Jezuchem Nimannem Jevonn

Dor vorsak Nisan mhoineachea 14-vea disak, Judev lok Paskachi porob monoitale. Jehovan tankam Ejipttantlea gulamponnantlean koxe soddoile ani bhasailʼlea desant haddle tem, hi porob tanchea ugddasak haddttali. 33 K.X.-ant, Jezu Jeruzalemant eka voilea rumant aplea apostlam sangata Paskachi porob monoitalo. Jevonn sompta toxem Jezu tankam sangta: ‘Tumchea modlo eklo mhozo ghat kortolo.’ Jezun oxem mhunnttlem tednam apostl ojap zaun taka vichartat: ‘To konn?’ Jezu tankam sangta: ‘Hanv zaka unddo ditolom, toch to munis.’ Uprant Jezu, Judas Iskariotak unddeacho ek kuddko dita. Tednam rokddoch Judas uttʼttha ani tea rumantlean bhair sorta.

Magir Jezun magnnem kelem ani unddo gheun tache kuddke korun aplea apostlank vanttlo. Tannem mhunnttlem: ‘Ho unddo khaiat, zo suchit korta mhoje kuddik, ji hanv tumchea pasot ditolom.’ Porot ek pavtti Jezu thoddo drakxancho soro gheun magnnem korta ani aplea apostlank vanttʼttun mhunntta: ‘Ho soro pieiat, zo suchit korta mhojea rogtak, jem hanv tumchea pasot varoitolom. Hea udexim tumkam tumchea patkanchem bhogsonnem mellttolem. Tumi sorgar mhojea sangata raza zatole mhunn hanv tumkam promise kortam. Dor vorsak, hem mhojea Ugddasak korit ravat.’ Tor aizui Jezuche xis dor vorsak tea sanjer ektthaim zatat ani tea mittingek ami Somiachem Rat Jevonn mhunnttat.

Tem jevonn zalea uprant, tanchea modlo vhoddlo konn asa tea vixim zannam zaunk apostl eka-meka sangata zhogddonk lagtat. Tednam Jezu tankam oxem somzaita: ‘Tumchea modlo, zo apnnak sogleam-von lhan mhunn somzota, to zaun asa sogleam-von vhoddlo.’

‘Tumi mhoje ixtt dekhun, mhojea Bapak zai tem soglem hanv tumkam sangtam. Rokddoch hanv sorgar mhojea Bapa lagim voichom asam. Tumi hanga astole ani tumi eka-mekacho mog kortat tem polloun tumi mhoje xis mhunn soglo lok vollkhotolo. Hanvem tumcho kela tosoch tumi eka-mekacho mog korunk zai.’

Xekim, Jezu Jehova kodden magnnem korta. Tea magnneant to soglea xisanchi rakhonn korunk ani tannim ekvottan kam korunk modot kor mhunn magta. Toxench, Jehovachem nanv povitr zaunk pasun to magta. Tea uprant, Jezu ani tache apostl Jehovachi vakhannʼnni korunk git gaitat ani magir thoim thaun bhair sortat. Atam Jezuk dhorun vhorpacho vell lagim pavlolo.