Jakob Esau-a Lagim Xanti Korta

Abraham ani Izaka bhaxen hanv tuka-i rakhtolom mhunn Jehovan Jakobak bhas dili. Jakob, Haran nanvachea xarant ravonk laglo, thoim to kazar zalo, taka zaitim bhurgim zolmolim ani to khub girest zalo.

Uprant Jehovan Jakobak sanglem: ‘Tujea desant porot voch.’ Dekhun Jakob ani tachi famil thoim vochonk bhair sorlim. Vatter astana, Jakobache thodde sevok ieun taka sangtat: ‘Tuzo bhav Esau ieta, ani tachea borabor 400 dadle asat!’ Hem aikon Jakob khub bhieta. Taka dista ki Esau, taka ani tachea familik marunk ieta. Dekhun to magnnem korta: ‘Please Jehova, mhojea bhava thaun mhaka rakh.’ Dusrea disa Jakob Esau-ak zaitim menddram, bokddeo, gaio, unttam ani gaddvam gift mhunn dita.

Teach rati, Jakob ekloch astana taka ek devdut dixtti poddtta! Jakob devdut-a koddlean besanvam gheunk taka ghott dhorun ravta ani devdut sutton vochonk khub proitn korta. Oxem rat-bhor cholot aslem ani oxem kortana Jakobak mar-ui lagta, punn tannem soddun diunk na. Devdutan taka mhunnttlem: ‘Mhaka sodd.’ Punn Jakoban mhunnttlem: ‘Na, tunvem mhaka besanv dilea xivai hanv tuka vochonk diuncho na.’

Tednam devdut Jakobak besanv dita ani Jakobak khatri melltta ki Jehova taka Esau-a thaun rakhtolo.

Sokall zatoch, Jakob pois thaun aplea bhavak ani tea 400 dadleank polloita. Jakob sogleant fuddem voita ani dimi ghalun sat pavtti aplea bhavak nomoskar korta. Esau dhanvon Jakoba-xim voita ani taka veng marta. Te dogui khub roddttat ani xanti kortat. Jakob jea toren aplea bhava sangata vaglo tem polloun Jehovak koxem dislem astolem?

Uprant Jakob ani Esau ap-aplea ghora voitat. Jakobak 12 put asle. Tanchim nanvam Ruben, Simeon, Levi, Juda, Dan, Naftali, Gad, Asher, Isakar, Zebulun, Juze, ani Benjamin. Jakobachea eka putak mhunnche Juzek, Jehova aplea lokank salvar korunk uzar korta. Koxem tem tum zannam? Hem ami fuddem polloum-ia.