Ghorcheam Lagim Xanti Koxi Samballchi

Kazara uprant ek novea kuttumbachi survat zata. Tumi tumchea avoi-bapaik sodanch mog ani resped dakhoitolim hem khorem, punn atam tumchea jivitant tanchea poros tumcho kazari sangati chodd mhotvacho zata. Ani hem manun gheunk tumchea thoddea ghorcheank kotthin zaunk xokta. Punn Bible-achim totvam apnnailʼlean, ghorcheam sangata xanti samballunk ani tumchem novem kazari jivit ghott korunk tumkam modot zatoli.

1 GHORCHEAM VIXIM SARKEM CHINTOP DOVRAT

BIBLE KITEM SANGTA: “Tujea avoibapaik man di.” (Efezkarank 6:2) Tumi piraien kitlim-i vhodd zaum, tumi sodanch tumchea avoi-bapaik man ani resped diunk zai. Tumcho sangati konnacho tori put vo dhuv zaun asa, ani tannem aplea avoi-bapaik pasun vell diunk zai mhunn ugddas dovrat. “Pritimogak nattkai na.” Tor, tujea sangateacho tachea ghorcheam lagim boro sombond asa zalear tujea pasot tacho mog unno zatolo mhunn tunvem uskeunchi goroz na.—1 Korintkarank 13:4; Galasiekarank 5:26.

TUMI KITEM KORUNK ZATA:

• “Tuzo kuttumb mhaka sodanch unnea nodren lekhta” vo “Hanv kortam tem tujea avoik kednanch avoddna” oxem vaddoun-choddoun sangonakat

• Tumchea sangatean umkench pavl kiteak ghetlam tem somzonk proitn korat

2 GOROZ TEDNAM THIR RAVAT

BIBLE KITEM SANGTA: “Dadlo aplea avoibapaik soddta ani eke bailek ektthovta ani tim dogam-i zonnam ekuch kudd zatat.” (Utpoti 2:24) Tumi kazar zalea uprant, tumchea avoi-bapaik disot, ki tannim azun pasun tumchi kallji gheunk zai. Taka lagon tim tumchea kazari jivitant gorje bhair modem poddonk xoktat.

Tumchea kazari jivitant tannim kitlem modem poddonk zata tem tumi dogaimnim tharaun tankam mogan, ukteponnim ani spoxtt ritin sangonk zai. Punn oxem kortana ragar zainakat. (Mhonnʼnneo 15:1) Khaltikai, dulobai ani pasiens dakhoilear tumi tumchea ghorcheam lagim boro sombond dovrunk ani ‘ekamekak mog’ dakhounk pavtolim.—Efezkarank 4:2.

TUMI KITEM KORUNK ZATA:

• Tumchim ghorchim goroz nastana tumchea kazari jivitant modem poddttat zalear poristhiti xant astana tumchea sangatea lagim hea vixim uloiat

• Hea vixim kitem kortolim tem tumi dogaim mellon tharaiat