Jezu Hozaramnim Lokank Jevonn Dita

Jezuche apostl 32 K.X-achea Paskachea porbe poilim, porgottnni korun ietat. Te khub thoklole astat, dekhun visov gheunk Jezu tankam bottin Bethsaida vhorta. Punn te thoim pavtanch, doriache deger Jezuk mellonk hozaramnim lok ailole astat. Jezu aplea xisam sangata visov gheunk sodhtalo. Tori astana, to lokank melltta. To mogan duentank boro korta ani sogleank xikounk lagta. To dis-bhor Devachea Rajea vixim lokank xikoita. Sanz zatoch, apostl Jezuk sangtat: ‘Lokank bhuk laglea astoli. Tor tankam svota pasot kitem tori viktem gheunk dhadd.’

Tednam Jezu mhunntta: ‘Tankam vochpachi goroz na, tuminch tankam kitem-i khaunk diat.’ Apostl taka vichartat: ‘Ami vochon tanchea pasot unddo haddlolo tuka zai?’ Tednam Filip nanvacho ek apostl mhunntta: ‘Amchea kodde zaite poixe aslearui, amkam itlea lokank undde vikte haddunk xokonant.’

Jezu vicharta: ‘Tumchea lagim kitlem jevonn asa?’ Andre sangta: ‘Amchea lagim panch undde ani don lhan nustim asat. Punn hem sogleank pavchem na.’ Tednam Jezu sangta: ‘Te undde ani nustem mhoje-xim gheun ieiat.’ To lokank 50 ani 100-achea zomeamnim tonnar bosonk sangta. Jezu undde ani nustem gheta ani sorgar polloun magnnem korta. Uprant tem jevonn to apostlank dita ani te lokank vanttʼttat. Tea disak, 5,000 dadle, toxench zaiteo bailo ani bhurgim pott-bhorun jevtat. Uprant kainch piddʼddear zaina zaunk, apostl urlolem jevonn ektthaim kortat. Hea toren 12 panttleo jevonn urta! Hem ek kitlem ojapachem vizmit aslem nhoi?

Hem vizmit polloun, lok Jezuk raza korunk sodhtat. Punn tea vellar Jehova apleak raza korunk sodhinaslo mhunn Jezuk khobor asli. Taka lagon, to tea lokank dhaddtta ani aplea apostlank bottin, Galili doriachea poltoddi dhaddtta. Punn to ekloch eka dongrar voita. Kiteak? To thoim vochon aplea Bapa lagim magnnem korunk sodhtalo. Tor Jezu kitlo-i bizi aslear pasun, magnnem korunk tannem sodanch vell kaddlo.