Jakobak Daiz Mellʼllem

Izak 40 vorsancho astana Rebeka lagim kazar zalo. To tacho khub mog kortalo. Thodde vella uprant, tankam zonvlle (twins) put zolmole.

Vhoddlea putachem nanv Esau, ani dhakttea putachem nanv Jakob aslem. Esau-ak ghora bhair ravonk avoddttalem ani to ek boro xikari aslo. Punn Jakobak ghorach ravonk avoddttalem.

Tea kallar bapui melea uprant, bhatt-bensacho ani poixeancho choddso vantto, vhoddlea putak mellttalo, zaka daiz mhunnttale. Izakachea familint, Jehovan Abrahamak ji bhas dilʼli ti-ui tea daizant mellon asli. Jehovan ji bhas dilʼli tacho Esau-an valor korunk na, punn Jakobak ti khub valorachi asli.

Ek dis Esau xikar korun ghora ailʼlo. To khub thoklolo. Jakob kitem tori borem randta mhunn tannem polloilem ani taka sanglem: ‘Mhaka bhuk laglea! Ji dal tunvem randlea, tantuntli thoddi mhaka di.’ Jakoban taka sanglem: ‘Punn poilim, tum tujem daiz mhaka ditolo mhunn promise kor.’ Tednam Esau-an sanglem: ‘Hem daiz gheun hanv kitem kortolom! Tem tukach dovor. Mhaka fokot tunvem randlam tem khaunk di.’ Tuka kitem dista, Esau-an jem kelem tem sarkem aslem kai? Na, hem sarkem naslem. Tannem fokot ilʼlem-xea jevnna khatir kitli moladik vost hogddaili nhoi!

Izak khub zanntto zalea uprant, to aplea vhoddlea putak besanv diunk apoita. Punn tem besanv aplea dhakttea putak, Jakobak mellonk Rebeka taka modot korta. Esau-ak jednam hem kolltta, tednam to aplea bhav Jakobacher khub ragar zata ani taka jivexim marunk sodhta. Punn Izak ani Rebeka Jakobachi rakhonn korunk sodhtalim, dekhun tim Jakobak sangtat: ‘Tujea bhavacho rag unno zaisor vochon tujea mama Laban-ager rav.’ Jakoban aplea avoi-bapaichem aikolem ani to thoim thaun pollon gelo.