Israel Lok Ek Raza Magtat

SAMSONACHEA mornna uprant, Israelant Samuel provadi ani fuddari mhonnon vavurtalo. Israel lok portun portun apnnak dusrea raxttram sarkim zauncheak ek raza zai mhonn taka sangonk lagle. Jehovahk him magnnim okmanachim asunui Tannem Samuelak Israel lokamchea khoxe pormonnem korunk formailem. Devan ek lhanvikaiechea Saulu nanvachea monxak raza korunk vinchun kaddlo. Thoddea kallan, Saulu gorvixtt zalo ani adnia moddunk laglo. Hea pasot Jehovahn taka raza mhonn nakarlo ani David nanvanchea eka tornatteak raza mhonn nemunk Samuelak sanglem. Punn David raza zaunchea adim zaitim vorsam soron gelim.

Tornatto astananch, ek dis David aplea bhavank Sauluche foujent kam kortale tankam mellonk gelo. Thoim akʼkhi fouz dusmanachea ek bollixtt zhuzareak bhievun kamptali. Tea bollixtt zhuzareachem nanv Goliat aslem, to tankam ani tanchea Devak okman kortalo. Tedna ragan Davidan tachea lagim zhuzachem appovnnem mannun ghetlem. Fokot ek gofin ani thodde lhan sullsullit fator gheun ho tornatto aplea virodhea lagim zhuzunk bhair sorlo, zo nov futt odhik unch aslo. Jedna Goliat tachi khebddai korta, tedna Davidan zabab dilo ki apunn tachea poros chod toearin asa, karann David Jehovah Devachea nanvan zhuztalo! Ekuch fatran Davidan Goliatak jivexim marlo ani uprant tachech tolvarin tachi gomtti katorli. Hem dekhtokoch, Filistinichi fouz kampon pollun geli.

Survatek, Davidachem kalljidarponn polleun Sauluk apurbai disli, ani tea tornatteak tannem foujecher fuddari nemlo. Punn Davidak zoit mellta tem polleun Saulu ekdom nattkaien bhorlo. David aplo jiv vanchoupak zaitim vorsam pollun bhovunk laglo. Saulu Davidacho jiv kaddunk sodi torui to taka visvaxi ravlo karann Jehovah Devan Sauluk raza nemlolo mhonn to zana aslo. Xevttim Saulu zhuzant melo. Uprant rokddoch Jehovahn bhasailʼlea pormonnem David raza zalo.

Jehovahk ek mondir bandunk David razak khub anvdde asle. Jehovahn Davidak tachea sonsotintlo eklo hem mondir bandtolo mhonn sanglem. To zavun aslo Davidacho put Solomon. Devan Davidak axirvad dilo ki: tache sonsotintlean konnak sor korunk zaina toslea ek razanchi vonxavoll uprasteli mhonn ek novlancho korar kelo. Xekim ti sonsot Eden bhagent bhasailʼlo Soddvonndar vo bim utponn korteli. To zavun aslo Mesias mhonnge Devan “Makhlolo.” Jehovahn bhasailem ki ho Mesias eka serkaracho vo razvottkecho Raza zatolo ani hi razvott sasnnank togteli.

Devachea upkaranim bhoron, Davidan mondirak bhorpur bandkamacheo ani moladik vostu ektthaim keleo. Ani tannem zaitim Dev prerit stotram ghoddlim. Aplea jivitachea nimannea disanim, Davidan ucharlem: “Sorvesporacho Atmo mhoje udexim uloita, Tacho sobd mhoje jiber asa.”—II Samuel 23:2

​—I Samuel; II Samuel; I Itihas; Izaias 9:7; Matev 21:9; Luk 1:32 Juanv 7:42 hacher adarlelem asa.