Xisank Povitr Xokti Melltta

Jezu sorgar vochon dha disam uprant, tache 120 xis Jeruzalemant eka unchlea rumant ektthaim zalʼle. To 33 K.X.-acho Ponʼnasavo Dis aslo. Ani to dis monounk veg-vegllea ganvantle lok Jeruzalemant ailʼle. Okosmat, ek ojapachi ghoddnni ghoddli. Tea rumant ektthaim zalʼleanchea toklencher ujeache agtte koxe kitem tori disonk laglem ani tim soglim veg-vegllea bhasamnim ulounk laglim. Ani vareachea zum-zumit avazan tem akʼkhem ghor bhorlem.

To avaz aikon Jeruzalemant ailole lok dhanvon hea ghorant kitem ghoddtta kai mhunn pollounk gele. Thoim gelear xis tanchea mai-bhaxent tanchea lagim uloitat tem aikon tem ekdom ojap zale. Te mhunnonk lagle: ‘He lok tor Galiliekar. Tor te amchea mai-bhaxent koxe ulounk xoktat?’

Uprant Pedru ani her apostl sogleam mukhar ube ravle. Jezuk koso marlo ani Jehovan taka koso jivont kelo tea vixim Pedru lokank sangonk laglo. Toxench tannem sanglem: ‘Atam Jezu sorgar Devachea uzvea vatten asa. Ani bhasaunni kelʼli toxi tannench amcher povitr xokti votoilea. Teach pasot, hem vizmit ghoddlam jem tumi aikotat ani polloitat.’

Pedruchim utram aikon lokancher tacho khub boro porinnam poddlo. Tor tim vicharunk laglim: ‘Atam ami kitem korunk zai?’ Pedrun mhunnttlem: ‘Poschatap korat ani Jezuchea nanvan bautizm gheiat. Tednam tumkam-i povitr xokti mellttoli.’ Teach disa sumar 3,000 lokamnim bautizm ghetlo. Ani tednam thaun Jeruzalemant xisancho ankddo rokddoch vaddonk laglo. Povitr xoktechea modotin apostlamnim anikui zaiteo noveo sobha suru keleo. Oxem kelʼlean, Jezun tankam jem xikoilʼlem, tem soglem te tea xisank xikounk pavle.