Lotache Bailecho Ugddas Korat

Lot, aplo titiu (uncle) Abrahama sangata Kanan desant ravtalo. Thoddea tempa uprant tanchim zonvaram itlim zalʼlim ki tim ravtalim to zago tankam pavonaslo. Tea pasot, Abrahaman Lotak sanglem: ‘Ami atam borabor ravonk zaunchem na. Tor tuka khoinchea zagear vochon ravonk zai tem tum poilem vinchun kadd ani magir hanv dusrea zagear vochon ravtolom.’ Tor Abrahaman aplea vixim nhoi punn dusream vixim poilem chintlem!

Laginch, Sodom nanvachem ek khub sobit xar aslem. Anik thoim zaitem tonn ani udok aslem. Tor, Lotan to zago vinchun kaddlo ani aplea famili sangata thoim ravonk gelo.

Punn tem xar ani tachea lagim aslolea Gomorra xarache lok khub vaitt asle. Dekhun Jehova Devan tea donui xarancho nas korunk chintlem. Punn to Lotak ani tache familik salvar korunk sodhtalo. Dekhun tannem don devdutank tache lagim dhaddle. Ani tannim tankam mhunnttlem: ‘Beginchea-begin hea xara thaun bhair sorat! Karonn Jehova hea xaracho nas korpacho asa!’

Lot ani tachi famil hea xarantlean bhair soronk khub vell kortalim. Dekhun devdutamnim, Lotak, tache bailek, ani dogaim dhuvanchea hatak dhorun tankam xara bhair pavoilim ani mhunnttlem: ‘Tumcho jiv rakhonk hanga thaun begin dhanvon vochat! Ani fattim vollon polloinakat. Fattim vollon polloilear tumi mortolim!’

Tim Zoar xarant pavtat tednam, Jehova Sodom ani Gomorra xarancher ujeacho ani zollttea fatrancho pavs dhaddun tea xarancho nas korta. Lotache bailen Jehovachem aikonk na. Ti fattim vollon polloita, dekhun ti mittacho khambo zata. Tinnem Jehovachem aikonk na mhunn Lot ani tichea dogaim dhuvank khub dukh zali astoli. Punn tannim Jehovachem aikolem mhunn tim khuxal aslim ani tancho jiv-ui salvar zalo.