Buddtte Thaun Atth Lokancho Jiv Salvar Zalo

Noah, tachi famil, ani zonvaram bottint bhitor sorlim. Jehovanuch bottichem dar bond kelem ani paus poddonk suru zalo. Itlo paus poddlo ki bott udkacher ubonk lagli. Sovkas-sovkas korun, akʼkhi prithum udkant buddli. Botti bhair aslolo soglo vaitt lok moronn gelo. Punn Noah ani tachi famil bottint bhitor aslolean salvar zalim. Tannim Jehova Devachem aikolem mhunn tim kitlim khuxal zalim astolim nhoi!

40 dis ani 40 rati paus poddlo ani tea uprant paus thamblo. Sovkas-sovkas korun udok unnem zait gelem ani bott dongracher ieun ravli. Punn azunui sogleak zaitem udok aslem. Dekhun Noah-k ani tache familik bottintli bhair ieunk mellonk na.

Thoddem-thoddem korun soglem udok sukhot gelem. Noah ani tachi famil sumar ek voros botti bhitoruch urli. Uprant, Jehovan tankam bottintlim bhair ieunk zata mhunn sanglem. Apnnak salvar kelim mhunn tim Jehovachim khub upkari aslim. Ani haka lagon tannim Jehovak ek bolidan dilem.

Tannim dilʼlea bolidanak lagon Jehova khuxal zalo. Buddtti dhaddun akʼkho sonvsar apunn anik kednanch nas korchona mhunn Jehovan tankam bhas dili. Hea pasot Jehovan tankam ek khunna dili. Ti mhunnttlear, rainbow, zo mollbar poilech pavtt dislo. Tunvem kednam-i rainbow polloila?

Uprant Jehovan, Noah-k ani tache familik sanglem ki akʼkhi prithum tumchea bhurgeamnim bhorat.