Jehova Juzek Kednanch Visronk Na

Juze jail-int astana Ejipttachea raza Faraoh-k sopnam poddttat. Ani hea sopnacho orth konnacheanuch sangonk zaunk na. Punn Faraohchea eka chakran taka sanglem ki Juze tujea sopnancho orth sangonk xokta. Tor Faraoh rokddoch Juzek apoun haddtta.

Faraoh taka vicharta: ‘Tum mhojea sopnancho orth sangonk xokta?’ Tednam Juze taka sangta: ‘Ejipttant sat vorsam bhorpur jevonn astolem. Punn tachea uprant, sat vorsam bhuk poddttoli. Tor konnui upaxim poddona zaunk jevonn ektthaim korunk eka huxar munxak vinchun kadd.’ Faraohn taka sanglem: ‘Hem kam hanv tukach ditam! Hanv tuka itli podvi dita ki mhaka soddun tujea poros anik konn vhodd aschona.’ Faraohn polloilea sopnancho orth Juze koso sangonk pavlo tem tum zannam? Jehovan taka modot keli.

Sat vorsam Juzen zaitem jevonn ektthaim korun dovorlem ani tea uprant Juzen sanglolem toxem akʼkhea sonvsaracher bhuk poddli. Dekhun pois-pois thaun lok Juze kodde jevonn viktem gheunk ietale. Ejipttant jevonn melltta mhunn tacho bapui Jakob zannam zalo tednam, tannem aplea dha putank thoim vochon jevonn viktem haddunk lailem.

Jakobache put Juzek mellttat tednam Juze tankam rokddoch vollkhota punn tannim Juzek vollkhonk na. Juzen aplea sopnant polloilem toxem, tache bhav tachea mukhar paim-am poddttat. Tancho sobhav poilim bhaxenuch asa vo te sudhorleat tem Juze zannam zaunk sodhtalo. Dekhun to tankam sangta: ‘Tumi bhedi zaun asat. Amche ganv luttunk tumi hanga pollounk aileat.’ Tannim mhunnttlem: ‘Na! Ami sogle 12 bhav ani ami Kanan desa thaun aileat. Eklo bhav mela ani sogleant dhaktto amchea bapai sangata asa.’ Tednam Juze tankam sangta: ‘Toxem zalear, poilim tumchea dhakttea bhavak hanga haddat. Tednanch hanv tumcher visvas dovortolom.’ Dekhun te aplea bapai lagim porot gele.

Porot ek pavtt, Jakobachea ghorant jevonn somplem tednam, to aplea putank portun Ejipttant dhaddtta. Ani hea pavtti aplea sangata, tea aplea dhakttea bhavak Benjaminak-ui vhortat. Aplea bhavanchi porikxa gheunk, Juze aplem chandichem kop Benjaminachea sakant ghalta ani uprant aplem kop chorlem mhunn tacher arop ghalta. Juzechea chakrak tem kop Benjaminachea sakant mellʼllem tednam tache bhav samkech bhiele. Ani Benjaminache bodlek apleak xikxa di mhunn te Juze lagim vinoti korunk lagle.

Aple bhav sudhorleat mhunn Juzek kollʼllem tednam tachean anik ravonk zaina zalem. Dekhun to roddon aplea bhavank sangta: ‘Hanv tumcho bhav Juze. Mhozo bapui azunui jivo asa?’ Hem aikon tache bhav samkech ojap zatat. Juze tankam sangta: ‘Tumi mhojea sangata jem kitem kelʼlem tea pasot dukhi zainakat. Tumcho jiv rakhonk Devan mhaka hanga dhaddla. Begin vochon mhojea bapaik hanga gheun ieiat.’

Te ghora vochon hi khuxalkaiechi khobor aplea bapaik sangtat ani taka Ejipttant gheun ietat. Atam khub vorsam uprant, Juze ani tacho bapui eka-mekak porot mellttat.