David Ani Saulu

Davidan Goliatak jivexim marlea uprant, Raza Saulu taka aplea foujecho mukheli nemta. David zaitim zhuzam jikhta ani khub famad zata. To zhuz jikhon ghora ieta title-i pavtt, bailo khuxalkaien nachtat ani oxem mhunnon git gaitat: ‘Saulun hozarank marle ani Davidan dha hozarank marle!’ Dekhun Sauluk Davidachi nattkai zata ani to taka jivexim marunk sodhta.

David harp khub boro vazoitalo. Ek dis to Raza Saulu pasot harp vazoitalo tednam okosmat razan aplo bhalo tacher xevttilo. Punn Davidan distuch to chukoilo ani to bhalo vochon vonttik toplo. Tea uprant pasun Saulun Davidak jivexim marunk zaite pavtti proitn kelo. Dekhun David thoinchean pollon gelo ani oronnʼnneant liplo.

Saulu aplea 3,000 soinikank gheun Davidak sodhunk bhair sorlo. Punn to chukon David ani tache munis lipon asle teach dholint pavta. Davidache munis holuch sangtat: ‘Sauluk jivexim marunk hich bori sondhi asa.’ David sovkas Saulu lagim voita ani tachea kopddeacho ek kuddko katorta. Punn hea vixim Sauluk kainch kollonk na. Uprant, apnnem Jehovan makhlolea razak resped dakhounk na mhunn Davidak khub vaitt dista. Ani to aplea munxank Sauluk jivexim marunk dina. To pois ravon vhoddlean Sauluk sangta: ‘Tuzo jiv kaddcho mhaka sondhi asli, punn hanvem toxem korunk na.’ Hem aikon Saulun aplem mon bodolʼlem kai? Davidacher aslolo tacho rag unno zalo kai?

Na. Tannem Davidachea fattik lagpachem soddun diunk na. Eke ratik, David ani tacho bacho Abishai, soukas Sauluchea tombunt bhitor voitat. Saulu ani toxench tacho rakhonddar Abner-ui sust nhident poddlolo asta. Abishai Davidak sangta: ‘Hich bori sondhi asa! Tum hukum dita zalear, hanv atanch Sauluk jivexim marunk xoktam.’ Punn Davidan mhunnttlem: ‘Sauluk Jehova polloun ghetolo. Ami fokot tacho bhalo ani udkachem jug gheun vochom-ia.’

David eka lagxilea dongrar choddtta, ani thoim thaun taka Saulucho tombu dista. Ani to vhoddlean Abnerak mhunntta: ‘Tunvem tujea razachi rakhonn kiteak korunk na? Sauluchem udkachem jug ani bhalo khoim asa?’ Ho Davidacho avaz mhunn Sauluk kolltta ani to Davidak mhunntta: ‘Tum mhozo jiv kaddunk xoktalo, punn tunvem toxem korunk na. Tum Izraelacho fuddlo raza zatolo mhunn hanv zannam.’ Uprant Saulu aplea rajmahalant porot voita. Sauluchea familintlim soglim zannam Davidacho dves korinaslim.