMONNEM VAVR KORAT

BIBLE KITEM SANGTA: “Koxttanchea vaurak sodanch faido zata, bekar ulovpeak sodanch unnem zata.” (Mhonnʼnneo 14:23) Ek boro tharav ghetlearuch puro nhoi. Punn tumi jem tharailam, tea pormonnem kam korunk zai. Oxem korunk ghoddie tumkam khub vavr ani mhenot korunk poddot punn tumi toxem korop faideachem zaun asa. (Mhonnʼnneo 10:4) Sangata mellon kam kortat tednam tumcho koxtti vavr “folladik” zatolo.—Upodexok 4:9.

TUMI KITEM KORUNK ZATA:

• Tumcheo oddchonneo suttaveo korunk tumi koslim pavlam ghetolim tem tharaiat

• Tumchea modleo oddchonneo suttaveo korunk tumi koxi sudharnni kelea tem vella-vellar polloiat