Jehova Jonas-a Lagim Pasiensan Vagta

Assirient Nineve nanvachem ek xar aslem, zacho lok khub vaitt aslo. Dekhun Jehova aplea provadi Jonas-ak Ninevek vochon tea lokank aplim vaitt kamam soddunk xittkai mhunn sangta. Punn Jonas Jehovachem aikona ani dusre vatten vochonk to Tarshishak voitolea tarvar choddtta.

Tarum doria modem pavlem tednam, okosmat ek bhirankull vadoll ieta ani tarvar aslole munis sogle bhietat. Te ap-aplea deva lagim magnnem korun vichartat: ‘Oxem kiteak ghoddtta?’ Xevottak, Jonas tankam mhunntta: ‘Hem mhaka lagon ghoddtta. Jehovan mhaka sanglam tem aikonastana hanv pollon voitam. Mhaka tumi doriant uddoilear, hem vadoll thambtolem.’ Tarvar aslolea munxank Jonasak udkant uddounk naka aslem. Punn to tankam porot-porot sangta mhunn te taka ubartat ani doriant uddoitat. Tednam vadoll thambta.

Jonasak dislem ki atam to mortolo. Doriachea bhitor bhuddttana, to Jehova lagim magnnem korta. Tednam, Jehova ek vhoddlem nustem dhaddtta, ani tem nustem Jonasak gilltta, punn Jonas morona. Nusteachea pottant astana Jonas oxem magnnem korta: ‘Hanv promise kortam ki hanv sodanch tujem aikotolom.’ Jehova Jonasak tin dis poriant nusteachea pottant samballun dovorta. Uprant, Jehova oxem kitem tori korta ki nustem Jonasak sukhe zomnicher vonkun bhair kaddtta.

Jehovan Jonasak salvar kelo dekhun, taka porot Ninevent vochonk poddonk na kai? Na. Jehova porot Jonasak thoinch vochonk sangta. He pavtt Jonas Devachem aikota. To thoim vochon thoinchea vaitt lokank sangta: ‘40 disamnim, Nineve xaracho nas zatolo.’ Uprant Jonasan chintunk na tem ghoddtta. Ninevecho lok aikotat ani apli vaitt kamam soddun ditat. Ninevecho raza lokank sangta: ‘Devak ulo marat, ani poschatap korat. Ghoddie to amcho nas korchona.’ Lokamnim poschatap kela tem polloun Jehova Nineve xaracho nas korina.

Hem polloun Jonasak khub rag ieta. Chintun polloiat: Jehovan, Jonasak pasiens ani doia dakhoili. Punn Jonas Ninevechea lokank doia dakhounk toiar naslo. Tachea bodlek, to xara bhair vochon eke dudhiache vali ponda tondd fuloun bosta. Ti val bavta tednam, Jonasak anikui rag ieta. Tednam Jehova taka sangta: ‘Ninevechea lokam poros tuka hea valichi chodd porva asa. Hanvem tankam doia dakhoili dekhun tim salvar zalim.’ Tor Jehova kitem sangonk sodhtalo? Khoinchea-i zhadda poros Ninevechea lokancho jiv chodd moladik aslo.