David Ani Goliat

Jehova Samuelak sangta: ‘Jesse-chea ghora voch. Tacho eklo put Izraelacho fuddlo raza zatolo.’ Tor, Samuel Jesse-chea ghora voita. Tachea vhoddlea putak polloita tednam to aplea monant mhunntta: ‘Hoch astolo to tornnatto.’ Punn apnnem taka vinchun kaddunk na mhunn Jehova Samuelak kollit korta. Jehova taka mhunntta: ‘Munis bhailean koso dista tem hanv polloina. Punn hanv tachem kalliz polloitam.’

Jesse aplea urlolea sov putank Samuela lagim haddtta. Punn Samuel mhunntta: ‘Hanchea modlea konnakui Jehovan vinchunk na. Tuka anikui put asat?’ Tednam Jesse mhunntta: ‘Anik ek put asa, to sogleant dhaktto. Tachem nanv David. To menddrank chorvak gheun gela.’ Uprant, David ghora ailo tednam, Jehova Samuelak sangta: ‘Hoch to zaka hanvem vinchun kaddla!’ Ani Samuel Davidachea mathear tel votoun taka Izraelacho fuddlo raza zaunk makhta.

Uprant thoddea tempan, Izraelitkaram ani Filistevkaram modem zhuz zaupachem aslem. Filistevkaram modem ek zhuzari aslo, zo angan khub vhodd aslo. Tachem nanv aslem Goliat. To dor disak Izraelitkaranchim fokannam kortalo. To vhoddlean mhunnttalo: ‘Tumchea modlea ekleak mhojea lagim zhogddonk dhadd. Tannem mhaka haroilear ami tumche gulam zatole ani hanvem taka haroilear, tumi amche gulam zatole.’

Davidache bhav soinik asle. Tor, David aplea bhavank jevonn gheun te tombu ghalun asle thoim voita. Thoim Goliatachim utram tachea kanar poddttat tednam, to mhunntta: ‘Hanv tachea add zhuztolom!’ Punn Saulu taka sangta: ‘Tum azunui bhurgo asa.’ Punn David mhunntta: ‘Jehova mhaka modot kortolo.’

Saulun aplim hotʼtiaram Davidak dilim. Punn David mhunntta: ‘Hem soglem ghalun mhojean zhuzonk zaunchem na.’ Tor David apli gofinn gheun vhalla koddem voita ani thoim to panch suddsuddit fator kaddun aplea bagant ghalta. Uprant, to Goliatacho fuddo korunk dhanvot voita. Goliat bob marun taka mhunntta: ‘Hanga ieo re bhurgea. Hanv tujem mas ranvotti zonvarank ani molba voilea suknneank ditolom.’ Hem aikon David bhieunk na. Tannem-i mottean mhunnttlem: ‘Tum tolvar ani bhalo gheun ieta, punn hanv Jehovachea nanvan ietam. Tum amchea add nhoi, punn Deva add zhuzta. Hanga aslolim soglim zannam zatolim ki tolvar ani bhaleam poros, Jehova chodd xoktivont asa. Karonn To tuka aiz mhojea hatant ghaltolo.’

Uprant David aplea gofinnent ek fator ghalta ani ti ghunvddaun forsan xevttita. Jehovachea adaran to fator sarko Goliatachea koplar bosta. Goliat thoinch zomnir poddtta ani morta. Tednam sogle Filistevkar aplo jiv vanchounk pollon voitat. Davida bhaxen tum-ui Jehovacher visvas dovorta kai?