Tankam Ek Put Zolmota!

Abraham ani Sarak kazar zaun khub vorsam zalʼlim. Ur ganvant apli girestkai ani susegad jivit soddun tim tombumnim ravonk laglim. Tori astana, Sara bejar zaunk na. Karonn tika Jehovacher visvas aslo.

Apleak ek bhurgem zaunchem mhunn Sarak khub khuxi asli. Dekhun tinnem Abrahamak sanglem: ‘Mhoje chakornik, Hagar-ak ek bhurgem zait zalear, taka hanv mhojench bhurgem koxem polloitolim.’ Uprant, Hagar-ak ek put zolmota. Tachem nanv Ishmael.

Abraham 99 vorsancho ani Sara 89 vorsanchi asli tednam, tankam konn tori mellonk ietat. Tankam konn mellonk ietat tem tum zannam? Te tin devdut asle! Abraham tankam eka zhadda ponda bos mhunn sangta ani tankam jevonn dita. Te Abraham-ak sangtat: ‘Fuddlea vorsa heach vellar, Sarak, tuje bailek, ek put zolmotolo.’ Sara tombu bhitor ravon hem aikotali. Ti hansli ani tinnem apleach bhitor chintlem: ‘Hea zanntte piraier mhaka bhurgim zaunk xoktat?’

Punn Jehovachea devdutan sanglolem toxench, fuddlea vorsak Sarak ek put zolmota. Abraham tachem nanv Izak mhunn dovorta, zacho orth “Hanso.”

Izak sumar panch vorsancho astana, Saran polloilem ki Ishmael, Izak-achim fokannam korta. Tor, ti aplea putachi rakhonn korunk sodhtali dekhun, tinnem Hagar ani Ishmael-ak ghora thaun pois dhadd mhunn Abrahamak sanglem. Survatek, Abraham oxem korunk sodhinaslo. Punn Jehova pasun Izak-achi rakhonn korunk sodhtalo dekhun tannem Abrahamak sanglem: ‘Sarachem aik. Karonn tuka dilʼli bhas Izak-a vorvinch purnn zatoli. Ishmael-a vixim tum usko korinaka, taka hanv samballttolom.’