Abraham Ani Saran Jehovachem Aikolem

Babel-a thaun pois Ur nanvachem ek xar aslem, thoinche lok Jehovachi bhokti korinasle. Te dusream devanchi bhokti kortale. Punn thoim ek munis aslo, zo fokot Jehovachich bhokti kortalo. Tachem nanv Abraham.

Jehovan, Abraham-ak sanglem: ‘Tum tujem ghor ani soireank soddun hanv tuka dakhoitam tea desant voch.’ Tea uprant Jehovan taka promise keli: ‘Tuje thaun hanv ek vhoddlem raxttr kortolom, ani tuka lagon hanv prithumechea zaitea lokam pasot borim kamam kortolom.’

Jehova taka khoim dhaddttolo ti Abrahamak khobor nasli, toriastana taka Jehovacher purnn visvas aslo, dekhun tannem tachem aikolem. Abraham, tachi bail Sara, tacho bapui Tera, ani tacho bhavacho put Lot, hannim sogleamnim aplem samon bandlem ani Jehovan sanglolem toxem lamb provas korunk tim bhair sorlim.

Jehova dakhoita tea desant Abraham ani tachi famil pavli tednam Abraham 75 vorsancho aslo. Tea desachem nanv Kanan aslem. Thoim Jehova Dev Abrahamak bhas dita: ‘Ho akʼkho des, tum zo polloita to hanv tujea bhurgeank ditolom.’ Punn Abraham ani Sara zannttim zalʼlim ani tankam ekui bhurgem naslem. Tor Jehovan dilʼli bhas koxi purnn zatoli?