Bhavarthachi Porikxa

Abrahaman Izakak Jehovacho mog korunk ani fuddara vixim tannem jem kitem bhasailam tacher visvas dovrunk xikoilem. Punn Izak sumar 25 vorsancho aslo tednam Jehovan Abrahamak ek khub kotthin kam korunk sanglem. Tem kitem?

Devan Abrahamak sanglem: ‘Tum tujea ekleach putak Izakak, Moria-chea dongrar gheun voch ani thoim taka bolidan mhunn bhettoi.’ Jehovan oxem kiteak sanglem he Abrahamak khobor nasle, torui tannem Jehovachem aikolem.

Dusrea disa sokallim begin utthon Abraham aplo put Izakak ani don sevokank gheun Moriak vochonk bhair sorta. Tin disam uprant taka pois thaun Moria-cho dongor dixtti poddtta. Tednam Abraham aplea sevokank thoinch ravonk sangta. To Izakak lakddam ubarunk laita ani aplea hatant suri gheta. Ani te dogui tea dongrar vochonk lagtat tednam Izak aplea bapaik vicharta: ‘Bolidan bhettounk zonvar khoim asa?’ Abraham taka sangta: ‘Mhojea puta, tem amkam Jehova ditolo.’

Te dongrar pavle tednam tannim ek vedi bandli. Uprant Abrahaman Izakache hat-paim bandle ani taka vedicher ghatlo.

Ani magir, aplea putak marunk Abrahaman suri hatant ghetli, tednanch sorgar thaun Jehovachea eka devdutan taka ulo marun sanglem: ‘Abraham! Tujea putak marum naka! Tuka Devacher bhavarth asa mhunn atam mhaka kollʼllem. Karonn tum aplea putachem bolidan diunk pasun toiar zalo.’ Tednam Abrahaman ek menddro polloilo. Tachim xingam zhaddamnim ghuspololim. Tor tannem rokddench aplea putak soddoilo ani putachem bodlek tea menddreachem bolidan dilem.

Tea disam thaun Jehova Abrahamak aplo ixtt mhunnonk laglo. Kiteak tem tum zannam? Karonn Jehovan jem kitem sanglem tem soglem Abrahaman kelem. Taka somzona zalear pasun tannem Jehovachem aikolem.

Jehovan porot ek pavtt Abrahamak promise keli: ‘Hanv tuka besanv ditolom ani tuka zaitim bhurgim zatolim.’ Hacho orth, Jehova Abrahamachea famili udexim soglea borea lokank besanvam ditolo.