Jezu Sauluk Vinchun Kaddtta

Saulu ek Romi nagrik aslo, zo Tarsus xarant ravtalo. To ek Farizev aslo, zaka Judevanchea Kaideam vixim bori zannvai asli ani to Kristanvancho dves kortalo. To Kristanv dadleank ani bailank tanchea ghorantlim bhair voddun haddttalo ani tankam jailint uddoitalo. Lokanchea zomean ragan Istevak jivexim marlo tednam, Saulu thoinch ubo ravon polloitalo.

Jeruzalema bhair dusrea zageamnim vochon Saulu Kristanvank dhorunk sodhtalo. Dekhun to Damaskak vochon thoinchea Kristanvank sodhunk, Mha-iadnika lagim porvangi magta. To Damaska lagim pavchoch aslo tednam, okosmat tachea charui vattamnim uzvadd porzolltta ani to zomnir poddtta. Uprant taka ek avaz aikonk ieta: ‘Saulu, tum mhaka kiteak tras dita?’ Tednam Saulu vicharta: ‘Tum konn?’ Taka zobab melltta: ‘Hanv Jezu. Tum Damaskant voch ani fuddem kitem korchem tem thoim tuka kollttolem.’ Teach vellar, Saulu kuddʼddo zata, dekhun dusreanchi modot gheun taka tea xarant vochonk poddtta.

Damaskant, Ananias nanvacho ek visvaxi Kristanv aslo. Jezu taka dorxonant sangta: ‘Nitt mhunnttat tea rostear voch ani Judasachea ghora vochon Saulu nanvachea munxa vixim vichar.’ Tednam Ananias mhunntta: ‘Somia, tache vixim tor mhaka sogli khobor asa! To tujea xisank jailint ghalta!’ Punn Jezu taka mhunntta: ‘Tum tachea lagim voch. Karonn, zaitea desamnim vochon bori khobor porgottunk hanvem taka vinchun kaddla.’

Ananias vochon Sauluk melltta ani taka sangta: ‘Saulu, mhojea bhava, tuje dolle ugddunk Jezun mhaka dhaddla.’ Tednam rokddoch Saulu porot pollounk xokta. To Jezu vixim xikta ani ek xis zata. To Kristanv zaunk bautizm gheta. Uprant, dusrea Kristanvam sangata to sobha-ghoramnim porgottnni korunk lagta. Hem polloun Judev lok kitle ojap zale astole nhoi! Te mhunnttat: ‘Jezuchea xisank dhorun vhortalo to munis hoch nhoi?’

Tin vorsam poriant, Saulu Damaskantlea lokank porgott korta. Tednam Judev Saulucho dves korunk lagtat, ani taka jivexim marunk ievzonneo kortat. Tea vixim bhavank kolltta tednam, te tacho jiv salvar korunk modot kortat. Te taka eka vhoddlea panttleant bosoun xarachea vonttik aslolea eka zonelantlean sokol denvoitat.

Saulu, Jeruzalemak vochon thoinchea bhavank mellonk proitn korta. Punn te taka bhietat. Tednam Barnabas nanvacho ek xis, zo khub mogall aslo to Sauluk, apostlam lagim haddtta ani to khoreaninch bodolʼla mhunn tankam khatri dita. Saulu Jeruzalemache sobhe sangata mellon urben bori khobor porgott korta. Uprant, taka Paulu hea nanvan lok vollkhonk lagtat.