Izraelacho Poilo Raza

Izraelitkarank vatt dakhounk Jehovan fuddareank nemlole. Punn atam tankam ek raza zai aslo. Dekhun tim Samuelak sangtat: ‘Her raxttrank raza asat. Tor, amkam-i ek raza zai.’ Punn Samuelak hem sarkem disona. Tor, to hea vixim Jehova lagim magnnem korta. Jehova taka sangta: ‘Lokamnim tuka nhoi, punn mhaka nakarla. Tankam ek raza mellttolo mhunn sang. Punn to tanchea koddlean zaiteo vostu magtolo.’ Tori lokamnim sanglem: ‘Kaim nozo. Amkam ek raza zai!’

Saulu nanvacho munis Izraelacho poilo raza zatolo mhunn Jehovan Samuelak sanglem. Tednam Saulu Samuelak mellonk Ramant voita. Ani thoim to Sauluchea mathear tel votoun taka raza mhunn vinchun kaddtta.

Uprant, tancho novo raza dakhounk Samuel Izraelitkarank apoun haddtta. Punn Saulu tankam khoinsoruch mellona. Kiteak tem tum zannam? Karonn to samona fattlean lipon asta. Jednam tankam Saulu melltta, tim taka bhair haddttat ani lokam mukhar ubo kortat. Thoim aslolea soglea lokam poros Saulu khub lamb aslo ani to pollounkui khub boro distalo. Samuel uprant mhunntta: ‘Polloiat! Jehovan vinchun kaddlolo raza.’ Tednam, lok bob marun mhunnttat: ‘Razak lamb auk mellom!’

Survatek Saulu, Samuelachem aikotalo ani Jehovachi adnea pallttalo. Punn uprant to bodolʼlo. Udharonnak, ek pavtt bolidan bhettounk Samuelan Sauluk apunn ie-sor ravonk sanglem. Samuelak ieunk vogot zalo dekhun Saulu svota bolidan bhettounk tharaita. Punn hem kam korunk razak odhikar naslo. Hem polloun Samuelan Sauluk mhunnttlem: ‘Tunvem Jehovachi adnea kiteak moddli?’ Saulu aplea chuki thaun kitem-i tori lisanv xiklo kai?

Tea uprant, Saulu Amalekitkarancher zhuz korunk voita. Samuel Sauluk sangta ki tannem sogleank jivexim marunk zai. Punn Saulu, Raza Agag-ak jivexim marchona mhunn tharaita. Tednam Jehova Samuelak sangta: ‘Saulu atam mhojem aikona. Tannem mhaka soddla.’ Hem aikon Samuel khub dukhi zalo. Dekhun to Sauluk mhunntta: ‘Tunvem Jehovachem aikonk bond kelem mhunn, tujea bodlek Jehova dusro raza vinchun kaddttolo.’ Samuel thoinchean vochonk bhair sortana, Saulu tachea kopddeak dhorta tednam tacho kopddo pinzta. Tednam Samuel Sauluk mhunntta: ‘Jehova tujea koddlean hi razvottki kaddttolo.’ Tor, aplo mog korta ani aplem utor palltta toslea eka munxak Jehova ti razvottki diuncho aslo.