Jezu Lazarak Jivont Korta

Jezuk tin khub ghott ixttam aslim, jim Bethani ganvant ravtalim. Tim zaun aslim, Lazar ani tacheo don bhoinno, Marie ani Martha. Ek dis, Jezu Jordan nodichea dusrea vatten aslo tednam, Marie ani Martha taka oso ek sondex dhaddttat: ‘Lazar khub duent asa. Please, tum begin hanga ieo!’ Punn Jezu rokddoch thoim vochona, to don dis ravlea uprant aplea xisank sangta: ‘Chol, ami Bethani ganvant iea. Lazar nhidla ani hanv taka utthounk voitam.’ Tednam, apostl mhunnttat: ‘To nhidla zalear to boro zatolo.’ Uprant Jezu tankam spoxtt ritin sangta: ‘Lazar melo.’

Jezu Bethanient pavlo tednam, Lazarak moron ani taka puroun char dis zalʼle. Martha ani Mariechea ghora, tankam bhuzvonn diunk zaito lok ailʼlo. Punn Jezu ailo mhunn Martha aikotanch, ti rokddich taka mellonk voita. Ti mhunntta: “Somia, tum hanga aslo zalear, mhozo bhav morcho naslo.” Tednam, Jezu tika mhunntta: ‘Tuzo bhav jivont zatolo. Hem tum patieta?’ Ti mhunntta: ‘Somia, melolo lok jivont zatolo tea vellar, to pasun jivont zatolo mhunn hanv patietam.’ Tednam, Jezu tika mhunntta: “Meloleank jivont korpi ani tankam jivit diupi hanvuch.”

Uprant Martha Marie lagim vochon sangta: ‘Jezu aila.’ Tednam Marie dhanvon Jezu lagim voita, ani tichea fattlean zaito lokui voita. Marie Jezuchea paim-amxim poddon roddtta, ani mhunntta: ‘Somia, tum hanga aslo zalear, mhozo bhav morcho naslo!’ Ti kitli dukhi asa ani roddtta tem polloun Jezu-ui roddtta. To roddtta tem polloun thoincho lok mhunnttat: ‘Khorench, Jezu Lazaracho khub mog kortalo.’ Punn thoddim chintunk lagtat: ‘Tannem aplea ixttak kiteak vanchounk na?’ Punn uprant Jezu kitem korta?

Jezu tea dholi lagim voita, zoim Lazarachi kudd dovorloli. Tea dholichea tonddar ek vhoddlo fator dovorlolo aslo. Jezu oso hukum dita: ‘To fator kaddat.’ Tednam Martha mhunntta: ‘Taka purlear char dis zale! Tache kuddik vas martolo.’ Tori astana, te to fator kaddttat, ani Jezu oxem magnnem korta: ‘Bapa, tunvem mhojem aikolem mhunn thank you. Hanv zannam tum mhojem sodanch aikota. Punn aiz hanv hea lokam mukhar uloitam karonn tunvench mhaka dhaddlo mhunn tannim zannam zalolem mhaka zai.’ Uprant to vhoddlean oso ulo marta: “Lazar, bhair ieo!” Uprant ek ojap ghoddtta: Lazar dholintlean bhair sorta, taka kopddeachea pottʼtteamnim bandlolo aslo. Dekhun, Jezu mhunntta: “Tache pottʼtte soddat, ani taka vochonk diat.”

Hem polloun zaitea zannamnim Jezucher bhavarth dovorlo. Punn thoddeamnim vochon hea vixim Farizevank sanglem. Tednam thaun Farizev, Lazarak ani Jezuk jivexim marunk sodhtale. Uprant 12 modlo eklo apostl, Judas Iskariot, lipon vochon Farizevank melltta ani tankam vicharta: ‘Hanvem Jezuk dhorun dilear tumi mhaka kitle poixe ditole?’ Te taka chandiche 30 nanne diunk toiar zatat. Tor tednam thaun Judas Jezuk dhorun diunk sondhi sodhunk laglo.