Te Porgottnni Bond Korinant

Ek munis sodanch Devmondirachea dara lagim boson bhik magtalo. To zolma thaun longddo aslo. Ek dis, to donparchea vellar Pedru ani Juanv Devmondirant bhitor ieta tem polloita. Tednam to tankam sangta: ‘Please, mhaka kitem tori diat.’ Pedru taka sangta: ‘Poixeam poros chodd bori vost hanv tuka diunk sodhtam. Jezuchea nanvan hanv tuka sangtam, utth ani chol!’ Uprant Pedru tea munxak utthonk modot korta ani to munis cholonk lagta! Hem vizmit polloun thoim aslolo lok khub khuxal zatat ani zaite lok Jezucher bhavarth dovortat ani Kristanv zatat.

Punn hem polloun, iadnik ani Saduki ragan bhortat. Te apostlank dhorun korttant vhortat ani tankam dhomkaun vichartat: ‘Hea munxak borem korunk tumkam xokti konnem dili?’ Pedru sangta: ‘Amkam hi xokti Jezu Kristan dilea, zaka tumi jivexim marlo.’ Tednam dhormik fuddari tankam bob marun sangtat: ‘Jezuchea nanvan ulovop bond korat!’ Punn apostl sangtat: ‘Hem amchean zaunchem na. Ami tachea vixim ulounkuch zai.’

Pedruk ani Juanvak soddle tednam, te rokddech dusrea xisam lagim voitat ani kitem ghoddlem tem soglem tankam sangtat. Tednam, te sogle sangata oxem magnnem kortat: ‘Jehova, please amkam tujem kam korit ravonk dhir di.’ Jehova tankam povitr xokti dita, ani te porgottnni korit ravtat ani duentank bore korit ravtat. Zaito lok Kristanv zatat. Hem polloun, Saduki nattkaien bhortat ani te apostlank dhorun jail-int uddoitat. Punn ratchea vellar, Jehovacho ek devdut ieun jailichim daram uktim korta ani apostlank mhunntta: ‘Porot Devmondirant vochat ani xikoiat.’

Dusrea disa sokallim Mha-sobhek, mhunnche dhormik fuddareanchea korttak oxi khobor melltta: ‘Jailichim daram bond asat. Torui jea munxank tumi arrest kelole te atam jailint nant! Te mondirant asat ani thoim lokank xikoitat!’ Tednam te porot apostlank dhortat ani tankam Mha-sobhent haddttat. Mha-iadnik tankam sangta: ‘Jezuchea nanvan ulovop bond korat mhunn ami tumkam hukum dilʼlo!’ Tednam Pedru tankam sangta: “Ami munxanchi nhoi, punn Devachi adnea pallunk zai.”

Hem aikon dhormik fuddareank itlo rag ieta ki te apostlank jivexim marunk sodhtat. Punn Gamaliel nanvacho ek Farizev, ubo ravon tankam sangta: ‘Tumi jem korunk sodhtat, tea vixim bore bhaxen chintat! Ghoddie Dev tanchea sangata asot. Ani toxem zalear, tumi Deva add zhuzonk sodhtat kai?’ Tor te tachem aikotat. Te apostlank danddeamnim martat ani porgottnni bond kor mhunn porot hukum diun tankam soddttat. Punn apostl porgottnni bond korinant. Te dhiran mondirant ani ghor-ghoramnim vochon lokank bori khobor porgott korit ravtat.