Raza Davidachem Patok

Saulu melea uprant David raza zata. Tednam to 30 vorsancho aslo. Raza zaun thoddea vorsam uprant, eke ratik to aplea rajmahalache terrace-ar ravon eke sobit bailek polloita. David tiche vixim khobor kaddtta tednam, tichem nanv Bathsheba ani ti Uria nanvachea soinikachi bail mhunn taka kollon ieta. To Bathshebak aplea rajmahalant apoun haddtta. Tim kuddicho sombond dhortat ani Bathsebha gorbest zata. Apnnem kelʼli chuk David lipounk proitn korta. To aplea senapotik sangta ki Uriak zhuzant sogleant fuddem ubo kor ani dusrea soinikank fattim soronk sang. Uria tea zhuzant morta ani uprant David Bathsheba lagim kazar zata.

Punn Davidan kelʼlim soglim vaitt kamam Jehovan polloilʼlim. Tor Jehova kitem korta? To aplo provadi, Nathanak Davida-xim dhaddtta. Nathan Davidak sangta: ‘Ek girest munis aslo zache lagim zaite menddre asle. Toxench, ek gorib munis aslo, zache lagim fokot ekuch lhan menddro aslo, zacho to khub mog kortalo. Punn to girest munis hea gorib munxacho ekloch menddro gheun voita.’ Hem aikon David ragan bhorta ani mhunntta: ‘Tea girest munxak jivexim marunk zai.’ Nathan Davidak mhunntta: ‘Tunch to girest munis!’ Tednam David ekdom dukhi zata. Ani apli chuk to manun gheta ani Nathanak mhunntta: ‘Hanvem Jehova add patok kelam.’ Hea patkak lagon David ani tache familicher zaite tras ietat. Punn David promannik ani khalto aslo dekhun, Jehova taka mornnachi xikxa dina.

David Jehova pasot ek mondir bandunk sodhtalo. Punn Jehova tacho put, Solomonak hem kam korunk vinchun kaddta. Tednam David mhunntta: ‘Jehovachem mondir khub sobit ani vhodd asonk zai. Solomon azun lhan asa, dekhun hanv tachi modot kortolom. Tachea pasot hanv sogli toiari korun dovortam.’ Mondir bandunk tannem aple zaite poixe dile. Tea bhair, kam korunk tannem huxar munxank sodhun kaddle. Bhangar ani chandi ektthaim keli. Toxench, tannem Tir ani Sidon desantlean cedarachim lakddam haddunk lailim. Davidache morpache dis lagim pavle tednam, tannem Solomonak mondiracho plan dilo ani sanglem: ‘Hem soglem tujea pasot boroun dovorunk Jehovan mhaka sanglam. To tuka modot kortolo. Dekhun tum bhienaka, dhir dhor ani kamank lag.’