Devdut Jezuchea Zolmachi Khobor Kolloitat

Tea disamnim soglea Judev lokamnim aplea ganvant vochon, ap-aplem nanv register korchem mhunn Romi Somrazacho raza, Caesar Augustus hukum bhair kaddtta. Dekhun Juze Mariek gheun Bethlehemant voita, zoim to zolmolʼlo. Atam Mariek bhurgem zolmopacho vell lagim pavlolo.

Tim Bethlehemant pavlim tednam, tankam ravonk khoinch zago mellona. Dekhun tim eka gotteant asro ghetat. Thoim Marie aplo put, Jezuk zolm dita. Tim taka mov lugttan guttlaun bore bhaxen eka khavnnent dovortat.

Bethlehem-a lagim thodde gonvlli ratchea vellar bhair ravon aplea menddreanchi rakhonn kortale. Okosmat, tanchea mukhar ek devdut ieun ubo ravta ani Jehovache mhoimecho uzvadd tanchea sorvbhonvtonnim poddtta. Hem polloun gonvlli khub bhietat. Punn devdut tankam sangta: ‘Bhienakat. Hanv tumkam ek khub khuxalkaiechi khobor diunk ailam. Aiz Bethlehemant, Mesias zolmola.’ Tednam mollbar tankam zaite devdut dixtti poddttat ani te oxem mhunnttat: ‘Sorgar aslolea Devak mhoima ani prithumer xanti.’ Uprant te devdut nanch zatat. Tor atam he gonvlli kitem kortole?

Te ekamekak sangtat: ‘Cholat, ami atanch Bethlehemant vochom-ia.’ Te begin-begin thoim voitat ani eka gotteant, Juzek ani Mariek zolmolʼlea bhurgea sangata polloitat.

Devdutan gonvlleank jem kolloilem, tem aikolea uprant ojap zale. Devdutachea utrancher Marien bariksannen chintlem ani tim utram ti kednanch visorna. Jehovan hea gonvlleank kitem kolloilem ani dakhoilem tea pasot te Jehovache upkar attoitat ani porot aplea hindda sorxim voitat.