Jehova Samuel-a Lagim Uloita

Mha-iadnik Elik don put asle, je iadnik mhunn povitr tombunt seva kortale. Ekleachem nanv aslem Hofni ani dusreachem Finehas. Punn te Jehovache kaide pallinasle ani lokam lagim vaitt toren vagtale. Jednam Izraelitkar aplea zonvarachem bolidan Jehovak gheun ietale, tednam te zonvarachem boreantlem-borem mas apleak vhortale. Elik aple put kitem kortat ti khobor asli punn tannem hea vixim kainch korunk na. Hem soglem polloun Jehova vogich ravtolo kai?

Hofni ani Finehasa poros Samuel khub lhan aslo. Punn toriastana tannem tanchi dekh gheunk na. Samuelacho sobhav polloun Jehovak khub borem dislem. Eke ratik, Samuel nhidlolo astana konn tori taka ulo marta mhunn Samuelan aikolem. Dekhun to utthlo ani dhanvon Eli lagim gelo ani mhunnttlem: ‘Hanv hanga asam!’ Punn Elin taka mhunnttlem: ‘Hanvem tuka apounk na. Chol voch ani nhid.’ Tor Samuel nhidonk voita, punn taka to avaz porot aikonk ieta. Oxem tisre pavtti ghoddtta tednam, Elik kollon ieta ki Jehova Samuelak ulo marta mhunn. Tannem Samuelak sanglem ki taka porot oso avaz aikonk ieta tednam, tannem oxem mhunnchem: ‘Uloi, Jehova. Tuzo sevok aikota.’

Samuel porot nhidonk voita tednam Jehova taka ulo marta: ‘Samuel! Samuel!’ Samuelan zap dili: ‘Sang Jehova, tuzo sevok aikota.’ Jehova taka sangta: ‘Elik ani tache familik hanv khast laitolom mhunn sang, karonn tache put povitr tombunt vaitt kamam kortat mhunn to zannam, punn torui to kainch korina.’ Dusrea sokallim, sodanche bhaxen Samuel tombuchi daram uktim korta. Jehovan kitem sanglem tem Elik sangonk Samuel bhielo, punn tednam Eli taka sangta: ‘Mhojea puta, Jehovan tuka kitem sanglam tem soglem mhaka sang.’ Tednam Samuel taka soglem sangta.

Samuel vhodd zata toso, Jehova taka modot korit ravta. Jehovan Samuelak provadi ani fuddari zaunk vinchun kaddla mhunn soglea Izraelitkarank kollon ieta.