Juze Jehovak Visvaxi Ravta

Jakob aplea dusrea bhurgeam poros Juzecho chodd mog kortalo. Hem polloun tachea vhoddlea bhavank koxem dislem astolem mhunn tumkam dista? Tankam tachi nattkai zali ani te tacho dves korunk lagle. Juzek vegllech torechim sopnam poddttalim ani hea sopnam vixim tannem aplea bhavank sanglem. Hem aikolea uprant tankam dislem ki ek dis tannim Juzechea paim-am poddchem poddttolem ani tea pasot te tacho anikui dves korunk lagle!

Ek dis Shekem xara lagim Juzeche bhav menddrank choroitale. Ani tanchi khobor gheunk, Jakob Juzek dhaddtta. Pois thaun Juze ieta to polloun tache bhav ekamekak sangtat: ‘Ho polloi, sopnam polloupi ieta. Cholat, ami taka jivexim marum-ia.’ Te taka dhorun eka khol khonddant uddoitat. Punn tancho bhav Judah tankam sangta: ‘Taka marinakat, tachea bodlek ami taka gulam mhunn vikum-ia.’ Dekhun te Juzek chandichea 20 nanneank Ejipttant voitalea Midianit veapareank viktat.

Uprant, Juzeche bhav tache kopdde eka bokddeachea rogtant buddoun kaddttat ani te tanchea bapaik dhaddun oxem sangonk laitat: ‘He kopdde tujea putachech nhoi?’ Hem polloun eka ranvotti zonvaran aplea putak marun uddoila astolo oxem Jakob chintʼta ani to itlo dukhi zata ki tachem dukh konnuch unnem korunk xokona.

Midianitkar, Juzek Ejipttant eka vhodd odhikariak gulam (chakor) mhunn viktat, zachem nanv Potifar aslem. Punn Jehovan Juzek soddun diunk na. Juze aplem kam khub bore toren korta ani tacher patieunk zata mhunn Potifaran polloilem. Dekhun aplem jem kitem aslem tem samballpachi zobabdari tannem Juzek dili.

Juze ekdom ghott aslo ani pollounkui boro distalo. Hem Potifarache bailen polloilem ani dekhun aplea sovem nhid mhunn ti dor disak Juzek sangot asli. Atam Juze kitem kortolo? Ti taka vichartali title-i pavtti Juze tika sangtalo: ‘Na! Hem sarkem nhoi. Mhozo dhoni mhojer visvas dovorta ani tum tachi bail mhunnttoch hanv tujea sangata nhidlear, hanv Deva add patok kortolom!’

Ek dis Potifarachi bail Juzechea kopddeank dhorun aplea sangata nhidonk fors korta. Punn tednam Juze thoim thaun rokddoch dhanvta. Potifar ghora ailea uprant tachi bail taka fott marun sangta ki Juze aplea sangata nhidonk sodhtalo. Hem aikon Potifarak khub rag ieta ani to Juzek jail-int ghalta. Punn Jehova Juzek visronk na.